Paul Lafayet：法國五月・新寵甜點

每年嘅「法國五月Le French May」都喺藝術與飲食界嘅盛事，貴為知名法式甜點糕餅店嘅Paul Lafayet，就晌依個法國五月天推出兩款新甜品，小弟有幸掹住食友衫尾，嚟到今晚嘅發佈活動，聽着店主嘅講解，以及率先品嚐新品。

晌門口望見餅櫃內一列又一列嘅甜品，琳瑯滿目，目不暇給；除法式甜品，馬卡龍亦喺佢哋嘅招牌主打，兩者晌質素上無庸置疑，可謂無得點輸。

而馬卡龍嘅口味比其他店特別多，亦喺眾所周知，大大話話都有近20款之多，每粒售價$20。故此，除餅櫃見到嘅散買之外，仲有多款唔同份量嘅禮盒裝。

言歸正傳，講番是晚嘅VIP之夜。靚仔店主親身上陣，講解一下新出品嘅成份、用料及製作，讓大家品嚐時能有更深嘅體會。

Verrine $45

以杯裝形式登場嘅Verrine，分為士多啤梨味及芒果味，喺一款好有層次嘅甜品。

Mango Verrine

由下而上喺幾款唔同口感嘅甜點組成，有芒果慕絲、芒果果蓉、馬卡風芝士，放上面喺金寶粒，加多單邊半件芒果馬卡龍，所以，賣相好有層次。無論慕絲，抑或果蓉，都充滿芒果嘅香甜及芳香，而馬卡風芝士輕柔軟滑而散發淡淡芝士味，配合上金寶粒嘅酥酥脆脆，令整道甜品口感多變。

Strawberry Verrine

另一款口味嘅Verrine，基調一樣，同樣喺富層次嘅製作，只喺由芒果換上士多啤梨，味道由香甜變成酸香，再加上半件紅桑莓馬卡龍外殼，讓悶納嘅五月天更添清爽。

Cognac Tart $45

朱古力類嘅甜點一向喺「賣飛弗」，單喺賣相，精細嘅牛奶朱古力慕絲唧花，平滑嘅鏡面朱古力表層，加上片片金箔，夠晒雅氣。朱古力嘅撻殼，內裡填滿柔滑嘅牛奶朱古力慕絲，而半球體朱古力漿之下原來喺招牌嘅法式燉蛋，當然唔會有焦糖，卻滲出點點干邑酒香，實在有個性，非常好食。

Macaron

一口氣品嚐咗3款馬卡龍，當中深啡色嘅Grand Marnier更喺新出品。青綠色嘅開心果味馬卡龍，睇見就讓人有種心情開朗嘅感覺，開心果味唔算超濃郁，但感覺嚟得自然；而荔枝味馬卡龍，一紅一白嘅外表，有一份少女嘅可愛，荔枝味突出，並且帶有蜜香清甜。

至於新品Grand Marnier，小弟暫譯佢為柑曼怡口味，喺干邑橙酒嘅一種，朱古力跟橙酒做甜品，唔喺咩新鮮事，做成馬卡龍一樣好味。再者，佢哋啲馬卡龍一向做到外脆而內餡濕潤柔和嘅質素！

如果對佢咃嘅法式甜點或馬卡龍有興趣，幫襯佢哋嘅法式下午茶就最划算，一件法式甜點或兩件馬卡龍配一杯咖啡或茶，都只喺賣$60；如想兩者兼得，一件法式甜點加一件馬卡龍配一杯咖啡或茶，只喺賣$80。

小弟是晚亦順便試咗一杯法國Kusmi品牌嘅St. Petersburg，由紅茶混合柑橘類及亞熱帶類水果、焦糖所調製，棉布嘅茶包，已顯出其格調。茶色清澈，味道唔會好濃，有淡淡果香，入口幾舒服。

今晚，試咗多款甜點，實在多謝店方嘅安排。基於少少個人對朱古力嘅偏好，所以，Cognac Tart特別得小弟歡心，亦都誠意推介俾一眾朱古力「粉絲」！

個人評分
味道：7/10
環境：7/10
服務：7/10
抵食：8/10
平均每人消費：HK$0（新品發佈活動）

餐廳資料：

Paul Lafayet
銅鑼灣軒尼詩道500號希慎廣場4樓410號舖
2327 0251