天糧烘焙 La Vie：天賜糧緣

今個中秋，前後試過3款傳統嘅白蓮蓉月餅，包括同事帶返嚟嘅「美心」雙黃白蓮蓉，客人送嘅「夏宮」迷你蛋黃白蓮蓉，以及晌屋企附近個商場消費滿指定金額送嘅「明愛天糧包餅店」雙黃白蓮蓉，查實就無心插柳，因為都唔喺去買啲乜嘢，只喺去睇跌打，客戶服務處話乜單都計，咁就當然換一個嚟試試都好。

天糧烘焙（La Vie）喺佢哋正式嘅店名，記得以前晌荃灣有過分店，雖然，月餅內內附卡片，亦有個店鋪地址，話晒小弟都住晌葵青區，一睇就多多少少知道唔喺門市，因為喺荔景對上嘅半山位置，印象中應該喺明愛嘅服務中心。卡片印有網址，有興趣上去瀏覽一下，就知佢哋喺以社企營運模式經營健康麵包製作業務，為弱能人士創造就業及職業培訓機會，協助融入社區生活。

講番個月餅，紫色外盒，形象較西化，盒面除印有店名La Vie，仲有Love, Care, Share三個英文字，正正代表佢哋嘅理念。咪以為佢哋喺社企或只喺弱能人士，就以為啲質素會「求求其其」，唔單止月餅嘅外觀做得似模似樣，用料亦唔馬虎，餅皮搓得薄，白蓮蓉清香軟滑，鹹蛋黃更漏晒油，油水十足，絕對比美起一啲大品牌或酒店出品。

如果以今年所試過嘅3款白蓮蓉月餅比較，小弟就最喜歡天糧烘焙嘅出品，值得投佢一票，不過，佢哋唔做門市，將來再試，只有隨緣！

個人評分

味道：9/10
環境：- /10
服務：- /10
抵食：- /10
平均每人消費：HK$0（商場禮品）

餐廳資料：
天糧烘焙 La Vie
新界葵涌荔枝嶺路31號地下低層（非門市）
3187 5800