咪以為鋪面窄窄就認定佢地方細細，入到去先知個鋪位好深長，仲有埋樓上，真喺別有洞天，只喺枱櫈排得有啲逼，依樣都成為好多香港餐廳嘅特色。店名叫得Metal，就大概估到佢裝修都喺以此為題，水泥地，枱櫈都喺重金屬格調，不過，聽朋友講喺立食，但入到去周圍都有位坐，唔使擔心企足成餐飯，但絕大部份都喺高腳枱櫈，只喺二樓有一張6人平常高度嘅餐枱。
點餐方面其實好簡單，睇睇近門口個大餐牌燈箱，有咩肉類供應，揀啱種類，向廚房師傅講聲，再要求食幾重，講埋幾多成熟，師傅即切即磅，好似超市買肉咁，打張「飛仔」俾你，拎去櫃枱埋單，之後，自然有店員將燒好嘅肉送上。
當晚所見，有6款肉類供應：紐西蘭牛柳扒、安格斯西冷扒、安格斯肉眼扒、佐賀A4西冷扒、佐賀A4肉眼扒及西班牙黑毛豬鞍扒，每款都以200g起計。此外，怕淨食扒寡得滯，又可以另加$30變成「套餐」，會多咗一客沙律、一碗餐湯及一碗白飯。
佐賀A4和牛西冷 $1.9 / g
我哋點咗250g，切出嚟都差不多（256g），色澤粉嫩嬌紅，油花分佈平均，唯一被佢搵笨咗喺件扒黐住一大嚿肥膏。西冷送到嚟熱力逼人，除西冷，有少少蒜片吊味，又有洋蔥、粟米及露筍作為伴菜，但個人覺得伴菜普通，尤其粟米，好唔方便食，因為枱上只有刀叉。
單講件扒，的確甚具質素，肉汁豐富外，充滿油香及炭火香，肉質亦都軟腍，不過，秤出嚟要成$486一客，就實在唔平。
西班牙黑毛豬鞍扒 $1.2 / g
點咗一客牛，另一客就點豬鞍扒，因為喺豬鞍，要一支支咁秤，一支大概150g左右，所以，起計要最少點兩支，況且，我哋兩個人，點兩支就可以一人食一支唔晒煩點分，秤出嚟兩支鞍淨重318g，本應要$381，啱啱遇着做半價，真走運。由於喺豬肉嘅關係，無諗過要幾多乘熟，但據店員介紹，依一款西班牙黑毛豬可以食得好生，最好就喺3乘，問我哋夠唔夠膽試，如果到時覺得唔OK可以再幫我哋燒番熟啲，我哋又真喺膽粗粗試咗3乘熟。
兩件豬鞍扒，塗上一片香草牛油，將豬鞍切開，色澤比件西冷更嫩紅，外層燒得香脆，內裡唔單止肉汁豐盈，肉質比想像中更嫩滑，入口又唔會有種好生嘅感覺，唔知喺唔喺心理作用，好似有微微橡果味添。兩款扒，小弟較喜歡後者嘅豬鞍！
食扒小弟就偏向食原味，所以，甚少沾任何汁醬，不過，店方都好花心思，為客人準備多款汁醬：柚子味噌、忌廉芥末、蘋果洋葱汁、雜果黑醋、芝蔴醬，仲有岩鹽同黑椒碎，全部放晒晌枱上任君選，讓客人打造最適合自己嘅口味，想試勻晒都無問題。當然，食扒都喺油膩啲，雜果黑醋會喺個人心水。此外，店舖仲提供紙圍裙，掛在牆上讓人客自由取用，刀叉、紙巾亦放晒向枱上，自助方便。
「套餐」嘅白飯唔多熱，只喺微暖，口感亦有啲硬，再者，鋸扒配白飯都唔喺太夾，整一球薯蓉仲好；沙律喺普通嘅沙律菜加啲油醋而已，而餐湯是夜喺普通嘅粟米忌廉湯，粟米味幾濃，但打得唔滑，亦唔夠幼細，質感有啲粗。所以，除非你好想有啲飯、湯到肚，否則，個人都唔太建議加$30加配依個配套。
菠蘿汁、蘋果汁 $21
本想試佢個咖啡，但賣晒，所以，要咗一罐菠蘿汁，友人則要一罐蘋果汁。味道都幾像真，唔會只喺糖水咁甜，我嘅菠蘿汁幾濃郁，幾清甜。
由於服務幾自助形式，所以，感覺頗為無拘束，啱後生仔，唔似上扒房或高級餐廳咁拘謹，相反就可以話無咩服務可言，但店員態度有禮，又耐心講解。之但喺，抽風實在有需要改善，店內只靠幾部分體式冷氣打出強風，吹到我都頭暈，相反，抽風未見好有效果。
個人評分
味道：7/10
環境：6/10
服務：6/10
抵食：5/10
平均每人消費：HK$375
味道：7/10
環境：6/10
服務：6/10
抵食：5/10
平均每人消費：HK$375
餐廳資料：
Metal Steak
中環歌賦街41號地下
2338 2828
Metal Steak
中環歌賦街41號地下
2338 2828
沒有留言:
發佈留言