餐廳位處堡壘街，雖然好少嚟北角區，但之前都到過「素食．份子」，所以，對依度都好有印象。據朋友介紹，因為店家由集團經營，強大後盾，可以入到靚貨。環境設計頗有特色，兩隻飛龍在天，有氣派，又以竹竿做成天花，充滿中國色彩之餘，又甚玩味。
上班日子總有人要遲啲嚟，叫住啲冷盤食住先，邊食邊等，而店內嘅餐前小食不乏特色。
藥膳醉乳鴿 $58
錯過咗老友點嘅冰鎮豬手（$58），但有機會試試個醉乳鴿，入口酒香而帶點藥材味，乳鴿肉質細嫩，味道不俗。
酥炸魷魚鬚 $68
炸得甘香可口，蘸點醋，可去走油膩感，再者，粉漿唔算好厚，外層酥酥脆脆。
川汁貓耳皮蛋 $48
貓耳即喺雲耳，撒上大量芝麻，淋上微辣帶麻嘅川汁，爽脆惹味；而皮蛋採用金黃皮蛋，晶瑩剔透，的確少見，然而，跟食一般常見嘅皮蛋又唔會太大分別。
我哋人多，點夠兩個窩，顧及唔同人嘅口味，點一款貴氣嘅翅鍋，另一款就較平實嘅粥鍋。
翅群白玉滑雞鍋 $198
雖然魚翅唔啱我，但呷一啖湯底都好香甜，雞件亦都嫩滑，底下嘅冬瓜清甜，未烚嘢食，個湯鍋本身都好正。
潮式米水鍋 $248
咪以為個粥鍋就會相對清啲，原來粥水內有條大鮮魚，令個鍋底鮮甜，有點驚喜，個鍋亦可棄魚選蟹。雖然話喺鍋底，但亦可以當粥咗先食，仲伴上油炸鬼、洋蔥和生菜絲。
跟住就進入烚吓烚吓嘅打邊爐時段，所以，順便介紹醬料，有沙嗲醬、蒜蓉、紅椒、辣醬、蔥花、金蒜粒、麻醬等，任由客人自由組合，茶芥及醬油費$15位已包，所以，心態上唔「混醬」吓好似好蝕底。
火鍋配料分為海產類、招牌牛肉、肉類、丸類、餃子類、蔬菜及麵類，亦有一啲特色推介，以及另備多款海鮮刺身。
頂級雪花肥牛 $188 / 例、$268 / 大
牛肉類點咗兩款，頂級雪花肥牛要一客大份嘅，每片切成長形，方便涮幾涮啱啱好一啖吞晒。單喺賣相油花分佈平均，色澤鮮紅，已然感到質素上乘，一片入口，滋味無窮，皆因肉味濃，質感柔軟，油香豐足，真喺吸引得一片接一片。
邊抓位 $268 / 例、$328 / 大
邊抓位印象都喺第一次試，一份例牌都唔少，有一大碟，色澤同樣鮮紅，但就無咁多油脂。烚過後，牛肉一樣腍滑，但食落多一分咬口。
水魷魚 $68
海產類揀咗幾款試試，水魷淥咗好耐都唔會點縮水，食落好彈牙好爽。
養顏花膠筒 $78
一客有唔少件，花膠筒最啱女生們，小弟都烚番件，入口柔韌得嚟有咬口，而花膠筒本身無乜味，所以沾少少自製混醬就覺得鮮味啲。
日本蟹棒 $58
唔喺溝粉嘅貨色，所以，放入鍋底中烚得耐，會好易散，故此，輕涮一下就食得。
眾所周知，依家打邊爐，家家店都各出奇謀，樣樣都期望做到人無我有，人有我優。喺點菜紙上，以及牆上嘅電子壁報，都有介紹幾款「特色推介」，喺一般火鍋配料嘅升級版，如墨魚丸加鵝肝，肉餃加入黑松露醬……等等，睇落都已經好吸引。
黑松露餃 $98
外觀同一般嘅乜餃物餃無咩分別，都喺啲豬肉、蝦肉包成，不過，除咗自家包製，餃面無撲粉，食落細滑之外，肉餡加入黑松露醬，肉餡咬落既鬆化彈牙，亦散發出陣陣幽香，香氣撲鼻，令人回味。
鵝肝墨魚丸 $88
好簡單，就喺手打爽彈嘅墨魚丸內，釀入鵝肝粒，自家手打故然入口彈牙，不過，鵝肝咁樣烚一烚，烚熟咗咁，好似缺少咗份豐腴感。
嘩鬼蝦條 $68
同意食友嘅見解，酥炸成為小食，總好過放湯烚用嚟打邊爐，因為油條部份涮過之後變腍，失去油條香脆嘅特性。
玉簪蝦丸 $88
唔止個名改得靚，賣相都好睇，以手打蝦丸為基礎，插入金華火腿條、甘筍條、露筍條同西芹條，令口感多添幾分爽脆，味道多添幾分層次，再者，蝦丸的確爽彈蝦味足。
蟹粉福袋 $22隻 / 兩隻起
外形討好包得漲卜卜嘅福袋，其實喺蟹肉、蟹粉、豬肉所做成，始終蟹粉佔得唔多，所以，算唔上味道好突出，不過，始終用料豐富，又富湯汁，食味不俗。
脆炸響鈴 $48
試咗唔少特色嘢，都揀啲大家心水，響鈴喺其中之一，店員解釋由於喺新鮮即炸，所以，需久候一點。響鈴放入湯中輕灼，既酥脆，又帶少許湯汁，好味。
炸魚皮 $48
同為自家製作，唔用來貨，所以，食得出有水準，一咬卜卜脆，又甘香，放湯灼又得，當小食淨食都得。
唐生菜 $32、娃娃菜 $32
打邊爐點蔬菜喺最唔划算，因為，啲蔬菜本身平，又無乜功夫要做，但賣嘅價錢又唔平，都喺鋪租、人工嘅反映，但成餐飯無菜落肚又唔得嘅。
竹蔗茅根水 $28
講到打邊爐，唔喺飲汽水，就喺飲涼茶。竹蔗茅根就夠清熱下火，自家製，竹蔗、茅根、馬蹄、紅蘿蔔，真材實料無欺場，冰涼清甜度，順喉解渴。
椰汁西米糕 $26
真喺估佢唔到食火鍋有泰式甜品供應，皆因同集團有泰國餐廳。糕內有西米、栗粒，口感豐富，又有濃濃椰汁香味。
雪沙香芒卷 $24
即喺香芒糯米糍，外皮煙糯有咬口，裡面捲住大大件芒果肉，鮮甜好味，又撒滿椰絲，椰香處處。
其實，店內仲有刺身及好多海鮮產品，但因為消費高，而其他火鍋料都好夠滿足我哋喇！
烚吓烚吓，邊烚邊傾，邊傾邊食，同老友們暢所欲言，渡過一個愉快晚上，兼且收到唔少小禮物，真喺多謝各位成日分甘同味嘅好食友。
個人評分
味道：8/10
環境：7/10
服務：8/10
抵食：9/10
平均每人消費：HK$270
味道：8/10
環境：7/10
服務：8/10
抵食：9/10
平均每人消費：HK$270
餐廳資料：
金功夫點心火鍋 Kung Fu Deluxe Dim Sum Hot Pot
北角堡壘街6-8號華康大廈地下B舖
2802 2888
金功夫點心火鍋 Kung Fu Deluxe Dim Sum Hot Pot
北角堡壘街6-8號華康大廈地下B舖
2802 2888
沒有留言:
發佈留言