壹餅房 ocos：壹餅難求？

晌「南龍冰室」食完一個蝦醬炒公仔麵、一個芝士撈公仔麵及一客金磚焗咖喱雞扒飯，雖然身處冰室，照樣有精緻嘅飯後甜點，當然唔喺講緊普普通通嘅布甸、啫喱、忌廉蛋糕……等等。而喺對面「壹餅房」嘅出品，真喺估佢唔到，原來晌南龍可以點壹餅房嘅蛋糕。

壹餅房除供應甜品、蛋糕俾南龍冰室外，當然有做零售，仲有個裝大大個嘅蛋糕賣，大可賣嚟慶生日之用。

再細看「南龍」個甜品餐牌，前後兩頁，一共有10多款甜點，有件裝凍餅，亦有杯裝甜品，定價一啲都唔貴，都喺廿零蚊左近。最窩心喺，跟熱飲$25，跟凍飲先至$28，如果你揀最貴類別嘅蛋糕（$22），即喺加$3有杯熱飲，加$6有杯凍飲，仲唔抵到暈！

不過，依個甜品供應時間只由2:30pm至9:00pm，午飯喺黃金檔期，做埋甜品估計應付唔嚟，雖然南龍收11:00pm，但供應到9:00pm完，何解？因為壹餅房收9:00pm嘛，有心食就唔好磨咁晏。我哋都好晏先點甜品，所以，有啲款式都無咗，可以嘅話，點定先，讓店員先放晌南龍依邊嘅雪櫃，咁就多重保險食到想食嘅款式，咁就唔會一餅難求！

紐約芝士蛋糕 $22

幾款蛋糕中，紐約芝士蛋糕喺小弟最欣賞嘅一款，消化餅底做得非常薄，僅僅夠托起件餅已OK，而中間忌廉芝士餡夠豐厚、濃郁，挺身而柔軟，絕對落足料，而面層嘅酸忌廉亦恰到好處，酸香得平衡一下忌廉芝士嘅濃味，喜歡芝士味甜品嘅人，值得試吓佢。

意大利芝士蛋糕 $20

做法比較平實，無任何花巧或修飾，就只有咖啡酒蛋糕、馬卡風芝士及唂咕粉，$20以言，味道真喺不俗，蛋糕濕潤有咖啡酒香，芝士打得十分幼滑，唯一問題喺落得太多唂咕粉晌面。

情濃朱古力慕絲蛋糕 $22

雖然個層次做得唔夠靚，下層個朱古力海綿蛋糕太薄，中間層又做得太厚，但個朱古力慕絲實在夠情濃，朱古力味極之香濃，少甜而甘苦，柔滑度都OK，加埋餅面輕抹一層嘅特濃朱古力漿，成件事就喺情濃滋味，只賣$22，值得推介。

薄荷朱古力蛋糕 $22

薄荷朱古力雪糕食得多，但蛋糕印象中應該第一次食，估唔到效果都唔錯喎。朱古力海綿蛋糕夾住上下兩層薄荷慕絲，慕絲中又滲入好多朱古力碎碎，形成有點薄荷綠嘅雲石花紋。薄荷慕絲幾清新，有種涼快嘅感覺，久不久咬到朱古力碎糖，口感上添加趣味，可以不妨一試嘅選擇。

蛋糕嘅水準暫且難跟酒店嘅去相比，至少賣相仍有段大距離，但喺佢哋走嘅喺平實路線，唔搞太花巧嘢，感受到用料唔「求其」，有質素，所以出品亦有一定水準，再者，區區只賣廿零蚊一件，其實喺好抵食。

個人評分
味道：7/10
環境：7/10
服務：7/10
抵食：8/10
平均每人消費：HK$21

餐廳資料：
壹餅房 ocos
銅鑼灣邊寧頓街18號廣旅集團大廈地下3號舖
3583 1719