Deer Kitchen 鹿湖小館：鹿續有嚟

嚟觀塘廠廈食飯都唔喺第一次，不過，朋友未試過，所以，帶佢嚟「廠」吓。其實，依家晌廠廈發展飲食，都已經可以講喺頗成熟，仲遍地開，觀塘、九龍灣、新蒲崗、荔枝角、大埔、火炭、柴灣、香港仔……，到處都有。Deer Kitchen，位處較近地鐵嘅年運工業大厦1樓，晌巧明街有後樓梯直達餐廳，無其他較上樓嘅餐廳咁尋幽探秘。

餐廳原來仲有個中文名「鹿湖小館」，如果唔喺入咗嚟，真喺以為佢賣中菜。

由門面，到餐廳內部，都一室以白色為主調，近門口位，更有唔少以鹿為題材嘅雕塑及掛畫，明顯店主應該幾喜歡小鹿。而再往室內走，裝修簡潔樸實，完全唔會覺得自己身處廠廈當中。

翻一翻餐牌，除晚市套餐（1人或2人），散叫嘅分類就包括：沙律、前菜、小食、薄餅、意粉、意大利飯、主菜及飲品。以廠廈嘅餐廳而言，無論晚餐，抑或散點，定價都算屬中高價位，喺咪物有所值就視乎味道上嘅分野。

意大利香草包

先上場喺一小份嘅意大利香草包，雖然香草味唔算好重，但包身非常鬆軟有回彈力，沾一點兒黑醋，已經喺一餐唔錯嘅前奏。

廚師沙律（晚餐）

晚餐嘅前菜有沙律、香芒他他及意大利雲吞，諗住沙律較易一齊分享。沙律菜配上黑橄欖、車厘茄及羊奶芝士，拌黑醋汁，落得足料，沙律菜好爽脆，但芝士味道較濃，亦有少許偏鹹。

西洋菜忌廉湯 $45

是日餐湯竟然用上西洋菜，雖然叫「西洋」菜，但小弟真喺未想過搵佢做嚟做西湯。入口都打得頗滑溜，又帶少少粗纖維，西洋菜嘅味道突出而唔會太古怪，效果比想像中好。

蒜片辣椒脆蝦薄餅 $130

雖然店家無定位喺賣邊個國家菜系，大抵概括叫賣歐陸菜吧，但從餐牌所見，似乎偏向意大行菜，又試試佢哋啲薄餅掂唔掂？

見到依款薄餅有隻鹿仔標誌就知喺廚師推介，薄餅做成長方形，一開六，「餅乾」底，入口脆到不得了，應聲脆開，正；而餅面同樣鋪上茄醬同芝士做餅底，香濃好味，大蝦做咗層脆漿，加入蒜片同辣椒，已向店員問可唔可以減辣，做成一隻辣椒程度，但辣度依然唔少，卻喺好惹味刺激，蝦肉爽口，不愧為推介。

法式慢煮油封鴨脾 $248（晚餐）

照睇字面，鴨脾應該先慢煮，後煎封，故鴨脾咬落肉質十分嫩滑，單以刀叉已輕易拉出絲絲鴨肉，又充滿油香，做得有水準。不過，伴菜個人就覺得唔太理想，薯仔切成片，但炸得比較油；翠玉瓜切絲太過幼細，失卻佢本身帶脆嘅口感，喺整道菜美中不足之處。

鮮奶咖啡 +$10（晚餐）

杯咖啡無乜點拉花，感覺應該唔會太專業嘅沖調，還好嘅喺至少唔喺機沖，都有打奶泡，攪勻後口感尚算綿密芳香，只喺細滑度唔均勻。

藍莓水果茶 $40

店內有數款水果茶，但估唔到水果茶喺咁大杯，雖然話藍莓，但本身加入咗唔少水果，所以，烏龍茶中滲出濃濃果香，反而，令藍莓味變得唔突出。

忌廉湯同個薄餅都睇得出廚師花過心思去創作菜式，做食飲，真喺少啲心機都唔掂，晌依個年代，唔可能單靠一、兩味走天涯，聽店員講佢哋都不時換款，新菜式會陸續有嚟。店員招呼殷勤，主動幫我哋換咗幾次碟。餐廳最近仲做折扣推廣：身分證號碼有6字就有折，一個6字9折，兩個6字8折，三個6字7折，小弟身分證號碼有兩個6，叫做慳唔少架！

個人評分
味道：8/10
環境：8/10
服務：8/10
抵食：7/10
平均每人消費：HK$215

餐廳資料：
Deer Kitchen 鹿湖小館
觀塘巧明街119-121號年運工業大厦1樓B3
3706 5298