山區裡的走走趯趯: Bistro on the Mile：主題玩法新里程

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2015年4月16日星期四

Bistro on the Mile：主題玩法新里程

大部份酒店嘅自助餐為咗吸引食客，都會設定一啲主題，然後，晌菜式上就會出現多款主題式美饌，通常供應期大概長達兩至三個月左右。今次再臨Bistro on the Mile，同樣有搞主題，不過玩法唔一樣，喺以一星期7日唔同嘅海鮮做主題，定為「滋味海鮮自助餐七重奏」，都幾有新鮮感。

大部份食物都放晒晌近入門口位置，非常吸晴，而再入啲嘅用餐區，地方闊落，而最尾一排座位可睇到彌敦道嘅繁華街景。

沙律

照個人慣例都喺食咗沙律先，有多款沙律菜及配料，6款預製好沙律，再加埋6款醬汁選擇；一於先嚟一碟「雜錦」沙律前菜，並淋上藍芝士沙律醬。

睇見小弟碟前菜喺咪好吸引呢？確實，唔只睇得，味道仲幾得，啲沙律菜加咗藍芝士沙律醬，非常好食，清新中有份鹹香味，而串茄配水牛芝士、烤甜椒亦都好正。

中湯

近來食自助餐都歡喜一、兩道前菜後就飲個熱湯暖暖個胃，中湯方面，黑板之上清楚寫低晒，既有老火湯，又有燉湯，除非口味問題，識飲當然揀後者啦。

淮山杞子燉乳鴿，嘩！打開蓋已經見喺不得了，半隻乳鴿絕無欺場，淮山、杞子、圓肉、瘦肉，個湯唔甜都幾難，清澈嘅燉湯，每啖都喺滋潤嘅精華。

海鮮七重奏

上文略略講過海鮮七重奏，點7日唔同法？原來除基本嘅凍海鮮照樣有提供之外，每一日仲會挑選一款特定海鮮，做出多款精緻美食，主要喺沙律及冷盤，亦有啲熱食散佈晌唔同區域。由星期一至日，分別喺澳洲生蠔、挪威三文魚、英國蟹、加拿大帶子、美國龍蝦、越南大虎蝦、非洲鮑魚，可謂日日有特色。

依一晚就喺以加拿大帶子為主，7款菜式包括：薄荷帶子青瓜沙律、蕃茄帶子串標、帶子菠蘿沙律杯、凍帶子、帶子牛油果杯、帶子芒果杯、帶子甜椒黑醋沙律，款款都的的骰骰，無理由唔一網打盡佢哋架。廚師都盡量將帶子做出唔同嘅款式，每款都各有個性，可謂各自各精彩，個人就最鍾意薄荷帶子青瓜沙律、帶子牛油果杯及帶子芒果杯，尤其開始天氣變得熱，食起嚟更感清爽。

凍海鮮

除咗主題式嘅海鮮七重奏之外，仲有其他凍海鮮，如瀨尿蝦、甜蝦、青口、長蟹腳、生蠔，款式唔算多，但瀨尿蝦甜美，生蠔載着海水鮮味。

冷盤、芝士、麵包

而晌沙律兩旁，一邊放有多款冷盤，配搭特別，另一邊就喺芝士拼盤同麵包籃，樣樣揀啲，再加多碗西湯，組成一份別緻嘅小食。

幾樣特色冷盤，真喺唔好錯過，不單味道不俗，而且，配搭富心思，就好似個忌廉芝士煙三文魚墨西哥卷，口感豐富，味道鹹鮮有層次；

芝士盤共有6款芝士，有淡有濃，有車打有藍芝士，隨意揀幾款品嚐，原來配香蕉乾又幾好食喎，當然，夾麵包喺我依類麵包躉嘅喜好啦；

西湯喺甘筍湯，色澤亮麗橙紅，入口質感幼滑，估唔到甘筍味濃郁，真喺色香味全。

刺身、壽司、冷麵

依兩樣都喺一個自助餐不可或缺嘅類別，選擇款色跟大部分自助餐差唔唔多，都喺5、6款刺身夾多款壽司，友人就夾咗一大碟刺身（八爪魚、吞拿魚、紅立魚、三文魚、甜蝦），小弟就「喺咁二」黐兩嚿試試。附近仲有啲天婦羅，冷麵其實都想留待臨尾先食，點知都後來都無「翻貨．而錯過咗！

熱盤

入門口靠左一列長枱，擺有多種類別熱食，靠相片記錄大概有以下食物（應該有漏三幾樣）：蕃茄帶子魷魚長通粉（主題菜式）、帶子青口莧菜撻（主題菜式）、蒜蓉粉絲蒸扇貝、椒鹽蝦、帶子炒西蘭花瑤柱汁、燒味、日式麵豉燒雞、煎爐魚配龍蝦汁、保雲酥焗三文魚配香檳忌廉汁、炸帶子及海鮮配橙黃醬、燒豬手、燒西冷、煙肉洋蔥炒豆角、香草蒜蓉燒新薯、泰式炒雜菜、印度雜菜咖喱、印度烤魚、燒烤美食（芝士腸、豬肉腸、迷你漢堡扒、五花腩、烤雜菜）、蟹籽鮮蝦帶子炒飯……等等。