因為都不止一次到訪依一類餐廳，所以，知道呢啲餐廳好有一種別有洞天嘅感覺，入到餐廳內每每偶有驚喜。今次到訪嘅Lava Java就稍稍唔同，因為佢位處一幢商廈，由地下大堂至上樓鋪面，都比較新簇，少咗一份尋幽探秘之感。不過，內裡嘅環境則一樣睇出裝修富心思。
甫踏進店內，以為好細只得眼前所見嘅地方，仲無客添，原來，走到水吧位前轉彎一睇，嘩！真喺柳暗花明又一村。
另一邊區域空間極大，廠廈 / 商廈普遍樓底高，加上枱櫈嘅佈局散落其上，無話租金貴而排到盡，所以，整個環境予人空間感強，有一份悠揚輕省之感。再者，一室木系嘅裝修，木地板、木枱、木櫈，配以少少植物（擺放多啲感覺仲正），坐晌度齋飲杯咖啡，感覺都已經好悠閒。
其實，餐牌嘅封面已大致上話咗俾你知，有啲咩菜式類別，咖啡、漢堡、三文治、甜品、飯麵、沙律、蛋糕、意大利麵及各式飲品，如好多咖啡店餐廳常有嘅。
當然，細看內頁，發覺選擇不少，比較值得留意，喺當中嘅意大利麵類、飯類及主菜類，均可以升級變為套餐，加配頭盤 / 餐湯 / 沙律 / 甜品，玩法如下：
+$25可選一款
+$45可選兩款
+$65可選三款
+$85可選四款
食多食少，彈性相當大，而且，轉為套餐後仲奉送咖啡或茶一杯，簡單打個譬喻嚟講，其實+$25就已經可以變成多個餐湯加杯熱飲，晌度飲杯普通咖啡都$22啦。不過，我哋賽後檢討，真喺唔需要升級晒4樣嘢，因為食埋主菜實在太飽，而頭盤、沙律、甜品可以共享，每人升級兩或三款都夠晒。
+$45可選兩款
+$65可選三款
+$85可選四款
食多食少，彈性相當大，而且，轉為套餐後仲奉送咖啡或茶一杯，簡單打個譬喻嚟講，其實+$25就已經可以變成多個餐湯加杯熱飲，晌度飲杯普通咖啡都$22啦。不過，我哋賽後檢討，真喺唔需要升級晒4樣嘢，因為食埋主菜實在太飽，而頭盤、沙律、甜品可以共享，每人升級兩或三款都夠晒。
順帶一提，餐廳設最低消費，不過，門檻都喺好低啫，每位客人最少幫襯一杯飲品或一份食品，而晚上6:00pm後需加一服務費。
套餐嘅頭盤喺3揀1，有田螺焗酥盒、芝麻三文魚卷及煙三文魚碟，以頭兩款感覺較為有特色，我諗普遍人都會揀依兩道作為重點選擇。
一口法式田螺焗酥盒
田螺焗酥盒一客有兩粒，啱啱好我哋兩個都有得試，個酥皮盒算做得幾鬆脆甘香，喺底位有丁點硬，而田螺肉都幾大粒，面層加咗少少芝士焗，鹹香好食。
芝麻三文魚卷配蜜糖芥末子汁
同樣又喺一客有兩年，三文魚喺刺身素質，沾滿芝麻，油潤中芝麻香爆發，而三文魚卷下就喺自家調嘅蜜糖芥末子汁，既有芥末香，又有蜜糖嘅清甜，令三文魚更鮮。
野菌忌廉湯
湯品亦有三款選擇：羅宋湯、野菌忌廉湯及是日餐湯，表姨甥女揀野菌，小弟偷試一口，菌香果然濃郁，仲帶少少微細菇菌粒，夠晒真材實料。另外，所伴嘅芝麻包，包身鬆軟微暖，且充滿芝麻香味。
周打魚湯
而是日餐湯就喺周打魚，雖然賣相平庸咗啲，但味道真喺唔錯，個質感頗柔滑，湯底似有啲魚鮮味。補充多句，兩客湯份量都好足，其實以套餐而言，細碟啲我都覺得無問題。
沙律類唔使心多多，因為就喺只有兩款，兩個人嚟就自不然各揀一款，兩款咁就試勻晒。
日式芝麻油田園沙律
田園沙律以沙律菜、青瓜薄片、車厘茄為基礎，雖然唔喺咩特別食材，但勝在夠新鮮，沙律菜同青瓜都非常爽脆。而沙律個亮點喺個醬汁，芝麻味極為香濃，稀杰度唔唔好，唔會太漿口，又唔會太稀水汪汪。
煙三文魚凱撒沙律
要形容個凱撒沙律就喺簡單，卻做得認真，因為啲羅馬生菜沾滿均勻醬汁，不多不少薄薄一層，無多餘嘅汁醬，灑上去嘅煙肉碎又切得幼細，麵包粒既乾且脆，所以，個凱撒沙律底已做得好有誠意。而煙三文魚油潤帶微微煙燻香，整體屬高質素出品。
軟殼蟹南瓜汁扁意粉 $118
主食先揀咗個扁意粉，因為配軟殼蟹及甜品嘅南瓜汁都頗特別。軟殼蟹炸得甘香唔油膩，軟軟嘅蟹殼總覺得好有趣；扁意粉口感咬口，煮得啱啱好，每條麵條都掛滿南瓜汁，着實唔錯，個汁南瓜味幾足，個人認為再做薄身少少，稀少少，就更合心水喇。
烤羊扒 $183
扒類可配薯菜、意粉或飯，好彩揀咗薯菜，因為之前嘅頭盤、餐湯、沙律夾夾埋埋都唔嘢少，而個扁意粉又份量十足，所以，薯菜比飯麵都輕省啲。先講個賣相，擺得靚仔，最欣賞喺佢將啲薯條另以小杯裝晌中間，一來令賣相別出心裁咗，二來啲條薯無跟其他食材放埋一齊，變得無咁易咁快變腍。
講番啲羊扒，一客有3支扒，我哋都一同認為質素甚高，煎得外層焦香，內裡卻保持肉嫩軟腍，肉汁充盈，少少羊羶，超好食；一般食羊都配薄荷醬，但佢哋就改以黑醋奉客，但個黑醋調校得好好，質感稠密，略帶甜味，所以，唔會好嗆喉，卻有種酸香平衡肉膩嘅效果。
芝士蛋糕
跟餐甜品有兩種選擇，就喺芝士餅同意式奶凍，而芝士餅本身都有4款口味：原味、朱古力、藍莓及咖啡4款，選咗咖啡味，做成雲石面，賣相幾靚。雖然，芝士味幾濃郁，又有咖啡香，不過，唔知喺咪放晌雪櫃耐，口質感較硬同乾身，口感打咗折扣。
意式奶凍
可選草莓或奧利奧餅碎，我哋選後者，做成小型盆栽樣，不過，個人認為個奶凍奶味未夠重濃，入口似杏仁豆腐嗰種質感，經驗覺得喺魚膠多，忌廉少；再者，純個人口味嘅問題，跟奧利奧餅碎唔喺太夾 。
飲品好多選擇，咖啡、沙冰、特色朱古力、梳打特飲、多種茶類，就連紅白酒、啤酒，近年大熱嘅手工啤都有。而跟餐嘅餐飲，亦設有飲品升級優惠，就喺半價優惠配其他無酒精飲品。其實Lava Java點解？無問過店員，但查字典，Lava解熔岩，有借用為火山、岩石，而Java可以指地方名「爪哇島」，亦能解作咖啡，故餐牌中都有幾款飲品都以此為名，如岩石咖啡（Java Jelly Coffee）、火山咖啡沙冰（Lava Frappe）、岩石啫喱沙冰（Java Jelly Frappe）、火山朱古力（Lava Chocolate）……等等，不過，小弟還是鍾情鮮奶咖啡，哈哈！
焦糖咖啡 +$16
單點原價$32，依家跟餐就變為半價享用。雖然，非主要以奶泡嚟拉花，但杯咖啡一樣製作得咁靚，入口醇香綿滑，比一般焦糖味重，當然啱我依等焦糖死粉啦。
龍貓朱古力 +$20
單點原價$36，補$20就可以轉配，賣萌嘅佢一定受表姨甥女睛睞，口味可以揀薄荷或焦糖，但寫到明星期一至六2:30-9:30pm供應，午市做唔徹依啲花時間嘅手作仔，所以，想試就要避開晏晝飯市。表姨甥女話一入口薄荷味都幾出，面頭嘅朱古力醬攪勻之後，整體甜度會增加咗，薄荷味便稍稍平衡番啲，當然，個龍貓公仔一定喺加分位。
臨走時，店長仲介紹埋佢哋啲午餐俾我睇，每日11:00-14:30供應，包是日餐湯、附送啡茶，主菜A-G共有7款，定價$68-$96，無加一。晌附近返工嘅工友，又可以多一個食晏食好嘢嘅選擇！
由頭盤到主菜，都表現得好出色，甜品一環出現點回落，但兩杯飲品都有水準，而且，服務都真喺幾好，好多細節位都跟足，如換碟、刀叉、一道菜接一道菜上枱……等等；再者，環境令人感到舒服亦都好重要。整體而言，睇得出店主佢哋都花咗唔少心思，可以講對佢哋搞咖啡室嘅熱誠不「熔」置疑。
個人評分
味道：8/10
環境：8/10
服務：8/10
抵食：8/10
平均每人消費：HK$280
味道：8/10
環境：8/10
服務：8/10
抵食：8/10
平均每人消費：HK$280
餐廳資料：
Lava Java Cafe & Restaurant
觀塘開源道71號王子大廈5樓B室
2111 1466
Lava Java Cafe & Restaurant
觀塘開源道71號王子大廈5樓B室
2111 1466
沒有留言:
發佈留言