太子小廚餐廳 Prince Kitchen：近在子尺

因為茶記「太子小廚餐廳」就晌老婆所返嘅教會附近，可謂近在咫尺，所以，晌嗰區算喺幾經常幫襯嘅餐廳。不過，食物質素又唔喺話非常突出，勝在碟頭大，故食嘅次數多，但點嘅都喺常見嘅碟頭飯呀、午餐呀之類，值得寫嘅真喺無乜。

之前嘅食評都交待咗好多餐廳嘅資訊，所以，今回就唔多提，環境無變，嘢食嘅款式都無變，變嘅都喺價錢漲咗啲。

兩年前嗰篇食評寫快餐賣嘅價錢為$37 / $40，依家都只喺變為$40 / $44，同樣共有5款選擇，仲附送埋例湯或啡茶。不過，今次個蒸魚真喺幾得，所以，先手痕痕寫番一篇。

豉汁蒸魚飯 $40

都話過依度碟頭大，可真唔講得笑，碟飯差唔多有3碗飯咁滯，所以，點一個快餐，加多碟灼菜已夠我哋兩公婆一餐午飯。而快餐甚少見有蒸魚，多數喺散點嘅碟頭先有，而蒸魚喺原條上，底下仲墊有唔少豆腐，個豉汁落足料，好惹味，條魚又蒸得恰到好處，肉質嫩滑，同埋以豉汁蒸魚豉油撈飯，一流啦！

奶茶

跟餐棄例湯而揀奶茶，因為茶記嘅奶茶真喺寧捨好飲，茶底既芳香馥郁，質感又幼滑如絲！

腐乳通菜 $15

灼菜都喺啲大路嘅選擇，如菜芯、生菜等等，揀通菜，配腐乳相對好哋啲。而已，啲通菜喺啲水通，幼細啲，爽身啲。

兩個人平均唔使30蚊食一餐，而且，又要好食兼健康嘅，晌依個時勢，唔喺度度都可以搵到。

個人評分
味道：7/10
環境：6/10
服務：7/10
抵食：9/10
平均每人消費：HK$28

餐廳資料：
太子小廚餐廳 Prince Kitchen
葵涌青山公路432號至436號A1至B1舖
2481 2234