餐廳打正旗號叫個下午茶套餐為「高茶」，俾人感覺高檔啲。當中包三色沙律、泰式燒烤及甜品拼盤，再加兩杯泰式特飲 ($268 + 10%)。點好特飲，好快三層架就隨隨送上。
三色沙律
應該喺泰式冷盤加沙律：泰式鳳爪、青芒果軟殼蟹沙律、鮮蝦柚子沙律。泰式鳳爪雖然大路少少，但始終喺泰式冷盤嘅名物，做得酸咪咪，好清爽；青芒果軟殼蟹沙律入口頗辣，青芒果軟身又唔太酸喎，啲軟殼蟹幾好食；至於鮮蝦柚子沙律，柚子肉鮮甜多汁，加有啲乾蔥，配魚露，鹹鹹甜甜，好得意，當然，爽口嘅鮮蝦好睇又好食。
泰式燒烤
有燒海鮮及烤肉：燒虎蝦兩隻、燒豬頸肉、豬牛雞肉串燒，所以，整個燒烤都幾豐富。此外，配上4款醬汁：烤肉汁、酸甜汁、辣汁及沙嗲 。
燒虎蝦肉質唔差，但小弟覺得未夠彈牙，配辣汁就最惹味；燒豬頸肉，建議配肉汁，因為肉汁較濃香，而豬頸肉口感幾爽；串燒，配沙嗲點都喺一個情意結，沙嗲汁幾香，但原來點酸甜個汁又OK喎，不過，牛肉串燒本身有啲香茅味，唔點嘢都得。
甜品拼盤
跟餐牌有啲出入，原本喺芒果糯米飯、椰汁西米糕、芒果西米糕、泰式椰汁多士，依家無咗芒果糯米飯及芒果西米糕，據了解因為啱啱芒果來貨唔喺咁靚，搞搞新意就改咗芝麻西米糕、咖啡西米糕及椰汁紅豆大菜糕。
椰汁西米糕椰汁味濃，西米糕內混入少少粟米粒，的確好食；而新品嘅芝麻西米糕帶有好重芝麻味，咖啡西米糕亦有驚喜，咖啡味香濃，兩者嘅質感都好柔滑，不過，西米煮完有啲未焗透；椰汁紅豆大菜糕，個人覺得麻麻哋，紅豆未腍，椰肉條過硬，跟大菜糕口感唔多夾；而泰式椰汁多士以法包條沾椰汁咖吔醬食，多士脆口，椰汁咖吔醬涼涼哋，淡淡斑蘭香味，之不過，最初送嚟時即食就幾好，最尾攤耐咗，多士唔脆就變得差好遠。
特飲選擇，一共有8款飲品：珍多冰、椰汁冰、龍眼水、香茅茶、青檸梳打、咸檸檬七喜、泰式咖啡、泰式奶茶，每份餐可以揀兩杯特飲。
龍眼冰
小弟對龍眼冰有少少情有獨鍾，大概因為嗰份清甜嘅蜜味，晌大熱天時飲用，倍感涼快。
熱香茅茶
老婆要一杯熱嘅香茅茶，入口有點甜，似喺應該加咗蜜糖，但味道仍然喺唔錯。
下午茶套餐供應時間每日3:00pm-5:30pm，當然，星期六或日嚟嘆吓就最輕鬆不過！整體屬中上水平，不過，泰式燒烤有啲瑕疵，而甜品拼盤好壞參半，所以，考慮良久，俾住個OK佢先，期望改善後有更好質素。
個人評分
味道：7/10
環境：8/10
服務：8/10
抵食：6/10
平均每人消費：HK$150
味道：7/10
環境：8/10
服務：8/10
抵食：6/10
平均每人消費：HK$150
餐廳資料：
泰燒遙 Thai on 5 Seafood Grill and Bar
尖沙咀諾士佛臺1號5樓
2721 9898
泰燒遙 Thai on 5 Seafood Grill and Bar
尖沙咀諾士佛臺1號5樓
2721 9898
沒有留言:
發佈留言