不過，估唔到星期五晚嘅上環都仲喺咁靜，我哋約晌7:00pm餐廳見，只得一枱客，到8:00pm先叫做旺啲，但都唔夠五乘滿。其實，個場都幾大，裝修走摩登而優閒嘅路線，深啡襯白，而且，又正正晌上環地鐵站之上，交通方便，唯可惜周遭大多數都喺寫字樓，又唔喺傳統搵食旺區，一入夜就變得好靜！
據朋友介紹，Cedele賣點喺以天然健康嘅食材，無添加，製作出創意無限，又健康美味嘅食物。從餐牌嘅細節位上，都睇得出佢哋嘅心思，如採用有機咖啡豆，提供一系列養生茶，意粉可揀全麥意大利粉……等等。
散叫餐牌中嘅菜式種類，大致分為：全日早餐、前菜、主菜及意粉、漢堡包及三文治、香烤肉主菜沙律、穀物、飲品、甜品。當然，最划算喺揀全日套餐，所有套餐都包配精選餐湯或田園沙律及養生茶或凍茶一杯，又可以+$10轉為有機咖啡一杯，而+$20可享用手工蛋糕一件。基本上，分咗3個套餐類別：
全日早餐套餐（$128），任選一客全日早餐；
全日素食套餐（$138），任選一客素食菜式；
全天候套餐（$158），任選一客主菜、意粉、漢堡包、三文治、香烤肉主菜沙律或穀物。
全日素食套餐（$138），任選一客素食菜式；
全天候套餐（$158），任選一客主菜、意粉、漢堡包、三文治、香烤肉主菜沙律或穀物。
合桃蘋果湯
是日嘅精選餐湯有2款：磨菇忌廉湯、合桃蘋果湯，因為我哋揀其中一款沙律作為套餐主食，所以，套餐就棄田園沙律而揀餐湯。磨菇忌廉湯較常飲，所以，挑合桃蘋果湯試試。餐湯嘅稀杰度啱啱好，入口有淡淡合桃味滲出，但蘋果味就欠奉，總之，都感覺到好輕怡。
香煎雞扒合桃沙律配香橙全穀芥辣醬 $110（散點價）
沙律菜入口爽脆，而合桃碎既脆且香，雞扒煎得香口，肉質又幾軟腍，配以特別嘅香橙全穀芥辣醬，令個沙律整體味道又真喺變得幾有特色，酸酸甜甜辣辣，味道幾有變化得嚟有啲唔同層次感。
香煎海鱸魚拼海蝦咖喱配有機糙米飯 $130（散點價）
穀物類有兩款選擇，一款有機糙米飯，另一款喺意大利飯，最正路就梗喺揀有海鮮貴價啲嘅香煎海鱸魚拼海蝦咖喱配有機糙米飯啦，依個亦喺廚師推介菜式。咖喱帶有少少馬來風味，滲出唔同香料味，中等辣度，唔會太過搶走鱸魚同海蝦嘅鮮味，而鱸魚、海蝦都好鮮味，鱸魚仲煎得外脆內嫩；個糙米飯貨真價實，無乜溝入白米，正擔心會唔會入口好硬，食落比想像中軟身，淋上咖喱汁，令飯粒粗獷中多添辛香惹味。
黃薑帶子拼海蝦意粉 $130（散點價）
意粉類揀嚟另一款廚師推介菜式黃薑帶子拼海蝦意粉，意粉可選扁意粉、長通粉或全麥意大利粉，以最後者未試過，所以，改為全麥意大利粉，而意粉個外觀呈淺啡色，但味道及口感又似乎跟一般嘅意粉又唔喺好大分別，但心理上就會覺得健康啲。帶子加入少少黃薑粉去煎，所以，晌鮮甜以外，有微微黃薑味，順帶一提，海蝦都去咗殼，方便客人食用。
主菜食完，就喺甜品時段，跟餐加多$20就可以點一件手工蛋糕（正價$40-$45），除咗餐牌上恆常依4款外，晌近門口嘅餅櫃，仲有唔少其他款式或本周精選。不過，老友推介嘅鎮店招牌斑蘭椰子蛋糕喺必然之選，另一款「紅絲絨」蛋糕亦非常感興趣。
Pandan Coconut Cake $40（散點價）
件斑蘭椰子蛋糕賣相無乜花巧，好平實，但味道絕對見真章。中間嘅斑蘭海綿蛋糕，雖然斑蘭味唔喺好重，但質感綿密富彈性，而中間夾有一層椰子吉士漿，軟滑清甜，入口又唔會太「漏」，加埋外層沾滿烘焗過嘅金黃椰絲，東南亞風味更突出；此外，面層及邊位喺斑蘭忌廉芝士，帶點鹹味，打得挺身而軟滑，入口即溶，不愧為招牌，最好就喺用叉由上而下一軋為一小件放入口，鹹甜交替好有層次。
Red Velvet Cake $40（散點價）
另一款紅絲絨蛋糕賣相都好平實，白色外層喺原味忌廉芝士，芝士味濃郁，口感柔滑，而上下兩層蛋糕加入菜汁而成，所以一身艷紅，質感濕濕潤潤，不過，味道唔太顯眼有咩蔬菜味，而中間夾層喺加有朱古力碎嘅雲呢拿忌廉，整體而言，質素唔錯，但對比起件斑蘭椰子蛋糕，鍾意後者多啲！
有機南非草本茶 $28（散點價）
養生茶共有5款：南非草本茶、博士紅茶、薑茶、香茅茶及洛神花茶，除後3者知道喺乜，前兩者就唔多認識，所以，餐飲小弟就揀南非草本茶，據店員介紹喺啲保健茶，有寧神安眠、舒緩神經、預防中風……等等功效，不過，好似小弟咁一年都無一杯落肚，效用自然好有限。味道又喺點呢？入口甘甘哋，有種草香味。
整體服務不過不失，始終今晚人客唔多，所以，上菜、添水都做得到位，唯一挑剔喺友人嘅意大利泡沫咖啡味道有點怪，雖然，店方都唔介意換過一杯，但事後解釋話同事錯落咗兩份嘅濃縮咖啡嚟沖調，不過，我哋則認為就算落多一個份量都無理由個味道咁怪，實情會喺點我哋就再無考究。
個人評分
味道：8/10
環境：7/10
服務：8/10
抵食：8/10
平均每人消費：HK$175
環境：7/10
服務：8/10
抵食：8/10
平均每人消費：HK$175
餐廳資料：
Cedele
上環德輔道中199號無限極廣場地下G08號舖
2581 0808
Cedele
上環德輔道中199號無限極廣場地下G08號舖
2581 0808
沒有留言:
發佈留言