位處山林道近尾嘅Mini Club，門面好寬闊，一眼就認出。店內地方頗大，近窗位置，都喺高腳枱櫈，可透視街外景緻；而其他坐位，跟一般餐廳無疑，所以，晌度飲酒用餐都無問題。而牆上掛有好多懷舊美式嘅「鐵片」海報，讓人目不睱給，配合埋柔和昏暗嘅燈光，一派悠閒寫意嘅氣氛。
空肚飲酒好傷胃，所以店家準備咗多款小食，但估唔到形形式式竟然有16款之多，有冷有熱，大路嘅有炸薯條、雞翼、炸魚柳、沙律……等等，但不乏多款特色小食，如鮑片、皮蛋、粟米脆片、牛柳粒……等等，定價都只不過喺$42-$88，而且份量可比想像中多。
日式芥末厚切鮑片 $58
其實見佢小食有個厚切鮑片已覺得好搞鬼，鮑片以冰鎮方式處理，但為保持衛生，冰碎上包有保鮮紙。以$58依個價錢，鮑片喺素鮑吧？但咬落柔韌有咬口，蘸點日本芥辣及醬油，口感又涼涼爽爽，都算得上不俗嘅冷盤小食。
芝士焗肉醬伴粟米脆片 $88，
份粟米脆片做得幾好，不過真喺要趁快食，咪諗住慢慢嘆。芝士拼肉醬本身已香味濃郁，配合粟米脆片嘅硬脆，惹味小食之一。而粟米脆片上有一小撮加咗意大利黑醋嘅沙律菜，作中和之用，喺做菜心思嘅一部份。每客粟米脆片仲伴一小籃法式焗蒜蓉包，蒜蓉包富蒜蓉及牛油香，熱辣鬆脆，好味！
炸魚柳伴薯條配沙律菜 $88
魚柳睇嚟炸得比較深色，還幸未有過燶。魚柳入口外層極之鬆脆，一咬咔嚓應聲裂開，不油膩，魚肉亦都嫩滑味美；薯條伴有茄汁及沙律醬，沙律菜塗有意大利黑醋，眨吓眼，大家就極速搞掂碟炸魚柳伴薯，因為實在惹味吸引。
晌小食送上之時，我哋嘅嘢飲都陸續送上。酒嘅款式實在多，香檳、餐酒、烈酒、雞尾酒、汽水果汁……一應俱全。基本嘅雞尾酒本身已多達40多款，仲有一系列特色雞尾酒。
Mini (Special) $108
依杯認真喺天使嘅外表，魔鬼嘅內涵，賣相似極一杯奶昔，最抵死仲加兩條捲心餅及彩色朱古力碎糖，但以百利甜酒、香蕉肉、蛋黃酒、牛奶、菠蘿汁和糖漿溝成，就唔可以以奶昔看代。香蕉及奶味頗突出，口感比較杰身，又確有幾分飲奶昔嘅感覺，但慢慢酒精隨飲晒成杯而出。
.JPG)
NaMi $108
蘋果綠嘅NaMi，未飲賣相已好吸引，從電子餐牌所見，成份包括藍色柑橘酒、毡酒、鳳梨汁、茴香酒及糖漿，味道有啲複雜，飲落起初有份清爽，入口酒精度唔覺得乜嘢，原來友人話絕對唔好睇少佢，唔覺唔覺感受到酒精嘅力量。
Mint Punch $68
無酒精類別飲品，絕對清涼健康，因為只喺以薄荷糖漿、橙汁、菠蘿汁及梳打水做成，解渴透心。
除咗小食、飲酒，Mini Club仲有多款大盤，絕對可以晌度當食一餐飯，食飽先走。其實，晌街口已見佢有個易拉架做緊依個特別推廣，6隻生蠔或另外4款拼盤，加枝紅、白餐酒，都只喺$368 + 10%。不過，以上嘅生蠔（$122 / 4隻）或拼盤，亦有散叫。
海鮮拼盤 $238
嘩！嘩！嘩！一上枱大家嘅自然反應，的確份海鮮拼盤份量十足，有睇頭，餐牌已寫明包括波士頓熟龍蝦（半隻）、法國瞓覺蟹（半隻）、法國藍青口（6隻）、加拿大翡翠螺（3隻）、熟蝦（3隻）及車厘石蜆（1隻），全部冰鎮上枱，晌炎夏睇見都涼快。開邊波士頓熟龍蝦蝦肉鮮爽，瞓覺蟹蟹膏頗多，香滑滋味，藍青口味道一般，反而翡翠螺爽口鮮甜，熟蝦普普通通，而車厘石蜆只得一隻，拱手讓友人品嚐。
巴馬火腿、芝士拼盤 $238
同樣晌餐牌列明包括有咩食材，童叟無欺，當中包括巴馬火腿（3片）、黑毛豬辣腸（3片）、燈籠腸（5粒）、金文拔芝士（3粒）、百麗芝士（3粒）、巴馬臣芝士（3片）、全麥脆片（3片）和黑松露醬（10克），再伴以少少青瓜及沙律菜，似乎啲份量有多無少喎。巴馬火腿入口油潤鹹香，黑毛豬辣腸鹹香帶辣、燈籠腸味淡爽腍，幾樣都好適合佐酒；而幾款芝士以巴馬臣較熟悉，芝士味亦較濃，金文拔（Camembert）及百麗（Brie）則較少食，兩者都軟身啲，芝士味相對溫和，配點全麥脆餅及黑松露醬，味道又真喺幾正！
離開前，經理話5:30-8:30pm為歡樂時光，全單八折，既然咁筍，早少少埋單又何妨。整體而言，大部份小食或大菜都做得出色，定價唔貴，絕對食得過。不過，加埋飲酒就變得唔便宜，但偶爾拋開煩惱癲番晚，喺生活嘅調劑！多謝店方邀請，令我哋有晚歡樂時光。
個人評分
味道：8/10
環境：7/10
服務：8/10
抵食：8/10
平均每人消費：HK$0（試食邀請）
味道：8/10
環境：7/10
服務：8/10
抵食：8/10
平均每人消費：HK$0（試食邀請）
餐廳資料：
Mini Club
尖沙咀山林道29-31號A
2310 8850
Mini Club
尖沙咀山林道29-31號A
2310 8850
沒有留言:
發佈留言