當然，環境上較大亮點喺吧位近門口一角放咗好多支手工啤，有外國，有本地，各色各樣都有，樽身招紙又夠得意。加上聽朋友講，近年手工啤晌香港大行其道，本土出品亦都不俗，故此，亦成為店家嘅賣點之一。此外，店內亦有唔少紅酒、白酒、烈酒、雞尾酒……等等供應。
仲有，從餐牌所見，有一系列自家浸酒，頗有特色，可以混入汽水、果汁……等等作配搭，非常有心思。
唔飲得酒都唔緊要，店家仲供應多款非酒精飲品，小弟就要咗較喜好嘅鮮奶咖啡，反正，試熱狗先喺我嚟嘅目的。
甜蕃薯薯條配自家製煙燻醬 $68
本來同朋友飲吓嘢，傾吓偈，兼試試熱狗，但見到小食當中有一款蕃薯條，仲要配隻煙燻醬，市面較少見，所以，二話不說就點一客試試。
蕃薯條用上「雞蛋黃」，所以，炸出嚟色澤偏橙紅，入口好有蕃薯味，幾粉甜，配個煙燻醬，又夾得到喎；個醬唔講以為喺茄醬，但色澤黝深，細味會嗒到微微煙燻香。
豬牛大格鬥熱狗 $88
雖然雙重松露熱狗喺店家嘅熱賣，但豬牛大格鬥熱狗先喺店方推介，當然依啲都喺推銷技倆，但好奇心驅使下又想試試喺點。
熱狗嘅份量絕對十足，睇啲餡料堆到滿滿，大格鬥以原條德國香草豬肉腸拼牛脷厚絲，再唧上一向都鍾意嘅法式蜜糖芥末醬，每大啖咬一口，豬肉腸味濃帶香草香，腸衣薄而脆口，而牛脷獨有嘅羶香深得我心，配合埋甜蜜卻有一陣陣芥末味嘅醬汁，真喺好有個性嘅熱狗，好味！
手工啤酒「港女IPA」 $88
超搞嘢嘅一支本地手工啤酒，唔單止個名夠晒本土味，仲有，味道一樣搞鬼，因為聽店員介紹再睇睇後面招紙，成份有果皮、花椒、茴香，喺咪好估佢唔到呢！
「初次接觸，傳來陣陣誘人的荔枝果香；淺嚐，帶有魅力的焦糖麥牙甜味；細味，強烈的回甘令人欲罷不能；餘韻，花椒辛辣更表現女性的堅強」樽身後嘅介紹喺咁樣描述，當然，唔同人口味唔同，飲出嚟嘅感覺亦會有所不同，但相信絕對俾到驚喜大家。既然小弟都無試過支啤酒，就唔再多講，留待大家評評自己嘅感覺。
此外，樽身仲貼有支啤酒嘅出處，原來「城釀」（City Brewery）喺一位香港女仕所開設，百分百本地製作，為要釀製出具本土味道嘅啤酒，實在值得支持！
凍焦糖拿鐵 $30（冷熱同價）
始終店家以手工啤為買點，所以，對其他飲品自不然唔會把太大期望。雖然點嘅喺拿鐵，即鮮奶咖啡，但外觀較似意式泡沫咖啡多啲，將面層嘅焦糖漿攪勻，整體味道算喺唔錯，咖啡嘅味道頗醇香。
順帶一提，餐廳設最低消費，但都只不過喺每人要點一杯飲品、一份美食或一個套餐，所以，可以講都唔算有咩最低消費。能唔能夠做到久負盛名，長時期都保持到好名聲，只要食物做得出色，服務招呼熨貼到位，一定唔喺難事。綜觀今日嘅體驗，食物既用心製作，又有水準，手工啤酒款多夠特別，環境輕鬆，服務又好，點菜時店員都會提供適當嘅介紹，所以，覺得佢哋可以越做越好！
個人評分
味道：9/10
環境：8/10
服務：8/10
抵食：8/10
平均每人消費：HK$150
味道：9/10
環境：8/10
服務：8/10
抵食：8/10
平均每人消費：HK$150
餐廳資料：
Doodie Cafe Bar
荃灣富華街9號運通洋樓地下
2468 0110
荃灣富華街9號運通洋樓地下
2468 0110
沒有留言:
發佈留言