室內環境唔喺好大，坐滿人之時真喺幾逼，裝修亦都好簡單，反而餐廳尾落幾級嘅用餐區闊落少少。
基本收費，$178一位（星期五、六、日、假期及其前夕，另加$10），任飲任食兩個鐘，我哋咁戰鬥格，夠晒啦。當中，已包咗超過60多款嘢食，有肉類、野菜、和食、甜品、炸物、刺身、海鮮及飲品。
另外，又可以加$40升級為皇牌放題，有多6款嘢食可以任點，就喺牛肋肉、花虎蝦、帆立貝、刺身帶子、馬刀貝及意大利芝士蛋糕，想享受多啲，定慳番啲，悉隨尊便。此外，仲有一張點菜紙寫住付款項目，有兩款特別食物，同埋啲啤酒、清酒、紅酒、白酒、香檳之類，小心啲剔，咪亂剔剔鬼錯。
三文魚頭湯
燒烤需時，所以，不如點個湯潤一潤。湯品有味噌湯及三文魚頭湯，揀後者心理上覺得多料啲，睇落跟味噌湯無咩分別，只喺入口多一陣三文魚嘅味道，唔錯！唔錯！
蟹籽沙律
慣常自助餐、放題嘅作戰攻略之一，就喺食啲沙律作為前菜，開開腸胃等陣可以食多啲。甘筍絲、白蘿蔔絲、青瓜絲拌點胡麻汁，蟹籽落手重，食落清清爽爽。
特大刺身赤蝦
跟住一人送上一隻特大刺身赤蝦，果然特大，有成隻手掌咁大。如果食完想再食，就要付款點選，屬於「付款項目」，不過，都只喺$10隻。質素唔算話超高，肉質未夠爽，但味道仍覺鮮甜，賣你$10一隻仲想點！
除咗有啲醬油之外，枱上仲有七味粉及日本鹽，作為補充式調味，基本上今晚都好少用到。
飲品
食烤肉真喺唔少得飲汽水，除可樂、忌廉、橙汁唔在講，仲有檸檬+C，及新加嘅C&C蘋果汽水；咁熱氣，最得小弟歡心都喺自家製五花茶，一小渣奉上，唔使嗌多幾次咁麻煩。此外，亦關顧到唔方便飲凍嘢嘅人，熱飲包括柚子茶同綠茶。
肉類
反而，汁燒牛肋肉及法式香草羊架分碟上，觀感好啲。
雖然賣相欠奉，但啲肉嘅質素又唔差喎，牛舌煙韌有咬口，牛肋肉肉質細緻，牛柳肉又好腍滑，豚拖羅富油香，羊架亦羶香軟腍；唯一唔喺太鐘意喺啲雞翼起單骨，反正雞翼又唔喺大隻，就無謂仲斬開兩截。而香草醃得稍為重手咗啲，稍稍搶咗肉味。
海鮮類
因為升咗級，可以點虎蝦，帆立貝，仲加埋法式香草龍脷柳，小墨魚，牛油蒜蓉青口。虎蝦跟帆立貝確喺幾有睇頭，睇落都覺得有啲質素。
味道比預期好，尤其龍脷柳，唔會好似羊架落得過多香草。虎蝦爽甜彈牙，帆立貝好有肉地，小墨魚爽口好味。
燒咗幾轉，張牛油紙已經黑晒，侍應都好醒目幫手換紙。再燒多幾轉肉期間，點咗啲炸物同刺身攝吓時間。
炸物類
天婦羅有蝦、野菌、南瓜、地瓜（即喺蕃薯），樣樣剔不如點個雜錦一碟過。
天婦羅做得不過不失，南瓜同蕃薯都夠粉甜，喺炸漿厚啲啲啫。
刺身類
總共有7款刺身，因為老友喺刺身粉絲，所以，無懸念就一次過點晒。
整體刺身唔算高質，亦唔差，但升級嘅帶子則頗有水準，鮮甜味美。其後，仲留少少刺身拌飯，DIY刺身飯也。
野菜類、芝士麻吉
最後燒乜好？咪野菜囉，選擇得翠玉瓜、野菌、南瓜、粟米，唔使多諗又喺點晒。還要加多件芝士麻吉，究竟喺乜，個店員竟然賣我關子，話好好食，值得試！
因為佢唔喺明火嘅烤爐，所以粟米較難燒，要耐心啲慢慢燒。南瓜依然粉甜，野菌爽爽哋。而芝士麻吉就似喺芝士加炸魚片頭，燒香之後，芝士又溶溶漏漏，確喺幾好食喎。
一口日式御飯
臨尾貪得意，點咗一客「一口日式御飯」，叫得一口應該唔會多，可能成晚都未發市，點知嚟到有啲「賴嘢」嘅感覺，何止一口，直頭成碗，小弟一向唔嘥嘢，加埋啲刺身，一於刺身飯，照樣成碗頂晒佢。其實啲珍珠米幾軟糯，口感唔錯，加埋之前點嘅刺身，正架！
甜品
老友唔太啱，我就當然喜歡啦，所以，升級嘅意大利芝士蛋糕、雪米糍、綠茶雪糕及胡麻雪糕全部一網打盡，樣樣一客。意大利芝士蛋糕來貨嘢，不過不失，欠一點咖啡酒香；雪米糍喺芋頭味，啱晒我，而兩款雪糕都好好食，質感軟滑，綠茶及芝麻都十足。
最後30分鐘，就喺鯉魚旗出場，最後落單嘅溫馨提示，表示你要快啲點最後一輪嘢食嘞！
題外話，之前翻餐牌時見到佢哋仲提供定食（$48-$88），定價實惠，所以，嚟到唔食烤肉亦有其他選擇。
雖然肉類嘅揀選欠缺一啲富油花帶油香質素嘅肉類，但以咁嘅價錢，選擇又唔算少，任食任飲，想慳慳哋過吓燒肉癮，都喺個好唔錯嘅地方。
個人評分
味道：7/10
環境：7/10
服務：7/10
抵食：8/10
平均每人消費：HK$240
味道：7/10
環境：7/10
服務：7/10
抵食：8/10
平均每人消費：HK$240
餐廳資料：
鳴橋燒肉料理 Naru Kyou Yakiniku
旺角砵蘭街104號
2613 8830
鳴橋燒肉料理 Naru Kyou Yakiniku
旺角砵蘭街104號
2613 8830
沒有留言:
發佈留言