山區裡的走走趯趯: Wolf Den Café：我的星期六美孚早餐 ~ 呻笨之選

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2014年5月3日星期六

Wolf Den Café：我的星期六美孚早餐 ~ 呻笨之選

晌美孚區可以食到All Day Breakfast（全日英式早餐）嘅店子唔多，以前有間La Kaffa，試過一次叫做OK啦，不過，做咗無耐就執咗。同鋪位接手嘅Star Hill Kitchen，都有全日英式早餐供應，由於試過佢一次晚餐，質素真喺唔得，所以，就無再試佢個早餐。最近，晌蘭秀道街尾迴旋處個角位，開咗間新Café，名字叫Wolf Den，所以，就搵個星期六朝早走入依個狼穴見識見識一下！

齋睇鋪面，其實個外觀幾骨子，一片歐陸田園小木屋風格，又掛有少少盆栽點綴一下。不過，鋪外嘅露天位就唔多討好，一來餐廳無安裝可伸縮嘅簷篷，真喺日曬雨淋；二來，樓上就喺住宅，唔擔保有咩高空擲物事件發生；三來，嗰個位置對出就喺馬路，丁點荔枝角公園景，查實即喺無乜景，故無咩誘因會坐出去。

室內又點呢？其實，間鋪嘅面積唔大，做咖啡室都適合，有啲格調嘅裝修，又擺咗一啲狼嘅雕塑品，而且，有部大電視不停播有關狼嘅紀錄片。不過，個人認為，傢俬絕對喺一個錯配嚟！地方淺窄，入門兩邊仲要放啲掗掗拃拃嘅大梳化椅，好坐就幾好坐，但出入超唔方便，真喺唔明店主點解會咁安排！而中間幾張二人枱又焗住拍到貼一貼，隔離枱講咩唔想聽都會聽到！

室內環境

一角嘅小擺設

小店買嘅食物比較簡單，除全日英式早餐全日無間斷供應之外，6款早餐晌8:00-11:00am供應，（$48-$68），至於早餐以外，11:00pm後有熱狗、漢堡、焗薯餐（$80-$126），此外，亦有提供3款沙律（$78-$108），以及幾款小食（$28-$138），如美式栗米熱狗、烤香辣蜜糖雞翼……等等。點餐形式，自己到櫃位落單，再拎個號碼牌埋位等送嚟，無加一服務費。

鬆脆牛角包早餐 $48

牛角包倒喺鬆脆，不過，送到上枱只帶微暖。牛角包可揀配蛋沙律、吞拿魚沙律、火腿芝士，老婆揀咗後者，牛角包內夾住烘過嘅半塊火腿及半塊芝士，底下墊有青瓜片、蕃茄及生菜，普通嘅火腿搭普通嘅芝士，個味道都只可以講喺普通。伴碟有啲啲沙律菜，以少少黑醋撈過，令個牛角包早餐美觀啲。

牛奶朱古力

反而杯餐飲有驚喜（只限外觀），因為雖然只喺一杯牛奶朱古力，但打起奶泡拉少少花，加分不少；其實加奶泡都唔喺咩新鮮事，同區「又一間」嘅華田都喺以奶泡代替花奶，但就唔會拉花。奈何，朱古力味實在薄弱，可能要拉花，比一般落花奶而加多咗鮮奶（奶泡），其次，啱啱被小弟望到佢哋喺用深藍罐嘅吉百利朱古力粉嚟沖，而唔喺用橙罐嘅唂咕，朱古力味嘅濃郁度差天拱地。

狼穴英式早餐 $128

個All Day Breakfast定價認真貴，唔喺單睇個價錢問題，計及埋質、量先話佢貴。一份全日英式早餐包括有：黑松露炒蛋、煙肉、火腿、香腸、炒磨菇、焗豆、多士、薯格、沙律菜及烤蕃茄。食材種類確喺幾多，但份量算喺少，好似火腿得半塊，香腸只有數片；除咗個黑松露炒蛋較為做得似樣之外，其他都不過不失，但喺多士猶如無烘過，薯格唔熱唔脆，賣相亦只喺堆堆砌砌，所以賣成百幾蚊先覺得佢唔值。