稻香超級漁港 Pier 88：不無稻理

舊年家族嘅冬至飯晌依間稻香搞，平平哋二千零蚊一圍全包宴，質素意外地唔錯，話過可能會翻兜，果然，今年中秋飯「冧莊」再嚟過幫襯佢。

中秋對香港人嚟講，都算大節日，酒家分兩輪，兩輪都有九乘幾滿，就喺因為無爆足，所以，我哋食頭輪，坐到8:30pm都無趕我哋走。

今次嘅全包宴稱為「迎月慶團圓」，比上次嘅冬至飯仲要平$200，一圍全包只喺$2,188，包茶芥連加一服務費，汽水6罐及指定啤酒2支，提前落訂每席減$200，我班師奶親戚就一定攞盡依啲優惠啦！

鴻運乳豬全體

菜式其實嚟嚟去去差唔多，大同小異。打頭陣唔喺乳豬，而喺個伊麵，不過，方便啲就跟番個酒席次序咁寫。乳豬仔燒得都外皮脆卜卜，皮下脂方亦唔多，算唔錯。

上湯虎蝦伊麵

啲茨汁多到有少少似食湯麵，哈哈，而虎蝦跟人頭數，俾足12隻，又幾爽口，個汁又幾夠味。

翡翠花姿珊瑚蚌

同上次一樣，又喺以蜜糖豆配襯，炒得爽甜，而花姿口感軟腍，珊瑚蚌幾爽口，比起上次嘅象拔蚌口感覺好啲。

紅燒海皇雞絲翅

成為「無翅之徒」後，除素翅外，都無再食其他翅類菜式。故此，個雞絲翅只可以講做得有板有眼，質感睇落亦唔錯，味道就唔知嘞。

清蒸花尾龍躉

舊年用上「珍珠」龍躉二字，今年無埋，不過，睇番呎吋就知都喺嗰隻貨，但都有3斤重左右。其實，條魚喺連炒飯、壽包都食埋先最尾送上，差啲以為漏單，侍應解釋喺廚房蒸唔撒。咁我都寧願佢蒸得有心啲，唔好急就章，講番條魚，都鮮甜細嫩，蒸得剛好。

蠔皇金錢扣玉掌

「金錢」（冬菇）大隻厚身，甚有睇頭，而且又夠茹香味；至於鵝掌扣得好腍，蠔汁茨亦都好濃郁，比上次好無咁杰。

當紅穗香雞

即喺脆皮炸子雞，我成日覺得啲師傅日日炸唔知幾多隻，只要啲雞嘅質素唔差，師傅又無失準，應該都好穩陣。所以，隻雞食落外香肉滑，喺做到基本，入口唔會太油，就可以加啲分。

蟲草花鮮菌浸菜苗

素菜大雜會，話就話菜苗，心諗會唔會豆苗？梗唔喺啦，喺成本平一截嘅小棠菜，不過，「雜菜」一大碟，配上上湯，其實平衡吓咁多肉類，都屬於幾好嘅安排。

回味家鄉炒飯

個名都喺「求其」改嘅啫，唔喺話有咩特色嘅炒飯，都喺肉粒，蝦仁，跟醬油炒埋一碟，勝在平穩，飯粒炒得乾爽，收貨㗎啦！

南山桃包

一如過往，甜點唔喺糖水，而喺蟠桃包，熱辣辣送到嚟，大家都即該一人挑一個，趁熱食，包身鬆軟唔黏牙，白蓮蓉軟滑少甜，無失準喎！

稻香質素眾所周知，只喺中下位置徘徊，時好時壞。不過，卻喺經常坐滿客，不無道理嘅，就喺勝在平，兩千銀唔使一圍，唔需要預備，唔使煮，更唔使洗，坐得舒舒服服，仲想點？

個人評分
味道：7/10
環境：7/10
服務：7/10
抵食：8/10
平均每人消費：HK$165

餐廳資料：
稻香超級漁港 Pier 88
長沙灣發祥街10號李鄭屋商場301號舖
8300 8171