蝦叔叔大尾蝦酥 Uncle-Shrimp：熱爆登陸酥蝦仔

日本以外，台灣嘅伴手禮堪稱花樣百出，層出不窮，總會聽到好多朋友去完台灣電玩，就會買唔少手信返嚟。講到台灣手信，你會諗起咩呢？鳳酥？豬肉紙？牛軋糖？定太陽餅？今日嚟到HK Brewcraft率先品嚐「蝦叔叔大尾蝦酥」依一款新興嘅台灣零食產品。

點解揀晌HK Brewcraft搞發佈，事必有因，啤酒配原隻炸蝦零食，喺咪諗起都覺得好襯呢？依道啤酒款式多到不得了，更有好多手工啤，不過，啤酒唔喺小弟嘅強項，評酒就留番俾啲資深嘅飲酒人喇。

今次嘅發佈會可謂簡單而鄭重，因為有創辦人阮雋詠先生親臨會場，唔單止為大家介紹「蝦叔叔」嘅來歷，更親手以大尾蝦酥弄咗兩款創意小食，甚有趣味，所以，大尾蝦酥唔止零食咁簡單。

蝦叔叔大尾蝦酥，據介紹喺嚴選台灣雲林縣口湖鄉嘅新鮮白蝦，原隻經高科技嘅低溫真空慢炸而成，低溫、真空目的可令炸油不易變質、氧化，更無任何添加劑，兼低脂、含豐富甲殼素、蝦紅素、維生素、礦物質與高蛋白等營養物，真喺睇佢唔出少少一隻蝦咁厲害。

淨食果然好酥脆，咬落咯咯聲，而且，幾有蝦香味，咪睇佢閃爧爧，食落出奇地毫無油膩感，作為零食，好易食唔停口；餸啤酒更加唔使講，實喺好朋友。而HK Brewcraft揀嚟幾款啤酒：Meantime Yakima Red、Tuatara Pilsner、Hitachino Nest White Ale都喺精挑嘅配搭。

至於阮先生整嘅創意小食，以大尾蝦酥剁碎，加點蔥花、自家調配嘅醬汁，配日式豆腐及溫泉蛋，令豆腐及溫泉蛋都多添一份脆脆口感，兩者都夾得到喎。

除咗食之外，「蝦叔叔」仲有好多周邊產品，例如：帆布袋、咕𠱸、鴨舌帽、大毛巾，全都印有蝦叔叔嘅標記。

蝦叔叔嘅香港官網（Uncle-Shrimp.com.hk）將於6月8日正式起動，到時上網睇睇就可以了解更多，以及進行訂購。蝦叔叔大尾蝦酥（盒裝），每盒零售價定為$198，內裡有10小包，每包註明淨重25克，大概有10隻大尾蝦酥左右。

嫌上網得個「睇」字，蝦叔叔將會以Pop Up Store形式發售，第一站將於6月5日及6日（6pm ‑ 10pm）晌中環PMQ元創坊夜市擺賣，之後第二站6月7日（11am ‑ 7pm）會晌西貢市集跟大家會面，跟住嘅第三站6月20日及21日（12pm ‑ 7pm）會晌赤柱市集出現，想試吓佢嘅滋味，就千祈唔好錯過。

個人評分
味道：8/10
環境：- /10
服務：- /10
抵食：- /10
平均每人消費：HK$0（新品發佈活動）

餐廳資料：
蝦叔叔大尾蝦酥 Uncle-Shrimp
香港官網 Uncle-Shrimp.com.hk