先嚟嘅清水都好特別，樽內放有一束蘿勒 ，啲水飲落變得陣陣香草味，不過，唔喺個個人都覺得朕味OK，因為確喺有少少草青嘅感覺。
晚餐有二人（$268 + 10%）或四人套餐（$498 + 10%），當中嘅二人晚市套餐已包兩款小食（頭盤）、是日餐湯或沙律、兩客主菜、兩客甜品同餐飲，非常抵食。而主菜有數款選擇，跟上次見到嘅已經轉咗款。
巴馬火腿哈蜜瓜
第一道頭盤就喺巴馬火腿配哈蜜瓜，喺鹹香中帶清爽嘅前菜。火腿選料不俗，鹹香而油潤，哈蜜瓜口感爽口清甜， 喚醒一下味蕾預備品嚐以下落嚟嘅菜式。
青蘋果鵝肝多士
下一道菜喺濃膩嘅煎鵝肝，其實晌餐牌所見，散叫一客都要成$88，但依家二人晚餐已包咗，喺咪好抵呢！
鵝肝切得頗大件，有種賣大包嘅感覺。煎得外層非常香脆，而入口好有即溶嘅口感，油嫩甘香；中間輕煎暖嘅青蘋果及墊底嘅法包，既令到食落無咁油膩，亦有增加層次感之效，青蘋果片不妨再厚多少少都可以。
沙律或餐湯，只可以任揀其一，想試試兩者嘅水準，自然各要一客。
田園沙律只喺普通嘅田園沙律，有點沙律菜、車厘茄、粟米粒，配些油醋，雖然沙律菜夠爽脆，但唔夠凍亦喺個需要改善嘅地方。
雜菌忌廉湯
餐湯亦有另一選擇，就喺南瓜忌廉湯。老婆向來都鍾意菇菌類，所以，雜菌忌廉湯合佢心水多啲。雖則湯嘅質感較稀，但菌味一啲都唔差。若然加少少忌廉畫啲花，俾人感覺高檔啲。
紐西蘭香草燒羊架
主菜分兩組，第一組肉類主菜可以三揀一，選擇包括烤澳洲牛柳扒、紐西蘭香草燒羊架或醬烤豬肋骨。我哋揀嘅燒羊架，一客有3條，條條都有番咁上下大細，配薯菜，薯蓉好滑身，但較啖口，撈燒汁食就啱啱好，至於個烤蕃茄好鮮甜；羊架切開睇落以為煎過籠，可能環境太暗所致，但食落又估唔到幾嫩腍，又帶獨特嘅羊羶味， 又無乜筋，食得滿口滋味。
菠菜汁三文魚意粉
另一組喺澱粉質類，同樣三揀一，有忌廉海蝦墨魚麵、鵝肝意大利飯、菠菜汁三文魚意粉。雖意寫喺意大利粉，其實用上闊麵，更掛汁，兼且煮得咬口，菠菜汁唔算好重菠菜味，始終打碎咗加忌廉汁做，但勝在柔滑，而三文魚拆成碎放晌麵內，個人就覺得一小件煎香放晌上面仲有睇頭。
提拉米蘇
賣相好對辦，馬卡風芝士入口好挺身，但質感好細緻柔滑，不過，有咖啡香，卻無酒味。雖然有時都會遇到有啲師傅想做啲無酒味嘅提拉米蘇，適合任何人食，但感覺唔傳神。
牛奶布丁
冰涼嘅布丁奶味香濃，口感非常好軟滑討好，所以，兩者中小弟較喜愛牛奶布丁。
熱檸水
老婆嘅熱檸水用上檸檬角，喺我唔多喜歡嘅做法，因為唔方便篤。
鮮奶咖啡
其實無拉花我真喺無乜所謂，因為我喺飲咖啡，唔喺飲拉花，拉得靚就感覺更好。不過，杯鮮奶咖啡入口有啲怪，再飲多兩啖，覺得好重奶味，好似港式咖啡加花奶咁，所以，都同店員反映，欣賞佢認真返去試吓啲奶，佢回覆話唔知點解同事用咗啲coffee creamer兼加埋熱，所以變得好濃奶味。唔怪得之做唔到應有嘅奶泡，味道又怪怪哋啦。
是晚坐滿客（店方應該做緊團購，因為見唔少喺團購客），但綜觀整晚，好似主打得一位侍應，間唔時有位師傅仔幫手上菜，效率勉強可以，但服務算有禮，至少，我杯咖啡問題都有正視到。
個人評分
味道：8/10
環境：8/10
服務：7/10
抵食：9/10
平均每人消費：HK$148
味道：8/10
環境：8/10
服務：7/10
抵食：9/10
平均每人消費：HK$148
餐廳資料：
Amour Corner
油麻地砵蘭街106號地下
2626 9900
Amour Corner
油麻地砵蘭街106號地下
2626 9900
沒有留言:
發佈留言