大叻越式料理：叻極有限

朋友有揸車，又想去荔枝角嘅AEON買嘢，順便食埋飯，我都想行吓AEON個超市買吓零食，所以就跟大隊一齊過埋去食晏。其實本身去荃灣嘅AEON多過去荔枝角店，因為近西鐵較就小弟方便，所以，晌度食乜就由朋友發辦。問我一句越南嘢OK嗎？東南亞嘢一向啱我啦！

大叻越式料理晌AEON嘅2樓篤尾，老友熟晒架步，轉幾轉就兜到去，就晌寢室傢俬部側旁。採半開放形式，部份枱櫈向著商場，內裡裝修簡約，一盞盞菇形網狀吊燈頗具特色。可能喺星期日關係，加上附近幾個大型屋苑，眼下所見大多數喺家庭客。

餐牌底面兩大頁，包括飯類、撈檬類、湯粉類、大叻干撈麵、主菜、煲仔類、沙律、小食、菜類、飲品及甜品。除咗幾款較貴嘅2人套餐及4人套餐之外，星期日喺無午餐供應，至於平日或星期六有無就唔知嘞。最後，我哋決定散點，嗌番各自嘅喜好。

咖喱牛筋腩飯 $58

飯類有9款選擇，見佢啲套餐都有包括依個飯，心底盤算緊喺咪好嘢嚟，亦都好耐無食咖喱牛腩喇！牛腩炆得幾鬆化，筋位有韌勁，份量又十足，不過，說實在，咖喱嘅味道單一少少，而且賣相欠奉，真喺擺幾粒車喱茄或幾片青瓜都慳番。

炸蝦餅撈檬 $52

6款嘅撈檬，朋友所揀嘅炸蝦餅撈檬，蝦餅實在好少，朋友仲話佢唔爽彈添；撈檬伴有炸蒜及花生粒，加埋自斟嘅魚露，撈檬嘅味道算不過不失，但朋友都喺覺得唔抵食。

香茅豬扒干撈麵 $56

另一個朋友嘅香茅豬扒干撈麵，豬扒都喺只得一件，香茅味道OK囉，伴有幾粒豆卜，而干撈麵可選扁麵或油麵，但個麵無乜汁，真喺變咗乾撈。

食物味道一般，服務亦普普通通，吓吓都要示意先識得幫忙添水。雖然我哋只喺試咗幾款嘢，但單睇餐牌，菜式都比較大路，都喺啲常見嘅越南菜式，比起之前曾試過美孚嘅「小越南」及土瓜灣嘅「滋味館」，「大叻」俾小弟嘅感覺真喺叻極有限！

個人評分

味道：6/10
環境：7/10
服務：7/10
抵食：6/10
平均每人消費：HK$65

餐廳資料：
大叻越式料理
荔枝角深盛路8號碧海藍天AEON超級巿場2樓L201號鋪
2370 3998