Picoso：墨墨耕耘

講起墨西哥你會諗起乜？仙人掌？墨西哥闊邊帽？辣椒仔？晌開飯網查一查，專賣或兼賣墨西哥菜嘅餐廳大概有40多間，數量唔算少，但睇番小弟嘅足跡，原來都只喺到訪過中環嘅Mr Taco Truck，但都已執笠咗，真可惜。今夜，走訪荔枝角廠廈，程班長實在太多人等位，倒不如試試隔離家墨西哥小店「Picoso」。

小店門面已睇得出佢喺賣墨菜，因為大大樖仙人掌及墨西哥帽，而入到店內裝修都幾骨子，一室木條牆身，掛有唔少墨國嘅相關物品，就連餐紙都用上火辣辣嘅紅色，富中美洲風情又唔講得，但就輕鬆自在。

雖然小店，但餐牌製作又幾認真，簡單嚟講，類別方面包括頭盤、主菜、沙律、甜品，但頭盤中，其實有唔少不同口味嘅墨西哥栗米脆片，而主菜裡，有數款墨西哥捲餅，都喺較具墨西哥特色嘅美食。不過，無圖文並茂就少咗份參考，因為幾款捲餅都好相似，一下子都睇唔到其分別。佢哋唔收加一，抵讚，但年輕嘅店員都招呼得落力，只喺經驗淺啲，有啲細節位就忽略咗。

有食物嘅餐牌，卻無飲品餐牌，因為選擇唔多，晌晒餐廳尾嘅雪櫃度，自取後同店員講聲就可以喇。一般汽水$8罐，果汁能量水$12支。

朋友要罐玉泉嘅「檸檬+C」（$8），小弟就揀咗支電解質飲品「橙味維他命水盈」（$12），感覺有少少似以前飲過嘅橙味得力素。最搞笑出門口時，見隔離間整餅材料店都有得賣，仲$10支添，有啲打對台嘅感覺。

牛油果醬配玉米薄脆 $42

先點一客粟米脆片，邊食邊傾，晌超市都有好多依類墨西哥粟米脆片買，但賣點喺店家嘅自家製鮮牛油果醬，有咩成份晌餐牌中都有列明，包括：牛油果、洋蔥、芫茜、辣椒、鮮青檸汁，所以，入口味道複雜有層次，集多種味道，食起嚟叫人好醒神。

特色蟹餅 $52

如果蟹餅整得好，喺一道好好味嘅菜式，點一客試試睇佢做成點。一客有兩件蟹餅，炸得金黃，又無話油淋淋，伴有沙律菜、青檸及一小兜千島醬，不過，就唔喺餐牌寫嘅煙椒青檸醬。

切開睇睇，裡面混有唔少蟹肉，仲有洋蔥、青椒等配料，蟹肉好鮮甜，咬落外脆內軟，果然幾有水準。

烤牛肉大捲餅 $78

無論喺烤玉米餅皮、大捲餅、玉米餅皮卷或炸餅皮包，主要都喺以烤牛肉、煙燻手撕豬肉及烤雞肉為口味，而大捲餅揀咩口味，款款都賣$78。以墨西哥玉米餅捲住烤牛肉絲、玉米粒、新鮮烤洋蔥、雜椒、碎芝士、豆蓉，再晌成品搽上牛油果醬、蕃茄沙沙及酸忌廉，另配上紅蕃茄醬及黑豆。

咪睇佢樣好似細細件，但真喺唔講得笑，捲出嚟嘅成品大件而墜手，斤兩十足，裡面塞滿餡，一啲虛位都無，烤牛肉又落得無手軟，口感豐富，味道紛陳，惹味得嚟又有少少清爽感；再加上面層放啲牛油果醬、蕃茄沙沙，食得更滋味，反而，啲紅蕃茄醬好似有啲多餘，落唔落都無緊要，至於啲黑豆，我當喺就咁食。

煙燻手撕豬肉炸餅皮包 $80

好似大捲餅咁，無論揀咩口味，價錢歸一，款款都喺賣$80。依次就揀煙燻手撕豬肉，一樣捲餅內塞滿玉米粒、新鮮烤洋蔥、雜椒、碎芝士及豆蓉，唯一唔同嘅喺包好後再炸一炸，跟住淋上牛油果醬、蕃茄沙沙、酸忌廉，同樣配紅蕃茄醬及黑豆上枱。

炸餅皮包比起大捲餅確喺有一朕朕脆口感，不過，都只喺輕輕面面一層，除此之外，同食大捲餅差唔多。之但喺，個煙燻手撕豬肉個人覺得比烤牛肉好食啲，唔單惹味，煙燻味令豬肉更有個性。

朱古力布朗尼 $42

朋友喺甜點死粉，唔食過甜品難解心癮，小弟對甜品就一樣歡迎之至啦。布朗尼入口暖暖哋，朱古力味超香濃，口感微微濕潤軟身，喺有水準嘅出品，只可惜無加入合核啫，卻伴有士多埤梨、藍莓，及跟一球雲呢嗱雪榚。

廚師晌廚房內默默耕耘，睇得出小店用心做菜，況且，墨西哥菜對大部份港人唔陌生，卻又唔熟悉，而且，相類似嘅餐廳唔多，相信佢哋應有一番作為。

個人評分
味道：7/10
環境：7/10
服務：8/10
抵食：8/10
平均每人消費：HK$160

餐廳資料：
Picoso
荔枝角長沙灣道883號億利工業中心1樓101室
2743 8004