Spade by Lassana晌油塘大本型商場之內，一搭扶手電梯上返地下層就喺，非常易搵。由於店鋪晌商場大堂，空間感十足，唯生意難做，枱椅編排得較密集喺香港好多餐廳嘅現況。近窗一邊喺落地玻璃，景觀開揚，喺理想位置之選，可惜依日好多客，可謂坐滿全場，費事等得太耐，有位都照殺。整個環境以白色為主，睇落應該以窗邊嘅梳化櫈就最好坐，有得挨又有得枕手，我哋都好，被安排坐晌有得挨嘅通花白櫈。
今次嚟嘅目標好清晰，就喺佢嘅英式下午茶，有鹹點，有甜點，包兩杯飲品，都喺$148（平日仲只賣$99），咁嘅價錢去邊度搵，怪唔之得十枱有七、八枱客都喺試佢個英式下午茶。其實，又的確好抵食，以往晌Lassana旗下餐廳飲杯咖啡都幾十蚊啦，依家仲有十多件鹹甜點，感覺好似半賣半送咁。
英式下午茶 High tea set $148
等咗大概10min，三層架嘅英式下午茶就徐徐送上，跟門口嘅相片無咩落差喎，每一層嘅白瓷碟都刻有暗花，令個下午茶顯得更高雅。整個下午茶共有7款食物，每樣兩款，每一層都有鹹點及甜點互相配搭，真喺交足功課無欺場。考慮到部份食物嘅特性，講究少少嘅話，個人就覺得先食少少鹹點先，如蛋沙律牛角包，因為擺得耐唔太好，蛋沙律會濕潤咗個牛角包，其次，試個雲呢拿雪糕會喺常識，因為再唔食就怕佢溶晒；之後鹹甜鹹甜間住食會幾有趣，至於個馬卡龍最好留到最後，因為馬卡龍一向都喺偏甜，一早食會影響食其他甜嘢嘅味道。依個都只不過喺小弟個人心得，其實食法可以好隨意。
底層（士干、迷你煙三文魚熱香餅、焦糖布甸）
士干無配到果醬，若需要可向店員索取，士干個質感都OK，唔會太乾；煙三文魚熱香餅的的骰骰，煙三文魚鹹香油潤，襯熱香餅效果唔錯；焦糖布甸晌焦糖漿襯托下極富蛋味，口感又軟滑。
中層（蛋沙律牛角包、雲呢拿雪糕）
牛角包一向喺Lassana嘅自家高水準出品，香脆鬆化富牛油香，內裡除咗有蛋沙律之外，仲加入少少爽脆沙律菜；雲呢拿雪糕又喺佢哋自家出品，軟滑清甜。
上層（迷你士多啤梨果撻、馬卡龍）
士多啤梨果撻，一口一件，撻皮都幾鬆化，而士多啤梨唔算好甜，但配合埋柔滑嘅吉士，都收貨喇；馬卡龍嘅味道喺無得隨心揀，我哋分配到嘅味道喺藍莓及香橙，入口外層脆脆，再咬入去就煙煙韌韌。
雜莓果醬窩夫 $68
曾經食過佢嘅「野莓盛會」蜜糖丹麥吐司，真喺值得推介，不過，今次唔食蜜糖丹麥吐司，想試試佢嘅窩夫，同樣，揀番以野莓做主題嘅雜莓果醬窩夫。一客有4件窩夫，並以一球雜莓雪糕及新鮮雜莓作伴碟，淋上士多啤梨漿，色澤嬌紅搶眼，賣相誘人。窩夫做得幾鬆脆，沾一點雪糕及雜莓，一啖放入口，無比滋味，雜莓嘅酸香及雪糕嘅酸甜，晌口腔內迴繞。
鮮奶咖啡
Lassana嘅鮮奶咖啡始終喺小弟心水，今次我杯拉咗雙重心形，心中有心。水準無走樣，單單聞一吓，醇厚嘅咖啡香味；唔使加糖，更加唔使攪勻，入口已經集柔滑、香醇、均勻嘅口感。而表姨甥女杯仲正，拉咗熊仔俾佢，非常可愛。
雖然，唔及酒店級幾百蚊一位嘅高茶咁樣樣都精細別緻，招呼則優質貼心，但一邊品嚐唔同嘅味道，一邊呷着高水準嘅咖啡，間唔時嘆吓高茶，更何況只喺百幾蚊已喺兩人份，確喺幾寫意嘅享受。
個人評分
味道：8/10
環境：7/10
服務：7/10
抵食：8/10
平均每人消費：HK$80
味道：8/10
環境：7/10
服務：7/10
抵食：8/10
平均每人消費：HK$80
餐廳資料：
Spade by Lassana
油塘高超道38號大本型地下G28號舖
2346 0828
油塘高超道38號大本型地下G28號舖
2346 0828
沒有留言:
發佈留言