Sweet Monster：獸色可餐

近排天氣實在厭悶到爆，出完太陽，又豪雨一場，轉頭再放晴，啲天氣真喺玩晒嘢。加上，都唔知依家算初夏定盛夏，總之就悶熱啦，飲食嘅消暑之法就喺食吓雪糕，飲杯凍飲喇！食完晏，就一於搵啲凍嘢解吓悶熱。

嚟自韓國嘅Sweet Monster較為人熟悉嘅喺佢啲爆谷雪糕，原本喺打算嘆番杯，不過，原來有其他甜點更啱心水，所以就無試爆谷雪糕。門口放咗隻藍怪獸紙板歡迎你，所以，非常易認，再者，門面色彩繽紛，十分搶眼。店舖其實唔大，因為主要都喺外賣為主，不過，方便客人享用某類甜點，有兩張高身枱可作為立食之用。

基本嚟講，以類別計，店內嘅食品主要分為雪糕系列、爆谷系列、爆谷雪糕系列、提拉米酥蛋糕系列、提拉米酥蛋糕拼雪糕系列、迷你冬甩拼雪糕系列（新產品）及飲品，樣樣都有三幾款口味。

提拉米酥雪糕（甜筒）$29

除甜筒外，所有雪糕都可以揀中杯裝（$27）或大杯裝（$39），當然，甜筒有個脆筒食，較得人歡心，所以，老婆就揀咗提拉米酥雪糕甜筒。

面層嘅軟雪糕標示以75%首爾牛奶製作，入口確喺特別香濃，口感幼滑細緻。既然以提拉米酥為名，當然要有提拉米酥嘅元素，所以裡面有浸咗特濃咖啡嘅手指餅及意大利軟芝士，仲要雪糕面仲灑上大量Valrhona朱古力粉，所以，真喺有幾分食緊提拉米酥嘅感覺。

迷你冬甩拼雪糕（焦糖醬）$39

有新嘢自不然順便試新嘢，款款迷你冬甩拼雪糕都喺賣$39，仲有朱古力醬及士多啤梨醬口味。

據店員妹妹講，啲迷你冬甩每日新鮮即製，因為我哋喺中午嚟食，唔知會唔會「新鮮」。啲冬甩外層仲帶微脆，內裡軟綿好似蛋糕咁鬆軟，蘸上焦糖雪糕，雖然未有冰火之效，但味道實在不俗。

香蕉提拉米酥蛋糕拼雪糕 $59

拉米酥蛋糕基本上有4款配搭：原味、香蕉、開心果仁及士多啤梨，除淨食提拉米酥蛋糕，亦可以拼雪糕，淨食還是拼雪糕都喺賣$59。

淨食提拉米酥蛋糕基怕有啲「漏」，所以，揀咗拼雪糕。簡單嚟講，就喺拉米酥蛋糕+軟雪糕+香蕉肉嘅組合，件蛋糕濕潤而富濃香咖啡味，芝士部份又幾軟滑，香蕉果肉夠熟夠香，一口過，三重滋味。

蜜糖西柚冰茶 $29

飲品方面有特飲、冰茶及奶昔，冰茶以烏龍茶做茶底，再配以唔同嘅水果。

手上依杯加入蜜糖西柚嘅冰茶，西柚味好濃郁，又有份蜜糖嘅清甜滲出，平衡番西柚本身嗰種澀味，加上冰涼透心。老婆仲話西柚有益健康，功效多多，又抗氧化，又有維他命，不過，我就最緊要夠冰涼，飲多幾啖等小弟暑氣全消。

食完雪糕、冬甩、蛋糕，唔單驅走暑氣，更滋味滿足。離開時，多咗好幾個客幫襯，真喺「獸」田無人耕，耕開有人爭，哈哈。

個人評分
味道：8/10
環境：7/10
服務：9/10
抵食：7/10
平均每人消費：HK$40

餐廳資料：
Sweet Monster
尖沙咀廣東道30號新港中心1樓115-116號舖
2174 6750