官燕棧 Imperial Bird's Nest：好友狂嚐曲（38）

食咗咁多年曲奇，都知曲奇嘅可塑性高，咩材料都可以跟曲奇混合，不過，印象中，以海味乾貨夾曲奇就應該喺第一次試，多得食友嘅心思，送贈一小盒「官燕棧」自家製作嘅曲奇予小弟。佢賣蔘茸、海味……等等嘢就知啫，原來佢連曲奇都撈埋。

依盒蟲草花曲奇，喺迷一樣嘅曲奇，盒底成份明明寫住蟲草花曲奇，只有8條，但打開包裝盒，既有蟲草花曲奇，又有黑木耳黑芝麻曲奇及猴頭菇黑芝麻曲奇，仲成9條之多，哈哈，原來食友一次買齊三款，將其撈勻平均分配再入盒，等我哋可以一次過試齊三款唔同口味，食友真喺有心。所以，咪投訴人哋貨不對辦呀。

蟲草花曲奇

曲奇都喺獨立包裝，夠晒衛生。記憶中，蟲草花無乜好特別嘅味，但就知有點藥用價值，當然唔可以跟冬蟲草相提並論啦。曲奇裡面一點點紅色應該喺蟲草花磨研而成，無平常嘅曲奇咁香牛油味，但質感就頗為鬆脆，感覺同食普通曲奇唔太分別。

猴頭菇黑芝麻曲奇

猴頭菇搭黑芝麻，個組合都已經夠晒獨特，雖然有少少菇味，但無預期中咁重，芝麻味亦都好輕，所以，個人覺得有少少失望。

黑木耳黑芝麻曲奇

相比猴頭菇黑芝麻曲奇，下芝麻較多，食落芝麻味明確啲，而黑木耳軋成細細粒，所以，唔會好似平時食木耳咁有份爽口感，唔講都真喺唔知加咗黑木耳添。

雖然以味道而言，無論蟲草花、猴頭菇，抑或黑木耳，都稱唔上味道突出，而且，曲奇嘅牛油香亦欠奉，不過，以上幾樣食材都屬較健康、天然，對人體又有益，一試無妨。

味道：6/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
官燕棧 Imperial Bird's Nest
荃灣青山公路264-298號南豐中心12樓1224室
2499 9398