大快活 Fairwood：我的星期六美孚早餐 ~ 快活豈要做神仙

以前寫過唔少晌美孚區快餐店嘅食評，但嚟嚟去去都喺美心同大家樂，依家卒之開咗間大快活，亦喺美孚區唯一一間大快活。其實本身對大快活無乜好感，因為以往每次幫襯大快活，食過啲嘢都喺麻麻，賣幾多廣告都好，都硬喺覺得佢啲嘢好一般。今次幫襯，都喺純粹新店開張，幫襯一下。

對比起美孚區幾間快餐店，可以好客觀咁講，真喺以大快活嘅環境最好，地方闊落唔在講，座位偏排頗寬鬆，加上一室鮮橙色，的確令人醒神好多。

此外，都留意咗好耐，近門口有啲「愛心座」，初時唔為意點解，跟其他位有咩分別，原來，依幾組枱嘅櫈喺可郁動，方便一啲坐輪椅嘅長者或傷殘人士入座，依方面晌服務上真喺提升唔少印象分。仲有，啲執枱阿姐亦好好禮貌，見你食完，執剩杯嘢飲，抹抹枱之後加句叫你慢慢坐。

快餐店嘅食物選擇來來去去都喺嗰啲，唔會有咩大驚喜。

粟米蛋白奄列餐 $26 / $28 / $31

可配火腿湯通粉 /牛奶麥皮、特色腸、即炸脆香魚柳，全部配英式多士及即磨咖啡或香滑奶茶。老婆揀咗粟米蛋白奄列配牛奶麥皮（$26），飲熱華田。

粟米蛋白奄列，喺食奄列以嚟最清淡嘅奄列，外皮以蛋白製作，內裡只有粟米粒及少少磨菇粒，真喺要灑少少鹽先有啲味。而我哋就鍾意夾件烘多士一起食，老婆愛健康，食得又清，所以牛油都無搽，實行少監少油。

牛奶麥皮標明採用桂格牛奶無糖麥皮，既然喺咁，煮嘅時候就更唔會加糖咁多餘，所以，入口屬淡口嘢，不過，絕對喺健康到爆之選。

意大利鮮茄通粉餐 $25 / $29

只有兩款，一喺配脆皮腸，一喺配雞扒，通粉可以轉米粉，包一杯即磨咖啡或香滑奶茶。小弟要咗鮮茄脆皮腸通粉（$25），配熱奶茶。

雖然話採用意大利鮮茄，不過，攞餐時見佢咗羹蕃茄蓉，再斟啲雞湯落去，所以，望落去唔覺得好濃郁，質感亦較稀，還幸入口蕃茄味都算有番咁上下。配兩條脆皮腸，真喺幾脆皮及無過鹹嘅毛病，通粉煮得亦啱啱好，但最搞鬼喺湯內加有合掌瓜作配菜。雖然成日聽人講阿活嘅奶茶好滑，個人覺得，唔知心理定情感，始終覺得茶記奶茶好。

綜觀美孚三間鏈鎖快餐店，大快活就環境好，服務好，喺食物水準一般，定價亦感覺比其他兩間高少少。

個人評分
味道：6/10
環境：8/10
服務：8/10
抵食：7/10
平均每人消費：HK$26

餐廳資料：
大快活 Fairwood
美孚景荔徑8號盈暉薈2樓218-222號舖
2856 8680