美心MX Maxim's MX：足球狂熱擦擦卡

近嚟多嘢搞，都唔太想煮飯，又再做一晚「無飯」夫妻咁啦，食埋晚飯先返歸，乾手淨腳嘛。知道美心又再推出「打冷」嘢，所以，有心過嚟一試，而最近又推出一個「MX足球狂熱．玩不停」擦擦卡遊戲，單一消費食滿$48就獲擦擦卡一張。先多謝公關邀請，讓小弟參與是次宣傳活動狂熱一下。

講明為個「打冷」而嚟，當然點一客「打冷」套餐，套餐分$47 / $45，前者有鹵水鴨件拼其他鹵水食材（如大腸、墨魚、紅腸或腩肉），而後者則無鹵水鴨件嘅鹵水雙拼，所有套餐己包白飯 / 潮州粥、老火湯、大豆芽、茗茶。

鹵水鴨件拼墨魚「打冷」套餐 $47

或者唔可以跟一啲城中出名嘅鹵水店相提並論，但$47咁嘅價，已相當抵食，一大碗鹵水餸料有齊鹵水鴨件、墨魚、鹵水蛋、鹵水豆腐（墊底），份量不少，鹵水幾入味，無過鹹，鴨肉頗鬆化，而墨魚又軟腍；拌菜嘅大豆芽亦幾爽甜，潮州粥做得唔錯，少啲米，多啲水仲有神髓；喺個老火湯（例湯？）較為一般。

依家食快餐都唔平得去邊，不過，美心每晚都有個「餐餐有得慳」嘅套餐，一個飯，一杯熱飲，都只喺賣$30。作為「慳家」一名，我都揀個「有得慳」嚟試試，不過，成日辛苦做嘢，又唔使慳得咁盡，所以，加$7.5轉配MX凍紅豆奶茶。

石鍋翠玉瓜雞柳炒飯 + 凍紅豆奶茶 $30 + $7.5

個石鍋炒飯飯底未夠乾身，可以再做好啲，而味道都OK，幾惹味，翠玉瓜就幾多，喺嫌佢雞柳少啫；至於個凍紅豆奶茶又幾好飲，奶茶不俗，有茶香，而紅豆落得無手緊，十分之多，老婆就啱晒，結果，佢食紅豆，我就飲晒啲奶茶。

講番張擦擦卡，遊戲分兩部份，第一波喺「即擦即賞」，獎品有汽水、紅豆冰、凍紅豆奶茶、雞翼、MX現金券，總共有成500,000份，睇嚟都幾大手筆喎。

小弟一向都無乜抽獎運，返到屋企擦一擦，估唔到今次擦中免費百事系列汽水（12安士）一杯，仲要全日適用，啱晒啦，近日天氣咁熱，行開街熱到溶時就可以換番杯解暑，最正喺免費換，唔使再要買嘢咁搵笨。雖然個遊戲去到7月12日，但張汽水劵就8月31日先到期，唔使急住用！

講明遊戲有兩部份，第二波「幸運狂賞」喺用印喺擦擦卡後面嘅QR code上官方Facebook，用張擦擦卡編號玩遊戲，其實都好易，撳左撳右守龍門，撳撳吓被小弟撳咗3次抽獎機會，不過，我估我依個成績都應該唔喺好叻。獎品有170份限量精品及現金券，當然，希望抽到$200 Nike現金券啦！

近來，發現美心MX仲提供免費Wifi，雖然只有60分鐘（每日3次，每次20分鐘），我估你都唔會長時間晌快餐店打躉架？所以，一般而言都夠晒普通客人用啦。

今餐飯先賺咗杯12安士汽水，希望中埋個$200 Nike現金券獎，咁就賺突喇，哈哈！

個人評分

味道：7/10
環境：6/10
服務：6/10
抵食：7/10
平均每人消費：HK$43

餐廳資料：
美心MX Maxim's MX
尖沙咀科學館道14號新文華中心1樓147-153號舖
2311 8589