一入門口就放滿各式各樣嘅甜品跟你打招呼，琳瑯滿目，精緻亮麗，尤其喺啱啱做緊一個高跟鞋嘅杯子蛋糕系列，雖然小弟對杯子蛋糕欠缺一份熱情，不過，睇到咁多製作咁精細，又咁有心思嘅蛋糕，心裡都不期然有啲雀躍。據侍應講，會做到五月尾，五月中又喺母親節，請媽咪食個大餐兼送佢一對「高跟鞋」逗佢開心啦，個主意OK嗎？
再走入，左邊喺食物區，右邊喺用餐區，地方夠集中，一眼睇晒，唔算好大，但環境都闊落，氣氛閒適。當晚所見，都見唔少一大家族人嚟慶祝，一列長枱7、8人幾咁高興。而牆上掛上唔少畫作，大概喺想要貫徹店名之意。
食物區，概括而言，由沙律吧、凍海鮮、生蠔、刺身、壽司、冷盤、麵包、芝士盤、餐湯、煎鴨肝、熱盤、烤肉、咖喱、蒸魚、粉麵、燒味、甜品……等等，種類算應有盡有。
飲品包一杯餐飲，冷熱都可，不過，你都可以揀一啲飲品套餐，如2.5小時任飲汽水、果汁，又或一渣過嘅Virgin Sangria。
沙律吧
晌食物區中央有個圓形嘅沙律吧，都幾突出，多款沙律菜，沙律配料，醬汁，以及幾款預製好沙律，雖然種類、款式唔算好多，但補充速度快，經常路過都放滿各樣材料，睇落新鮮。
此外，晌沙律吧外圍，又放有少少冷盤小食，的的骰骰，可能會有意外驚喜。
小弟都喺慣性一大碟沙律行先，覺得好有助消化，沙律菜呀、少少配料、幾款預製沙律，加埋心水嘅油醋汁，吃罷讓人感覺清爽開胃。
餐湯、麵包
一向都鍾意飲湯，無論中湯、西湯都喜歡，是晚中湯喺霸王花冬瓜蜜棗煲唐排，而西湯喺野米羊肉鮮茄湯，由於西湯較特色，所以，滔一小碗配斑蘭包；不過，唔代表唔飲中湯，因為另有燉湯供應，椰子雪耳煲雞，喺咪更加要試呢！
野米羊肉鮮茄湯，湯內有唔少野米粒同羊肉粒，口感有趣，羶味唔重，適合大部分人，而鮮茄湯個底本身好濃郁，蕃茄味突出，酸香醒胃。
椰子雪耳煲雞，果然清甜滋潤，撈一撈幾多料呀，一啲都無欺場，暖暖腸胃之後，又喺食凍海鮮嘅時候。
凍海鮮、生蠔
一想到自助餐嘅回本菜式，就喺凍海鮮及生蠔。海鮮吧擺放各式各樣海鮮，非常吸引，有紐西蘭青口、瑞典小龍蝦、太平洋凍蝦、加拿大石蟹、冰島翡翠螺、波士頓龍蝦鉗、阿拉斯卡蟹腳、澳洲琵琶蝦及波士頓龍蝦，再加上美國及紐西蘭兩款生蠔，咁嘅陣容，絕對滿足到喜歡食凍海鮮嘅人。
另備有3款醬汁：紅酒醋汁、辣根咯嗲汁及俄羅斯白蘭地汁，當然，檸檬角就唔少得，雖然配搭有所謂一定法則，不過，食自助餐又何需拘束呢。
小弟就盡地一鋪，一碟過要齊晒咁多款，一件不漏，樣樣都鮮甜好食，最得我歡心就梗喺生蠔、蝦鉗、蟹腳、琵琶蝦及波士頓龍蝦幾款啦，大啖大啖嘅龍蝦肉，不知食得幾爽，沾少少紅酒醋汁，海鮮入口就更鮮味。若非有更多嘢想試，真喺想嚟多碟「海鮮拼盤」呀！
刺身、壽司
我都喜歡食刺身、壽司，不過，去到自助餐，就好少會食，一來食咗唔少凍海鮮，況且，一向自助餐嘅刺身不外乎嗰三幾樣，所以，相比之下食刺身嘅意欲細咗；而壽司唔使多講啦，較易飽肚，除非超正啫。故此，影張相留個記錄，知道有咩款式俾大家參考吓。
即叫即蒸魚鮮
飲完凍嘅海鮮，就轉一轉食點熱嘅魚鮮，平時自助餐嘅蒸魚都會試少少，但只喺隨意咁試丁點，不過，如果喜歡食魚嘅朋友晌度就真喺完全唔可以錯過，因為，就晌麵檔隔離，就有新鮮蒸魚，喺「獨立」為你而蒸，「魚檔」有紅鮪、鱸魚、烏頭，揀頭又得，尾又得，腩位都可以，以薑蔥蒸好再直送到你枱上。
唔講咁多，蒸碟紅鮪魚尾加少少腩位試試，淋上豉油，灑點芫茜，魚嘅鮮同嫩真喺「扁鼻佬戴眼鏡」- 無得頂呀，肥美滋味。
粉麵、中式冷盤、燒味
順帶一提，粉麵檔前仲有中式冷盤、燒味及少少熱葷。粉麵檔嘅主材料都只喺有墨魚丸、牛丸、鮮蝦雲吞及貢丸，但反而湯底有啲吸引度，有新鮮龍蝦湯、越式牛肉湯、香濃雞湯、新加坡喇沙湯及四川麻辣湯，不過，眼見就唔喺樣樣都有，晌黑板剔住先有提供，是晚就見有3款。
煎鴨肝、西式冷盤、芝士拼盤
煎鴨肝引嚟一室香氣，所以成日吸引到啲食客排隊等鴨肝，放心，見到佢兩大盤鴨肝不停煎，源源供應；
此外，同區仲有西式冷盤，如黑椒牛肉、巴馬火腿、西班牙辣香腸，肝醬批、煙三文魚……等等，麵包、牛油蛋糕、芝士拼盤，幾樣嘢都非常吸引。
煎鴨肝伴一小件烘多士，入口實在油香豐腴，而冷盤嘅自家製肝醬批伴鮮果，肝醬好綿滑，微酸嘅果凍味道好清新，芝士拼盤嘅4款芝士Brie Cheese、Edam、Blue Cheese、Manchego，各試少少，各有唔同口感及味道，夾雜果乾同食，喺幾有趣嘅體驗。
烤肉
見朋友切咗件西冷牛扒，仲話好正，搞到我都心癢癢，所以，我都搵師傅要一碟，再搭件烤羊扒；伴菜有玉桂蜜餞南瓜及香燒薯角，反而估唔到醬汁有咁多選擇：牛油汁、燒烤汁、日式燒烤汁、燒汁同黑椒汁。
件西冷扒又真喺燒得幾香，中心部份嫩紅兼帶些微血汁，好有肉味，淋啲燒汁，沾些芥辣，唔錯；羊扒肉質仲細嫩，唔太羶，當然小弟食得羊就想佢羶啲啦。伴菜嘅玉桂蜜餞南瓜好好味，既香又帶點蜜甜，加配多少少烤蔬果，食肉得嚟都感覺平衡啲嘛。
熱盤
今日狀態似乎差咗啲啲，食到依度都見八乘幾飽，所以，其他熱盤就無再食，不過，補少少相俾有興趣嚟食自助餐嘅朋友參考吓。今晚所見，菜式補充都算幾快，次次少量製作，增加新鮮度。
咖喱
熱盤嘅一角落，仲有咖喱菜式，如咖喱雞、咖喱鴨、咖喱雜蔬、印度烤餅……等等，雖然無試，但打開蓋都聞到陣陣香味，試過咖喱嘅朋友都話水準不賴。
甜品
除咗前文講過有琳瑯滿目嘅「高跟鞋」杯子蛋糕外，其他甜品種類包括：曲奇、藍莓芝士蛋糕、檸檬撻、芒果蛋糕、朱古力布朗尼、芝士布甸、芒果布甸、小杯裝嘅啫喱、慕絲、意式奶凍，後面仲有朱古力噴泉，以及4款Movenpick雪糕（楓糖合桃、咖啡、榛子、焦糖），幾款味道都喺小弟「飛弗」嚟。而新鮮生果亦放晌依處，淨食當然無問題，晌朱古力噴泉蘸點朱古力漿亦都好味。
一碟甜品拼盤加一「碗」Movenpick什錦雪糕，再襯以一杯鮮奶咖啡，未必叫做完美嘅作結，但一定叫人滿足。慕絲及奶凍做得有水準，前者軟滑綿綿，後者挺身柔滑，而芒果蛋糕、布朗尼都不俗，最欣賞喺件檸檬撻，檸檬味清新爽朗，酸香細緻。
最喜歡雪糕加點生果，再淋一點糖漿或朱古力漿，幾款味道都有個性，而Movenpick雪糕較軟身，奶味濃。兩啖雪糕，呷一啖咖啡，喺唔錯嘅食法嚟，有興趣你都可以試試。
未翻新前未嚟過，所以，難以跟以前作出比較。不過，從今晚所食到嘅，覺得水準有番咁上下，食得稱心如意，尤其凍海鮮，燉湯，即製蒸魚幾樣，印象特別深刻，故此，值得再嚟。
個人評分
味道：8/10
環境：8/10
服務：7/10
抵食：8/10
平均每人消費：HK$465
味道：8/10
環境：8/10
服務：7/10
抵食：8/10
平均每人消費：HK$465
餐廳資料：
The Food Gallery
尖沙咀北京道8號香港朗廷酒店高層大堂
2132 7898
尖沙咀北京道8號香港朗廷酒店高層大堂
2132 7898
沒有留言:
發佈留言