上次晌三聖村買海鮮就幫襯咗關財記及發記，今次費事煩，全部晌晒發記搞店，「死佬」之一孔Sir發辦揀海鮮，小弟今次被為以重任，負責管數，所以，又影相，又記低單價，非常忙碌，唯一做唔到喺記低啲海鮮重量，海鮮檔又唔會逐樣同你寫低，要單都喺一張過手寫銀碼單咁大把。
花螺 $96/斤大蟶子 $140/斤大瀨尿蝦皇 $200/斤厚肉紅鬼蝦 $380/斤桶蠔 $160（大杯）/ $80（細杯）象拔蚌 $360/斤印尼龍蝦 $480/斤大扇貝 $68/斤澳洲鮑魚 $260/斤夾夾埋埋足足23斤嘢，合共$5,180，最貴喺隻龍蝦，3斤幾，成千幾蚊隻，事後我哋都覺得唔划算。
最後尾嗰班舉晒手就喺我哋嘅死佬！
啲海鮮洗洗切切有排搞，所以，我哋預先訂定隻燒鵝，可以食住等。對比番舊年個食評，燒鵝又喺加咗價，加幅10-20%，一啲都唔溫和，舊價喺$100/例牌、$200/半隻、$400/一隻，而新價就$120/例牌、$220/半隻、$440/一隻。
馳名燒鵝 $440
燒鵝即燒，所以送到嚟一股香氣，燒得油亮富光澤，入口微暖，外皮油潤香脆，肉質甘香鬆化，比上次好食。
辣酒煮花螺
花螺跟辣酒煮，就有種必然食法嘅關係，其實花螺有唔少食法:白灼，紫蘇爆炒，醬爆或鹽焗都得。啲花螺辣而有酒香，但肉質就差少少，唔夠爽，唔知喺花螺本身嘅質素定煮得過火。
豉椒炒蟶子
大蟶子買咗一紮就可以炒出滿滿一大碟，蟶子肥大肉厚，爽口彈牙，豉椒惹味十足，香辣兼備！
椒鹽瀨尿蝦
泰國嚟嘅瀨尿蝦皇，身形有番咁上下大，所以賣到$200/斤。一人一隻，點明原隻炒，免切，咁先食得夠爽。拆殼後，大啖大啖入口，爽口而香辣，少少鹹味吊起，一流。
油泡紅鬼蝦
鮮蝦嘅種類好多，食得豪氣嘅有虎蝦，不過今次邂逅紅鬼蝦，亦都印象難忘。問店員，紅鬼蝦晌中國水域捕捉，佢無虎蝦咁出身，但就好肥大厚肉，唔喺浪得虛名，一招油泡，蝦鮮味盡出，蝦肉彈牙到不得了，而且，有唔少甘腴嘅蝦膏。
薑蔥煀美國桶蠔
上次個砵酒焗美國桶蠔，做得麻麻，煮完之後縮晒水，又無砵酒香。今次改一改，薑蔥煀，兼且加大份量，一份大加一份細，夠晒我哋13個死佬食。啲桶蠔好飽滿，又有蠔味，朕朕薑蔥清香，真喺好食好多。
象拔蚌刺身
要咗一條大嘅象拔蚌，學上次咁，一蚌兩食，先嚟一份刺身，感覺好似細份過上次，不過，今次處理我好啲，蚌身切得大塊而薄，所以入口較有爽脆嘅口感，灑點檸汁，再蘸點日式芥末，更能品嚐到當中海水嘅鹹鮮。
椒鹽象拔蚌膽
至於個膽，就試一試椒鹽做，以粉漿炸後再椒鹽炒，不過，唔多好食，一來椒鹽做得唔夠香唔惹味，二來粉漿腍，個蚌膽口感比較韌。反而，上次白灼象拔蚌膽有點驚喜。
印尼龍蝦刺身
龍蝦同樣做個兩食，先上第一食喺刺身，臨尾再上個龍蝦粥。依碟龍蝦刺身夠晒貴，成本成千銀一碟，可能因為貴，所以特別有期望。單講刺身個味道，啲龍蝦確實鮮甜無比，不過，賣相方面，落晌興記手中，真喺有啲嘥料，切得巖巉之餘，亦厚薄不均，隨意鋪晌碟上，毫無美感，如果落晌日本師傅手中，相信一定喺另一番景象。
蒜蓉蒸扇貝
蒜蓉蒸，較少出錯嘅做法，大量粉絲加大量蒜蓉，做法簡單直接。扇貝厚肉挺實，蒜香突出，就連粉絲都好味啲。
果皮蒸澳洲鮑魚
上次試過好食，當然要翻兜多一次，豪番晚當然要一人一隻鮑魚。澳洲鮑魚以果皮及蔥絲清蒸，再淋上少少豉油，值得以刀叉嚟享受。鮑魚鮮味十足，滲出淡淡果皮香，入口口感煙韌中有份爽彈，的確回味。
椒絲腐乳炒通菜 $120
雖然食菜，都先點一客惹味啲嘅炒通菜，好有大牌檔風味，通菜都尚算脆嫩，腐乳又寧舍入味。
蒜蓉炒西芹 $120
另一道炒西芹，西芹入口非常爽脆，帶濃濃蒜香。但老實講，如閣下無必要一定食菜，當然唔建議晌度食啦，百幾蚊碟炒菜喎，雖然包人工、鋪租，諗嚟諗去心理上都喺覺得唔抵囉！況且，你睇我哋碟西芹（中份）都唔喺好大碟咋。
龍蝦粥
上次單尾要個韮王豉油皇炒麵，今次因為買咗 龍蝦，所以，順利成章點咗個 龍蝦粥，加個粥底要另收多$100，感覺都幾唔平。好食都無所謂，不過，小弟就覺得麻麻哋，主因喺兩者好分離，粥底喺綿香嘅，但就無鮮味，粥還粥， 龍蝦 還龍蝦。
個人評分
味道：7/10
環境：7/10
服務：6/10
抵食：6/10
平均每人消費：HK$605
味道：7/10
環境：7/10
服務：6/10
抵食：6/10
平均每人消費：HK$605
餐廳資料：
興記 Hing Kee
屯門三聖村熟食亭地下2號舖
2458 8637
興記 Hing Kee
屯門三聖村熟食亭地下2號舖
2458 8637
沒有留言:
發佈留言