中村藤吉 Nakamura Tokichi：村越時空的美味

前文提要下，同老友晌Chibee Chicken and Beer尖沙咀新店嘆完炸雞同部隊鍋之後，意猶未盡，近近哋嚟到中村藤吉（外賣店）再嘆番杯軟雪糕。事後先知佢哋嘅新店啱啱晌美麗華商場開幕，不過，只打算食杯軟雪糕，其實邊間都無所謂。

之前睇唔少食評都話要排幾個鐘先一嚐其美味，香港人就一向喜歡趕朝流，部分人目的就喺要打卡、呃讚。今晚嚟到，唔好話要排，直情睇啱買乜都唔使同人逼、同人爭，補充一句，此時此刻喺星期三晚9:00pm，只有三幾組客，個個都只喺買雪糕，連其他產品都無乜點留意吓（包括小弟），一心只喺慕名試試其抹茶雪糕。

收銀機前嘅兩個餐牌，就印齊多款凍熱茶品及雪糕（抹茶 / 焙茶 / 混合），詳細就唔抄一次，睇相清楚晒。況且，雪糕更有仿真模型做參考，更一目了然。

宇治金抹茶 + 焙茶軟雪糕 $53

心理上，梗喺兩溝着數啲。個窩夫筒夠巨型，又脆口，不過，軟雪糕就唧得唔算滿，雪糕尖緊緊到筒邊嘅高度，而且，一送到上手已經有啲溶溶哋嘅狀況（註：感覺室內喺夠冷氣嘅），幸而，雪糕柔滑細膩，既有奶香，又有兩種茶味，抹茶味甘苦而細緻，焙茶味甘香有餘韻；紅豆蓉亦都清甜不膩，綿綿有紅豆清香，兩粒白玉丸子軟糯好食，唔會得糰粉，煙韌有咬口，沾上雪糕，更添滋味。

小弟非抹茶控，亦唔多崇尚名牌，不過，都幾喜歡食雪糕，今次只試咗佢哋嘅軟雪糕，當然對其甜點嘅了解未夠全面，但喺，$53一杯始終都唔喺平，只可以偶一為之嘅清涼甜點。但講到抹茶依一種味道，真喺有一種穿越時空嘅感覺，歷久不衰。

個人評分
味道：8/10
環境：7/10
服務：7/10
抵食：7/10
平均每人消費：HK$53

餐廳資料：
中村藤吉 Nakamura Tokichi
尖沙咀彌敦道118號Mira Mall地下G06號舖
2426 6111