除咗散叫，有多款一人前定食（$98-$158），以及少數二人前（$298、$338）同四人前定食（$598）。
不過，嚟得季和，相信大部人嘅目的都喺一嚐和牛蒸籠料理，而蒸籠料理套餐分兩個價錢，視乎「蒸籠」部份選食A4定A5和牛，前者定價為$600/位，而後者則$800/位，套餐已包括前菜、刺身、燒物、壽司、酒肴、蒸籠料理、食事及甘味，非常豐富。
如想咀刁，可以跟餐廳商議自訂菜單，俾個「筆直」佢，講講個別喜好俾佢參考，佢就會安排一個個人化嘅和牛蒸籠料理俾你。是夜，9道菜嘅蒸籠盛宴（只喺$550 + 10%），隨着前菜揭開序幕。
日本溫室蕃茄拼水茄子
將蕃茄同水茄子切成薄片，簡單拌上醬油，出奇地感覺咁新鮮，蕃茄清甜多汁，水茄子有種脆脆爽口感，作為前菜，真喺令人胃口大開。
縞鰺薄切
依道深海池魚薄切，其實亦喺前菜之一。魚肉切得既薄且透，入口鮮甜，魚味十足，就算唔沾任何嘢，都好味，若然蘸些微醬油，會令魚鮮味更為突出。
季和特上刺身盛合
再嚟就喺正式嘅刺身上場，依份特上盛合，睇見都已經引起大家嘩嘩聲，因為賣相實在美不勝收，店長仲話全部都喺時人令貨色。五款刺身包括生螢光魷魚、牡丹蝦、北寄貝、拖羅同海膽，依個亦喺由淡至濃品嚐刺身嘅次序。
螢光魷魚，之前食過好幾次，覺得幾好食，皆因口感爽爽滑滑, 如果你覺得有點點腥可以蘸少少醬油，既提鮮，又辟腥。
牡丹蝦，放晌酒杯中，份外好睇，而雪白嘅蝦肉，鮮甜得很，質感極為清爽，蝦頭裡嘅亦蝦膏，甘飴味美。
新鮮北寄貝都喺第一次食，平常所食嘅都喺整熟咗，又韌又膠。今次嘅鮮北寄貝，真喺好有新鮮感，入口十分之彈牙。
拖羅，淡紅粉嫩，油脂佈滿平均細密，加上厚切，一放入口腔內，柔滑油潤，肉質細膩，好想食多一件。
海膽，喺5款刺身中最深刻嘅一款，鮮橙色嘅外觀，亮麗吸引，味道就更為精彩，綿密甘甜，鮮味突出，實在叫人回味。
松葉蟹豆腐味噌汁
椀物，比較少用嘅名字，即喺湯品。以味噌湯為基調，清澈而濃香，又富麵豉味，再襯以嫩滑無比嘅豆腐，當然松葉蟹鉗喺個湯嘅焦點，不單顯得有睇頭，而蟹肉清甜鮮味，令整道湯品更矜貴。
廣島蠔昆布蒸
煮物用上廣島蠔配搭昆布，讓昆布嘅海洋氣息滲入蠔中。兩隻廣島蠔賣相十分肥美，望見都流口水，加埋一片櫻花形昆布，更具和風色彩，一咬蠔鮮盡出，有一朕朕鹹鮮味，再者，蠔味濃郁，滋味"蠔"情。
蒸籠料理
其實，晌食其他料理之時，個蒸籠已經開始準備，內裡一早放有好多蔬菜，如日本白菜、水菜、本菇、冬菇及青蔥，而今晚就預備咗飛驒和牛及鹿兒島黑豚肉嚟做蒸籠料理。 據店長介紹，依個食法流行於日本九州，木蒸籠都喺晌日本特別訂製，鎖水力強兼能散發木香。
辣蘿蔔蓉、蔥花酸汁、柚子醋，芝麻醬
食蒸籠料理晌醬汁上同樣講究，4款式醬汁，都各有特色，可隨個人喜好。然而，店家則建議，先食蒸肉原味，之後再沾唔同醬汁，清新啲可揀蔥花酸汁或柚子醋，想濃香啲當然喺芝麻醬啦，當中小弟就較愛柚子醋，酸香清新，更令肉味突出。
飛驒和牛
先試試和牛，待籠內嘅蔬菜蒸至半熟，再鋪上和牛，由於牛肉唔使熟透，加上又喺薄切，所以，想食到半生熟，蒸30秒就搞掂，想熟透啲，1.5-2分鐘就有得食。全程店員會根據你喜好處理，無須食客操心，蒸好嘅和牛捲起大量蔬菜奉客。小弟要半生熟，睇落近乎生肉，色粉嫩紅，入口軟綿綿，柔滑得很，甘香而充滿油脂！
鹿兒島黑豚肉
因為豚肉要全熟，基本上就一入蒸籠煮到尾。睇落好似煙肉咁款，蒸熟之後肥膏變為透明，都擔心會好油，不過，入口又唔喺咁肥喎，而且肉質非常滑而富彈性；再點少少蔥花酸汁，「中和」吓啲油脂，感覺更好，此外，沾芝麻醬效果亦唔錯。
梅子燒飯團
食事安排了燒飯團及冷烏冬，一熱一凍，幾有心思。飯團裡面包咗好多梅子肉，酸香「提神」，因為真喺幾酸吓，食到小弟咪晒眼，而且，飯團燒得比較乾，入口有啲硬。
秋田稻庭冷烏冬
反而冷烏冬合我心水，因為食完啲熱辣辣蒸籠料理，來一口冰涼嘅冷烏冬，着實讓人變得清爽。烏冬入口好滑溜，沾上鰹魚汁而吃，簡單，卻喺味美。
柚子雪葩
最後甘味來一道柚子雪葩，清爽怡人，微微嘅酸，又滲出微微嘅甜，雪葩內更混有一啲柚子皮，添加點口感，將今晚嘅小聚有個美好嘅作結。
今晚客人唔多，整體環境寧靜，服務又好，可以讓我哋靜靜地一邊漫談，一邊品嚐多款精選美食，尤其蒸籠料理，喺一個唔錯嘅體驗！希望店家繼續努力，將蒸籠料理做得「蒸」益求精。
個人評分
味道：8/10
環境：8/10
服務：8/10
抵食：7/10
平均每人消費：HK$605
環境：8/10
服務：8/10
抵食：7/10
平均每人消費：HK$605
餐廳資料：
季和日本料理 Kiwa Japanese Cuisine
西環干諾道西155號高樂花園(尚品薈)一樓
2668 1996
季和日本料理 Kiwa Japanese Cuisine
西環干諾道西155號高樂花園(尚品薈)一樓
2668 1996
沒有留言:
發佈留言