既然懷舊喺賣點之一，裝修必然要花點心思。有別一般老店，室內燈光通明，光猛有力，告別老態龍鐘嘅感覺。細格紙皮石地磚喺必然嘅時光定格，仲有六、七十年代嘅海報畫冊，加埋天花嘅雀籠裝飾，雖然都只喺一啲代表性嘅表達，但已引起回想昔日人在冰室嘅情景。
餐廳還分有上、下兩層，經過窄窄嘅樓梯，就上到二樓。當然，最好坐就喺挨近窗邊嘅卡位，舒服，又可以望望街景。原來，二樓仲有一個小廂房，可以被人搞吓小聚會，不過，唔知有幾多人會晌冰室包個房嚟食飯呢？其實，一班老友圍埋包個房，炒吓小菜食吓飯，點都抵過上酒樓消費喎。
之前睇唔少食評都見人講過佢個餐牌，做到成本畫冊咁，的確幾得意，又借用番以前一啲賣座嘅電影名嚟二次創作吓，有趣搞鬼。至於食物方面，跟一般茶記唔會太大分別，又喺發揮茶記精神，乜鬼都有。
咪以為班後生店主搞間懷舊冰室鬧着玩，好多地方都做得一絲不苟，杯杯碟碟印晒店家標誌，店員總不hea做，快手快腳，態度有禮。我哋人少少，點幾樣嘢，嗌幾杯嘢就夠，志在嚟懷舊一番。
香茅雞翼蝦醬炒公仔麵 $52
炒、撈公仔麵餐一共有4款：香茅雞翼、雞扒、豬扒、五香肉丁，另外醬汁可選XO醬炒、蝦醬炒、芝士撈、咖喱撈、蕃茄醬撈，款款定價$52，包餐飲，凍飲加$3。
個公仔麵選用蝦醬炒，一送上枱超香，入口味道又唔會過鹹，麵條食落都還算爽身，而雞翼覺得較為細隻，唔夠肉地，不過，香茅味幾夠。
豬扒芝士撈公仔麵 $52
試過個炒公仔麵，又試吓個撈公仔麵喺點，對比起個炒嘅，撈嘅似乎大碟好多。先講豬扒，鎚得夠鬆軟，煎得幾甘香；不過，個麵就比起炒嘅就差咗啲，一來啲似乎有少少煮過籠，腍身咗，而個芝士汁較杰，所以，將芝士跟麵撈埋一齊，黏成一舊舊，叉起嚟都有啲麻煩。
金磚焗咖喱雞扒飯 $79
南龍金磚焗飯餐算喺店中名物，聽店員講都幾人多嚟幫襯試依個金磚焗飯餐，從餐牌所見，有焗咖喱、焗茄汁、焗白汁幾款味道，配雞扒、龍脷、肉醬、豬扒、海鮮、牛腩及牛肉等等，$79-$85不等，亦都包餐飲。
果然成舊磚頭咁，好巨型，真喺有得幾個人先好叫。「磚頭」外層烘得幾香脆，唔只有包食，內裡仲有炒飯底，加埋面頭嘅咖喱雞扒，鍾意點配合就點食，唔夠咖喱唔使怕，跟「磚頭」附帶額外仲有一小碗咖喱。咖喱雖較為港式，但味道幾濃香幼滑，辣度溫和，炒飯乾身配咖喱好食，以麵包沾咖喱一樣好味。
朋友喜歡冰室嘅檸茶、奶茶，當然奶茶我都啱，不過盛夏之時，偶爾一杯消暑嘅紅豆冰，可以爽快一下。
雖則南龍以懷舊冰室作賣點，但食物都做得唔錯，尤其個金磚焗飯。始終喺銅鑼灣地段，收費自然高一啲，不過，多幾個人一齊食，點個磚頭，保正超值，拉番勻，就覺得抵食，估唔到唔喺貴好多喎。
個人評分
味道：7/10
環境：7/10
服務：8/10
抵食：7/10
平均每人消費：HK$50
味道：7/10
環境：7/10
服務：8/10
抵食：7/10
平均每人消費：HK$50
餐廳資料：
南龍冰室 Nam Loong Cafe
銅鑼灣敬誠街1-3號地舖及1樓
3106 0820
南龍冰室 Nam Loong Cafe
銅鑼灣敬誠街1-3號地舖及1樓
3106 0820
沒有留言:
發佈留言