譚仔三哥米線：譚何容易

之前晌「重慶麻辣燙」嘅食評都提及過，美孚區打正旗號賣米線嘅就只有「景村雲南米線」及「重慶麻辣燙」兩家，亦預告埋遲啲會有多一家「譚仔三哥米線」，卒之晌4月中開業，形成三雄鼎立。始終「譚仔三哥」晌本地米線界都頗有名氣，所以，開檔初期有唔少街坊嚟幫襯，小弟一向甚少會急着試新店，只喺要食番餐先嚟會一會佢。

環境而言，3間中，一家喺以譚仔三哥嘅環境最好，夠大夠寬敞，下面張相都只喺影咗入門口嘅一部份位置，右轉仲有好大地方，裡面有唔少圓枱可以坐到6-7人，地方整潔光猛。

晌譚仔三哥度有咩食，相信好多人都知，所以無謂多講，上載張餐牌一目了然，乜都清楚晒。

此外，晌度有3樣嘢喺店方推介嘅必食：尖椒皮蛋、麻辣湯底、湖南土匪雞翼，不過，是日提早少少同老婆嚟食米線當晚餐，幾樣都無試，只喺點咗一份過橋米線兩份食。

過橋米線 $50

貪佢一碗過有好多餸料，豬肉、牛肉、雞肉、腩肉、豬潤、火腿、炸醬、魚蛋、牛丸、墨丸、腐皮、豆卜、韭菜、酸菜、生菜、竹笙、芽菜，足足16款餸料之多。除清湯底，其他湯底如酸辣、麻辣、煳辣都要另加$1，若然揀三哥酸辣湯底則要另加$2（普通米線）、$3（過橋米線）。

送到嚟真喺夠晒大碗，餸料中嘅炸醬及酸菜另小碟奉上，丸類多數喺得嗰一粒，肉片類則樣樣有一兩片或兩三片，其他材料都喺樣樣有啲咁，而老婆近幾個月開始多咗食素，所以，大部分丸同肉都由小弟搞掂，蔬菜及豆類就由佢包辦；至於米線份量夠晒我哋兩個食，頭尾有成4-5碗仔份量，米線口感亦都好滑溜。選上清湯，味道都算清甜，但鮮味就差少少，因為啲肉好似無乜點醃過，所以，我就鍾意夾埋啲炸醬一齊放入口，整體而言，不過不失咁啦。

凍檸蜜 +$7

凡惠顧指定食物，加$7就可以配飲品，冷熱都得，比起散叫正價平$3-$6。叫咗杯最貴嘅凍檸蜜，蜜糖味就夠晒，但只得兩片檸檬，檸味太薄。

開一間餐廳真喺談何容易，依家細細哋嘅美孚區都已經有3間，仲未計有啲麵鋪、快餐店、茶記都有兼賣米線。希望晌多咗一份競爭下，幾間米線鋪為做生意都將食物越做越好。

個人評分
味道：7/10
環境：7/10
服務：7/10
抵食：8/10
平均每人消費：HK$29

餐廳資料：
譚仔三哥米線
九龍美孚新邨荔灣道10-16號萬事達廣場1樓N84B及N85號舖
2370 9772