店舖位於利舞臺之上，裝修簡約時尚，部份地磚及一啲假百頁窗，都帶有少少復古味。一入口右邊喺4人座梳化卡位，其餘較多嘅都喺4人座圓枱或方枱，少部份就喺6人或10座大圓枱，此外，仲有啲半開放式嘅「廂房」（設最低消費）。又為咗帶出農家樸素嘅味道，偶爾見到一排排、一幢幢公雞碗或醬油碟，感覺煞是有趣。
唔知你對福建菜菜式有幾多認識，小弟就對佢頗陌生，翻一轉菜牌，了解一下福建菜有咩菜式。基本上，菜牌內都分門別類，又圖文並茂，部份特色菜更加入一小段描述，所以，點菜時都可以從中有更多參考。
飯前果
簡簡單單一小碗提子、西瓜、哈蜜瓜、火龍果粒伴少少碎冰，清涼透心，窩心在於免費供食客享用，而依個「驚喜」暫時開業免費送，未知幾時會完。
一品醉蚶 $65
生醃螄蚶真喺唔多店家願意做，風險高嘛，但晌莆田就可以食到，不過，每晚都供應有限。螄蚶肉厚鮮甜，鋪滿辣椒香蒜，惹味就必然，仲帶有少少酒香，實在叫人回味。
糖醋皮蛋 $39
一眾朋友都以為佢喺咕嚕肉，實情喺糖醋皮蛋，不過，製作上跟做咕嚕肉類同。糖醋汁調校不俗，甜酸有致，加埋皮蛋本身獨有嘅味道，一款幾新體驗嘅特色小食。
蝦苗伴紫菜 $42
軟軟潺潺嘅紫菜，食落有點醋味，配以蝦苗，但蝦苗下得少，所以，唔太食得出當中味道。事後留意到餐牌有紹，紫菜喺用上「頭水紫菜」，即喺頭一朕長成採割嘅紫菜，屬量少而營養高，真喺有啲失覺晒！
九轉小腸 $68
咩叫做功夫？睇佢「九摺式」一圈又一圈嘅「腸圈」就應該明白，唔單滷得入味，口感軟腍，再者，去晒內壁肥膏，有幾何食豬腸有咁健康嘅感覺。
土筍凍 $16
曾經跟親友晌廣州食過一次灼沙蟲，口感鮮爽，所以，面對土筍凍真喺無乜難度，況且，佢已經唔喺一整條沙蟲咁樣，唔講喺沙蟲呃人話喺筍條都可能有人信呀。其實，食落無乜味，啲沙蟲比較韌，而湯凍就爽爽滑滑咁，蘸一點日本芥辣及醬油，提提味，效果多啲。
冰浸苦瓜 $48
被喻為最薄苦瓜，的確刀工幼細，令到苦瓜片翠綠薄透，亮麗好睇。蜜糖喺刻意開稀咗，將苦瓜沾少少蜜糖，入口苦中帶甜，但又唔會太搶味，極之有趣。
酥炸蟶乾 $52
嚟自莆田生曬嘅蟶子乾，樣子非常趣怪，上粉酥炸，咬落有啲煙韌，可以話好好，蟶乾味道濃郁，我諗送酒水、啤酒應該唔錯。
以上一口氣試咗多款特色小食，跟住又介紹吓豆腐及蔬菜類，依個類別有唔少款式。
酥炒芋頭 $78 / 細，$116 / 中，$153 / 大
有種潮州菜反沙芋嘅味道，但佢嘅表面就偏濕少少，喺煮溶咗嘅糖。據介紹，雖然叫炒芋頭，但做法卻喺先煎，再炸，然後以沙糖再兜炒，故此，入口外層有份香脆感，而內裡芋香酥化，粗料精做，值得一試。
自製滑豆腐 $68 / 細，$100 / 中，$128 / 大
外觀跟廣東菜嘅紅燒豆腐相差無幾，但啲豆腐真喺外酥內滑，豆味突出，原來啲豆腐喺自家製，唔用來貨，好簡單用上蠔油汁，配厚肉嘅冬菇，及清甜嘅蜜糖豆，好一道反璞歸真嘅農家菜式。
藥膳竹筒蝦 $48
賣相骨子，以竹筒為碗，湯頭頗香，葯味香而不俗，又唔會太濃，兩隻大隻鮮甜爽牙，作為一個餐前湯水，喺唔錯嘅選擇。
炸馬鮫魚 $36 / 件（最少兩件）
每年馬鮫都裁得好大件，$36件實屬抵食，而且，炸得香口唔油，肉質實淨。不過，餐牌另列明$106 / 3件，其實只喺平兩蚊，感覺有啲搞笑啫。
原味燘黃瓜魚 $48
每一氣黃花魚都以小瓦煲盛載上枱，店家以自創2.5分鐘快速蒸煮法，只喺就咁加入薑蔥、海鹽吊味，魚質超滑，不過，小心食，挺多骨。
椒鹽豬手 $38 / 件（最少兩件）
講完少少海鮮菜式，口喺時候講肉類，依道脆炸豬手喺今晚嘅亮點，唔講真喺唔知，據介紹個豬手要先熬幾個鐘，逼出肥油，再炸，跟住鹵水，然後風乾，再炸好先上枱奉客。外皮好香脆，入口感到滿滿骨膠原，不過，一啲都無又肥又膩嘅感覺，除椒鹽，仲加有五香粉，怪唔之得咁鬼惹味。
莆田荔枝肉 $68 / 細，$100 / 中，$128 / 大
菠蘿咕嚕肉嘅荔枝版，味道甜甜酸酸，豬肉鬆化，基本上食味一啲唔差，不過，食慣菠蘿咕嚕肉大嘅小弟，個人而言，就唔太覺得依道菜有咩特別。
莆田扁肉湯 $68 / 細，$100 / 中，$128 / 大
喺福建歷史悠久嘅傳統家常便湯，偏肉喺一啲細細粒嘅福州燕皮餃，內裡有少少肉末，入口帶點韌勁，唔似廣東式雲吞皮咁柔綿，而湯頭較為濃味，如果清一啲唔知效果會唔會仲好！
興化米粉 $68 / 細，$100 / 中，$128 / 大
眼前依份喺大碟份量，真喺唔嘢少，米粉真喺超幼細，唔怪得被譽為「白如雪、細如絲」，話說米粉要手功做，又要曬太陽，功夫多多。米粉內有唔少海鮮，如鮮蝦、蜆肉，仲加入唔少配料，如紫菜、花生、西芹等等，真喺味道豐富。
講開個米粉，唔可以唔順手講埋佢哋自家製嘅辣椒醬，賣相可愛嘅小盅，辣味唔太強，易入口，微微帶出一份酸香，配米粉絕對成為好朋友。
一般中菜館嘅甜品都唔會有太多選擇，都喺三幾款志在應酬一下食客嚐甜之心，不過，嚟到莆田就真喺要留留肚試佢啲甜品，足足有12款之多，未必樣樣叫得好食，但喺有特色、有風味就值得讓人一試，而且，每款甜品都有一小段文字介紹，不妨睇睇當喺種見識都好嘛。
莆田印糕 $26 / 4件地道傳統風味甜點，餐牌嘅介紹喺以糯米粉及米碾粉做成糕身，內餡為花豆碎及豆粉，一咬鬆軟柔韌，但味道偏清，只可以講一試無妨。
綠豆紅團 $19 / 2件
喺喜慶日子嘅應節糕點，唔單止色澤鮮紅有種喜慶意頭，名字由來亦帶有團團圓圓之意，據祖藉福建嘅食友講，外皮應為煙韌香糯，不過，今日所試可能喺失準之作，外皮及內餡都有啲乾。
黃金京粿 $26 / 4件
哈哈，有種煎年糕嘅感覺，京粿以糯米和粳米搓成，再煎成金黃，外脆內軟又唔黏牙，口感煙糯少甜，如喜歡煎年糕嘅話，依款煎京粿應該都合你口味。
蕃薯餅 $36 / 4件
一向都喜愛蕃薯朕自然甜味，餅皮軟綿煙韌，內裡番薯蓉香甜柔滑，味道一流。
黃金紫薯泥 $36
依個紫薯泥，賣相絕對一絕，簡單嚟講，就喺南瓜露配紫薯蓉，兩款都喺心水食材，前者幼滑清香，唯南瓜味未夠突出，而後者香滑軟綿，實屬不俗。
白果芋泥 $26
跟黃金紫薯泥相似，只喺南瓜露換上白果露，而紫薯蓉變為芋頭蓉，白果露入口清潤，芋頭蓉則香濃軟綿，仲以為喺個幾新鮮嘅配搭，原來晌福建已有百多年歷史架啦。
薄荷枇杷凍 $36
勁嗜甜嘅小弟，又點可以唔多試幾款，可惜好多甜品都沽清，最後一道甜品就喺依個薄荷枇杷凍，特別嘅名字已吸引我要點一客嚟試試。以草藥所做嘅果凍涼涼爽爽，口感跟一般果凍無太大分別，只喺味道甘甘哋，甜甜哋，裝飾用嘅一整粒枇杷千祈唔好錯過，因為，枇杷喺莆田名物嚟。
試咗咁多咁有特色嘅菜式，真喺令小弟對福建菜多咗一份認知，實在有幸掹着食友車邊前來試菜，亦多謝公關款待，唔嫌小弟貪心試完一款又一款甜品。
個人評分
味道：8/10
環境：8/10
服務：8/10
抵食：8/10
平均每人消費：HK$0（試食邀請）
味道：8/10
環境：8/10
服務：8/10
抵食：8/10
平均每人消費：HK$0（試食邀請）
餐廳資料：
莆田 Putien
銅鑼灣波斯富街99號利舞臺廣場7樓A舖
2111 8080
莆田 Putien
銅鑼灣波斯富街99號利舞臺廣場7樓A舖
2111 8080
沒有留言:
發佈留言