睇睇餐牌，菜式類別幾似幾年前去過晌油麻地嘅瀛素食，有齊壽司、壽司卷、手卷、刺身、小食、沙律、天婦羅、小菜、中式粉麵……等等，尤其啲「日本扮嘢大菜」系，要三文有三文，要鰻魚有鰻魚，應有盡有，幾可亂真，唔知兩間會唔會喺姊妹店？加埋姨仔三個人，點個壽司卷，加個主菜，一個麵，一個飯就夠晒皮。臨尾仲有啲位，一客糖水，滿足而回。
環境比起瀛素食好好多，雖然裝修簡單，毫無花巧，但無咁逼，又光猛。不過，我哋未夠7:00pm好早到，唔知點解無安排坐晌一入門口個大廳（當時唔太多客），反而轉咗入另一邊個大廳，但咁樣仲好，安排咗最入嘅一張枱，少啲騷擾。
牛油果軟殼蟹卷 $38
一客有4件，賣相幾精緻，壽司卷捲得紮實，內裡有乾海草蘸粉漿炸成嘅軟殼蟹、青瓜、甘筍絲，咬落嗦嗦聲之餘，仲有點點鹹鮮味；而面層鋪上牛油果及唧上胡麻沙律汁，飯粒又夠黏糯，認真好食。
印式咖喱羊腩煲 $58
有句諺語叫唔食羊肉一身羶，今次就啱啱相反，食咗羊肉都唔會一身羶，皆因啲羊腩都喺豆製品，雖然無羊羶味，但口感就「似層層」，講賣相真喺似模似樣。個印式咖喱幾好味，唔算好有層次，勝在夠香，又加入大量蔬菜做配料，可以話喺個健康咖喱煲仔菜。
上湯金菇雲吞湯麵 $42
依個湯麵比較平淡無奇，一客湯麵有4隻素雲吞，不過，包法似水餃，內裡都喺啲素肉同筍絲，湯中有啲金菇、西芹、紫菜，不過不失，還好喺麵條幾爽，又無乜梘水味。
日式咖喱豬扒蛋包飯 $68
又喺幾可亂真之作，一整塊吉列豬扒，入口真有食豬扒嘅感覺，況且，外層脆漿加麵包糠，做到甘香鬆脆，明知喺素，都過足癮; 此外，蛋皮煎得好薄好薄，炒飯飯粒分明又唔油，配上帶微甜嘅香濃咖喱，果真連味道都扮嘢十足。唯一要挑，喺無咗餐牌圖中嘅薯仔，咖喱配薯仔，喺老友嘅組合。
腰果露 $36
雖然甜品唔多，但腰果露同核桃露原來喺依度嘅名物，好多客都會餐後點一客嘆吓。是晚賣晒核桃露，腰果露都無所謂，分一窩（$68）同一盅（$36），但見隔離枱叫一窩實在太大，點知一盅都唔少，勉勉強強都夠我哋3個享用。腰果露質感幼細香滑，腰果味突出，有份貨真價實嘅實在感，甜度比一般街外淡少許，但啱晒我老婆。
連埋茶芥$5位及加一，埋單唔使三嚿水，好划算嘅一餐，招呼亦都唔錯，值得推介俾朋友。如果仲想食得抵啲，下午茶時段（3:00pm-5:00pm）嚟一定抵爆，星期一至五有五折，而星期六、日、公眾假期亦有六折。
後記：老婆成日問我食素慣唔慣，其實，食乜都無問題，再者，又唔喺一日三餐都素，總之佢鍾意食嘅，咪佢負責找素，到時我負責找數咪OK囉！
個人評分
味道：8/10
環境：7/10
服務：8/10
抵食：9/10
平均每人消費：HK$95
味道：8/10
環境：7/10
服務：8/10
抵食：9/10
平均每人消費：HK$95
餐廳資料：
櫻之滙素食料理 Meet At Sakura Veggie
太子荔枝角道104號地下
2392 2386
櫻之滙素食料理 Meet At Sakura Veggie
太子荔枝角道104號地下
2392 2386
沒有留言:
發佈留言