除咗小弟，原來當中都有舊同學嚟過，所以，大家都建議咗一啲心水菜式，再加啲炒飯、甜品，就已經OK。
四小拼（脆鱔、烤麩、小排骨、肴肉）$102
喺小弟山嘅心水推介嘅冷盤前菜，一來可以一次高試到多款冷盤，二來脆鱔真喺好特別。賣相樣衰嘅脆鱔入口脆卜卜，酸香開胃；小排骨如平常食到嘅糖醋骨，肉質倒算做得鬆化；烤麩軟綿而吸滿醬汁，食落煙韌咬口；肴肉晶瑩的骰，口感爽滑。
魚籽煙燻蛋 $18 / 隻
專登點嚟推介比舊同學試試，因為真喺做得有水準及心思，金黃蛋黃半凝半黏，蛋香濃郁而溏心效果突出，蛋白爽口彈彈，蛋黃濃香而略帶煙燻味，賣相吸引，食味又好。
蘿蔔絲酥餅 $42
舊同學嘅指定美食，一客有3隻，當然要叫多籠先夠分。酥餅面面沾滿芝麻，入口自然酥脆之外，就多添一份芝麻香味，而內裡填滿蘿蔔絲，絲絲清甜。
砂鍋雲吞雞 $176
一窩例牌份量啱啱好夠我哋7個人飲，仲人人有滿滿嘅一碗。雞湯底色澤清澈，味道香濃清潤，歸根究底都喺啲金華火腿起作用。有雞、有雲吞食，又有湯飲，好滿意嘅一道湯水。
松仁糯香牛肉粒 $86
個人而言，依道牛肉粒喺是晚驚喜，唔喺話佢好食到飛起，而喺個配搭上估唔到又幾得喎。牛肉粒一貫滬式炒法，比較醬濃味香，特色在於加入松子仜及上海年糕粒同炒，惹味之上，多咗唔同嘅口感。
松子黃魚 $172
因為松子黃魚賣相吸引，往往都引到客人點選，同學就喺依點建議叫咗一客。黃魚嘅鎅花如以往唔算好分明，但淋上橙紅嘅甜酸茨汁，其實已經好吸晴，而且，外酥肉嫩，茨汁甜酸恰到好處，整體而言，已收貨。
乾煸四季豆 $68
蔬菜類菜式都喺由同學揀，揀嚟一道乾煸四季豆，亦喺小弟心水。四季豆乾煸得夠乾身，但仍有份爽口感，少少肉末、芹粒，口感豐富咗又惹味。
黃金炒飯 $76
今次無叫個麵，一心介紹依個得色炒飯俾同學試試。以蝦仁、牛展粒、鹹蛋黃跟飯粒同炒， 特別在又加入咗黃薑粉，所以，既好食又有少少食療之效，飯粒炒得分明，的確鹹香可口。
豆沙窩餅 $45
雖然喺老式嘅上海甜點，但同學喜愛豆沙，況且，一客切成8小件，又確喺方便人多分嚐。餅皮炸得金黃，入口香脆唔油，內裡填滿豆沙，清甜好味。
香蕉高力豆沙 $45
一客4個，個個近乎拳頭咁上下大，粉糰做得漲卜卜，入口非常軟熟，內裡夾雜香蕉與豆沙，香蕉較少，豆沙就落得無手軟，綿滑滋味。
黃金南瓜餅 $40
同樣一客4件， 南瓜餅炸得金黃，色澤均勻，入口軟綿煙糯有咬口，最欣賞喺唔黏牙，淡淡南瓜味，襯清甜豆沙，掂！
茶錢$6位，連加一，埋單每人$160左右，食咗咁多嘢，都算合理，難得一班舊同學仔都一致讚好，安排唔錯。
個人評分
味道：8/10
環境：8/10
服務：8/10
抵食：7/10
平均每人消費：HK$160
味道：8/10
環境：8/10
服務：8/10
抵食：7/10
平均每人消費：HK$160
餐廳資料：
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833
沒有留言:
發佈留言