牛車水餐廳 Kreta Ayer Restaurant：我的星期六美孚早餐 ~ 牛油唔喺咁用法

牛車水嘅「名氣」應該好多美孚街坊都知，中伏率無100，都喺中簽率高，所以，都甚少幫襯。睇番啲食評，對上一次幫襯已經喺2012年嘅事，嗰次喺難得一次唔錯嘅食下午茶經驗，此外，亦晌度食過晚飯，個人嚟講，都OK啦。趁著星期六唔使返工，又可以偷懶唔煮，出街同老婆落街食。

牛車水雖然標榜話賣馬來食品，但同港式茶記無分別，睇睇佢個早餐餐牌，根本就喺茶記，故此，相信嚟食早餐嘅中伏機會應該相對細。

環境唔多講，只喺對照番以前嘅相，裝修無點變，但就換過晒啲櫈，感覺光鮮咗，此外，又估唔到原來都有幾多街坊幫襯，目測都應該有八乘幾滿，同埋，人嘅流轉好快。

牛奶麥皮配生菜吞拿魚三文治 $28

先送上牛奶麥皮，皆因一早煲定晒，麥皮份量都幾多，真喺一大兜，對比番隻水杯就知有幾大碗，老婆話淨喺食個麥皮都夠佢飽呀，結果，麥皮佢食咗3/4碗，三文治亦只食半份，剩低嘅又喺由小弟包底。估唔到啲麥皮幾滑，味道有少少偏甜。

除生菜吞拿魚三文治之外，依個餐仲有另一個選擇，可選配火腿蛋三文治。份三文治吞拿魚落得好足，不過有啲偏濕，落得太多沙律醬去撈吞拿魚；此外，三文治正中間有一大撻牛油，一般整三文治喺為咗防止啲濕嘅食材整濕啲麵包變得唔好食先搽薄薄一層牛油，而唔喺撻一嚿牛油落去囉，可見嗰位師傅做得好迤。正正老婆唔多鍾意食太多牛油，所以，佢對件三文治嘅印象麻麻！

啲牛油唔喺咁樣搽法

火腿蛋菠蘿油 $23

雖然喺一份變相嘅「三文治」餐，但個餐本身其實都幾抵食，菠蘿包夠大個，煎雙蛋加埋火腿。

不過，有少少可惜喺菠蘿包唔熱，包面又唔脆，而且，塊牛油好細塊（咪睇佢突咗出嚟），真喺無晒菠蘿油嘅神髓。之所以，索性將個菠蘿包當餐包咁用，將啲牛油搽開，再夾隻蛋入去，雖然蛋就細隻咗啲，但煎到仍留有蛋漿，咁先令個包變得好食。

餐飲：熱檸水、熱奶茶

小弟杯熱奶茶，茶底夠香，只喺口感唔算好滑，無對佢啲奶茶抱有期望，所以，我都收貨嘞。

依次嘅早餐，好就一定唔喺啦，但差亦唔算，不過，如果有心做，一定可以做得更好，因為以上描述嘅問題都喺好易解決到！自從幾年前開始，我倆星期六都唔使返工，就定咗依日出街食早餐（其他日子都會晌屋企食），所以，就有「我的星期六美孚早餐」輕鬆食評系列，記錄我倆嘅輕鬆時光！

個人評分

味道：6/10
環境：7/10
服務：8/10
抵食：8/10
平均每人消費：HK$26

餐廳資料：
牛車水餐廳 Kreta Ayer Restaurant
美孚美孚新村萬事達廣場1樓
2338 2171