其實黑布街本身已有唔少甜品店，以前嘅「下一站...甜品」所賣嘅都有中有西，較少少港式，但又頗新派，翻睇舊店食評就能略知一二。但新鋪轉型，就擺明主打酒店級甜品，唔喺一般港式乜撈物撈、乜珠物珠之類，反正幾位合伙人都喺出身自萬麗海景酒店嘅甜品師，年資皆不淺，有嘅喺實力，製作自不然大膽啲、天馬行空多啲都得，無拘束。
如果你正正食緊個酒店級嘅甜品，但時空交錯喺坐緊晌松記、綠林，有咩感覺呢？心裡可能有個「錯晒」嘅感覺，所以，店家亦嚟個型格大翻新，全店實木枱椅，部份配置高腳枱椅，開放式廚房，一側書櫃玩味十足，幾把懷舊吊扇，廚房後亦有多組枱椅，走嘅喺甜品吧嘅路線，就算晌旺角區，都有種身處蘇豪嘅感覺。
既然目標清晰，啲甜品要做到酒店水準，自不然要落足心機。從餐牌所見，一共設計咗21款甜品，多樣化嘅組合，配搭見心思，賣相亦花功夫，部份甜品仲加入少少份子料理元素，精彩而有驚喜；另外仲有一啲咖啡、花茶果茶、無酒精雞尾酒以供選擇。就算一班朋友嚟到，唔喺個個都鍾意食甜品，都可以飲吓嘢。
雲呢拿泡沫配榴槤雪葩 $56
就算對榴槤未到鍾愛程度，亦對佢有多少偏好，所以，一見有榴槤雪葩，自自然然就好想一試。「泡沫」系列一共有4款，兩款暖泡（暖朱古力泡沫、暖拖肥泡沫）及兩款凍泡（雲呢拿泡沫配榴槤雪葩、綠茶泡沫）。雲呢拿泡沫喺以芒果肉、榴槤雪葩、雲呢拿泡沫及金柚所組合而成，芒果肉清甜大件，供貨問題，榴槤雪葩改為榴槤雪糕，但依樣香濃馥郁，雲呢嗱泡沫入口如慕絲般輕柔，而金柚雖未喺當造，食落有少少澀，但飽滿爆汁。整個甜品配搭幾新鮮有趣，當然，最愛喺嗰一球榴槤雪糕啦。
粟子拿破崙 $55
拿破崙都已經成為唔少甜品店嘅必然出品，因為拿破崙仍然喺大眾喜愛嘅甜品之一，原因都喺因為其鬆脆酥皮，故此，各店嘅酥皮就成為成敗分野。不過，晌「下一站」嘅酥皮跟出面常見嘅有啲唔同，主要個個焗製，一眼就睇得出佢層酥皮喺個別焗製，所以邊位喺圓滑啲，而出面通常喺一大塊做，焗完再裁細合適呎碼做拿破崙。試完「下一站」嘅酥皮，我覺得鬆脆度無乜太明顯分別，但就油份少啲，最主要喺賣相細緻咗。而中層及面層，唧滿粟子蓉，非香幼滑粉香，濃濃粟子香。此外，裝飾真喺不可不提，先講拿破崙面嘅紅色脆糖，薄透輕巧，薄脆少甜； 3粒「馬令」（Meringue）蛋白脆餅，既有杏仁香，又有煙韌口感。而碟邊仲有少少脆餅碎，反而最有驚喜喺頭尾兩側紅莓乾，初時以為喺啲紅色糖粉，沾一沾先知喺酸香突出嘅紅莓乾，佩服幾位餅師對依啲細節位都一絲不苟。
黑胡椒心太軟配雲呢拿雪糕 $55
心太軟已經成為好多女性嘅心愛甜品，尤其流心一刻，份外興奮。早前去大馬一遊，參觀當地朱古力博物館，試過一款辣椒朱古加，感覺新奇有趣，所以晌度見到「黑胡椒心太軟」，有種莫名衝動想試。賣相相對上兩款平實，唔算太花巧，只喺一抹紅莓漿、少少脆餅碎、朱古力脆豆做裝飾，加多一個雲呢拿雪糕球。一切開，朱古力漿湧流而出，份量啱啱好，想太多漿不如去Vero Chocolates飲杯濃厚嘅招牌黑朱古力吧！蛋糕唔會太薄太厚，外層帶少少焦脆，雖然個心太軟送到嚟熱呼呼，但會喺「聞」唔到丁點黑胡椒味，不過，一入口先喺濃郁朱古力味，繼而散發一朕眹辣勁，喺一種有層次嘅感受。以前曾經晌工聯會學過整心太軟，都喺溝成一種朱古力漿落模焗，靠時間控制，做成外層熟成為蛋糕，內層半熟為漿，故此，內外味道一致。但事後再跟店主交流，先知佢哋分兩層用料，外層蛋糕漿以55%朱古力做，內層朱古漿則以70%做，所以，功夫要多一步，先做好內層嘅「膽漿」雪硬，再放入蛋糕漿中去焗，下次再食真喺要細心留意一下。
Test Tube $65
晌餐牌中見到依款由Mojito（白冧酒啫喱，青檸慕絲，薄荷啫喱）、伯爵茶奶凍配特濃咖啡泡沫、青瓜山葵沙冰（圖：左至右）組成嘅新穎「試管」甜品，出於好奇幾想試，可惜部份「試管」缺少原材料製作，未有緣一試。不過，店主話唔介意都可以試試青瓜山葵沙冰，俾俾意見，所以，都有幸試到1/3支試管。青瓜山葵沙冰，入口冰涼，口味清新，青瓜跟山葵都幾夾，清爽中帶點點辣，非常有趣嘅體會，個人感覺沙冰再刨得幼細少少，口感更順溜。溫馨提示，沙冰要盡快食，否則溶到底嘅會變成青瓜山葵汁，辣度攻鼻感倍升。
Mango Smoothie $38
甜品做得有質素，故臨尾又想試試佢啲飲品又做成點！初夏下午，外間非常悶熱，熱飲免問，就點咗一杯Mango Smoothie，成份只有鮮芒果肉、牛奶、原味乳酪打成，入口爽快透心、質感柔滑，芒果味自然清甜，唔止解渴，令人立時降溫。題外話，最初Smoothie登陸香港，見有人譯為「沙冰」，其實唔喺太啱，因為佢又唔喺果汁冰；後尾見有譯為「思慕雪」，小弟就覺得音譯、意譯俱佳；最近，又發現有譯為「思慕昔」，去走個雪字，同沙冰完全劃清界線，而且，加入牛奶令質感真喺幾似奶昔，但又加上乳酪，更健康之餘，亦無奶昔咁甜，真喺一個唔錯嘅譯名。
部份甜品都會配上指定雪糕，但為顧及唔同人嘅口味，其實雪糕口味可自由配搭，包括：雲呢拿、朱古力布朗尼、野莓乳酪、曲奇、綠茶、芒果乳酪、青檸雪葩。而額外加$10可加多一球雪糕（只限以上7款口味），非常超值；若肯俾多少少，加$8雪糕可轉榴槤雪葩，加$15更可多加一球榴槤雪葩。貨源供應，最好到時向店員查詢。
雖然個價睇起嚟好似唔平，但計及環境，用料質素，製作心思，繁複工序，絕對喺抵食。再者，所試到嘅幾款甜品，都跟圖片中預期大份，尤其支試管，初時以為佢好細支，哈哈！嚟到「下一站...甜品」，實在樣樣都想試，所以，小心你嘅荷包呀！講開荷包，最近新學咗一個廣東話謁後語：「老公荷包」，答案在下。再次多謝店主，讓小弟跟同為愛好整甜品嘅友人有個甜蜜、驚喜嘅下午。
個人評分
味道：9/10
環境：8/10
服務：8/10
抵食：8/10
平均每人消費：HK$0（試食邀請）
味道：9/10
環境：8/10
服務：8/10
抵食：8/10
平均每人消費：HK$0（試食邀請）
餐廳資料：
下一站...甜品 Next Station ... Dessert
旺角黑布街13號地舖
2668 8355
下一站...甜品 Next Station ... Dessert
旺角黑布街13號地舖
2668 8355
謁後語答案：膚淺（夫錢）
沒有留言:
發佈留言