是夜，同親友到訪，聚聚舊兼睇睇分店嘅水準如何，猶記得晌太子店所品嚐嘅豬手，的確唔錯。店內環境比太子店大，裝修簡約，以白與藍色為主調，配點閃亮嘅壁燈同水晶吊燈，周圍擺咗啲特色擺設，頗別緻，加上樓底高，空間感足！
近門口，仲做咗個5人特色「挪亞方舟」位，不過，個人覺得得意就得意，但又無話多咗私隱，坐入面中間位出入都有啲唔方便。
散叫餐牌包括頭盤、小食、蛋糕、意大利飯、意大利麵、主菜等類別，種類較為偏向意大利口味，不過主菜類就集多國大成。店員仲解釋意大利飯、意大利麵一欄，俾$118就可以將$58嘅菜式變為套餐，而俾$128就可以將$68/$73嘅菜式變為套餐，即喺多咗餐湯、沙律、甜品及餐飲，頗划算。
另備有晚餐選擇，包餐湯、沙律、主菜、甜品及餐飲（$118-$208），喺散叫嘅主菜類都揾到相同菜式，問過店員，兩者份量一樣，再比較一下，都喺相差$10就有晒套餐配套，故此，我哋都點套餐，感覺喺最抵食。
此外，+$15可配各式特飲，+$25可配花茶一壺，+$25更可將是日甜品換成任何$50以下之甜品，實在有吸引力。
順帶一提，仲有一個全日早餐餐牌，3款唔同配搭嘅全日早餐，已包一杯橙汁，定價唔貴，都喺$78-$98，全日任何時候都有得供應。
南瓜忌廉湯
先送上是日餐湯，喺南瓜忌廉湯，色澤比較偏向橙黃，應該喺落忌廉多之故，再試試幾口，就更加證明到喺咁，因為口感非常順滑，但南瓜味就算唔上好突出。
麵包籃
餐包用上港式西餐或茶記常見嘅甜餐包，雖然，有種熟悉、懷舊嘅味道，入口又微暖且軟熟嘅口感，不過，落晌依度，感覺總喺有啲拉低咗檔次嘅感覺。唔喺話個包唔好食，只喺好似晌高級中菜館食緊碗車仔麵咁啫。
田園沙律
其實晌太子店時都有寫低以下評語：「賣相略嫌普通咗，大路啲嘅加粒車厘茄，如果高檔兼精緻啲加嚿意大利乾蕃茄，咁又會唔會好好多呢？」，所以，沙律菜加咗油醋汁，味道雖然清新，但都只不過喺做到最基本而已。
主菜共有7款選擇，有意大利飯、肉眼扒、豬手、天使麵、牛仔肋骨、羊膝及豬鞍，親友想食肉，所以篩走意大利飯及天使麵，肉類中，以牛仔肋骨及羊膝嘅醬汁口味較有特色，所以，就選依兩道為我哋嘅主菜。
柚子蜜燒焗厚切美國牛仔肋骨 $178
果然厚切，兼好大條牛仔肋骨，再配上豐富嘅薯菜，有蕃茄、珍珠筍、秋葵同炸薯角，份量肯定喺十足十，如果唔轉嘢飲，又唔轉甜品，百幾蚊包咁多嘢兼主菜大大份，的確抵食。柚子蜜燒焗咁嘅製作都喺第一次試，其實，有啲似BBQ時搽蜜糖，不過，多咗一層柚子味，感覺都唔錯，而牛仔肋骨肉質都軟腍，燒焗得幾香口。
巴黎式紅酒慢煮紐西蘭羊膝 $178
慢煮羊膝喺好期待嘅菜式，一大件紐西蘭羊膝配以薯菜，伴薄荷醬（店家仲有提供芥末），非常養眼，不過，同期望有啲落差，因為一般嚟講，慢煮菜式肉質都會好腍滑，但落刀嗰一下已覺得有啲實。其實，個紅酒汁味道真喺唔錯，芳香醇和，但入口又唔可以講喺嚡，但就有啲「實淨」嘅感覺，羊羶味唔太犀利，相信大部份人都接受到。
玫瑰鮮奶咖啡 +$15（正價$35）
焦糖 、榛子味嘅鮮奶咖啡飲得多，玫瑰味就較少，仲記得晌旺角嘅Doux飲過一次，記憶中喺一杯好正嘅咖啡。今晚可以再次重溫，杯咖啡一樣做得好好，事後問過店員，都預咗喺利用玫瑰糖水，但除玫瑰味突出之外，咖啡的確醇香，奶泡跟濃縮咖啡融和均勻，依個講求沖論調手勢，唔使攪，第一口到最尾，口感一致。
拖肥朱古力咖啡 $35賣相上，拉花做得好細緻，而親友話奶泡發得好，口感圓滑，拖肥味非常香，不過，有點偏甜，但嗌得「拖肥」，都預咗會喺咁，所以，又接受到。正如食馬卡龍會好甜，唔會話佢過甜而唔好食，依樣喺佢嘅特性嘛。
甜品餐牌好手作仔，製作感覺有啲迤，如果加點色彩會好啲。內裡共有4款選擇：綠茶白朱古力慕絲蛋糕、檸檬撻、冧酒朱古力蛋糕及雪糕咖啡（Affogato）。
檸檬撻 +$25（$32）
值得加錢轉嚟一試嘅甜品，因為比起一般嘅慕絲蛋糕，件檸檬撻做得有個性，撻餡口感柔軟，酸香細緻，又唔會有過酸嘅毛病，檸檬香味好清新。
Affogato +$25（$48）
一客有兩個雲呢嗱雪糕球，再配小量咖啡甜酒及一小杯特濃咖啡，倒埋一齊就成為依道美味甜品。滔一羹沾滿甜酒及咖啡嘅雪糕放入口，香濃帶微微酒意，真喺好正；食到尾，雪糕溶入晒甜酒及咖啡中，猶如咖啡奶昔，滋味盡嚐。題外話，餐牌中嘅Affogato好似串錯字！
整體上，菜式嘅水準都屬於平穩，尤其甜品及飲品一環，我會俾得高分啲。不過，仍有改進空間嘅地方，例如：餐沙、沙律、餐包，雖然話依啲好濕碎，但「第一印象」都好重要，因為，有啲人好被先入為主嘅感覺所影響。
個人評分
味道：7/10
環境：8/10
服務：8/10
抵食：8/10
平均每人消費：HK$240
味道：7/10
環境：8/10
服務：8/10
抵食：8/10
平均每人消費：HK$240
餐廳資料：
Cafe Paradise
長沙灣長沙灣道638號地舖
3709 8103
Cafe Paradise
長沙灣長沙灣道638號地舖
3709 8103
沒有留言:
發佈留言