歐陸餐廳 Cafe 1950：尋根夠抵

雖然大圍嘅搵食足跡唔多，但偶爾會嚟到，唔喺有咩特別事要尋根究底，只喺從朋友口中知道，Café 1950晌依區新開咗分店，下午茶夠晒抵，既然順路經開，就不如尋根一下，睇睇夠抵有無。由於有其中一個表姐住晌依區，所以，對大圍都唔太陌生，就算由東鐵大圍站行過嚟美林村，都無乜難度。

兩年幾前到訪過屯門嘅Cafe 1950，仲記得嗰時嘅印象，覺得佢似喺屋村裡中檔西式茶記咁，環境以咖啡室為本，菜式西化，但乜菜系都有。嚟到美林嘅分店，路線依然走優悠咖啡室模式，從枱櫈嘅安排及提供多種遊戲、雜誌就知，餐廳整體面積頗大，但枱櫈卻喺無排到盡，所以，空間感十足，此外，近門口放置好多棋類，牌類遊戲，供客人借用。

下午茶時段，門口超多人等位，無他嘅，一個字：「抵」！翻一轉餐牌，有麵類、飯類（午後典飯）、沙律、熱狗、麵包磚、小食類共30多款，平貴都有，定價於$21-$40。

可能你會「唓」我，咁邊叫抵，咪同出面差唔多，平嘅下午茶餐同隔離大家樂嘅都喺咁上下。喂，大佬！人家新張期內（唔知新張期內到幾時），無限添飲喎，晌自助飲品吧，自斟自飲，有凍，有熱，飲兩杯，打吓躉玩吓棋，乜都抵番晒啦！仲有，正就正在星期一至日都有，唔使閒日下午茶至有咁「筍」。

韓式烤十勝紅豆麵包磚 $30

既然抵成咁，就揀個最貴嘅麵包磚，厚多士，烤烘後淋上蜜糖，唧上忌廉，加一大抹紅豆，雖然無法印證喺唔喺日本十勝紅豆，但紅豆蓉帶有紅豆粒粒，軟綿，清甜，混點忌廉，加上麵包磚，一口一小件，唔錯唔錯，真喺感到一份春日甜蜜。

白咖啡

雖然咖啡喺咖啡機出品，唔好抱太大期望，但勝在仍有多款選擇：黑咖啡、白咖啡、意大利泡沫咖啡、鮮奶咖啡幾款。而小弟杯白咖啡飲落又幾香醇，再添多杯真喺當翻本呀！

唔飲咖啡，亦可以飲吓朱古力或美祿，健康少少嘅，就不妨揀包果茶沖一沖，用上Loyd品牌，都唔喺咩雜嘜平價貨。

好坐好迤，仲要唔收加一，抵到咁，真喺要問多幾次：「點解嘅？咁平嘅？」真喺魔術都變唔到俾你任飲啦！

個人評分
味道：8/10
環境：8/10
服務：7/10
抵食：9/10
平均每人消費：HK$30

餐廳資料：
Cafe 1950歐陸餐廳
大圍美田路30號美林商場2樓F1號鋪
28661909