晌依一截昏昏暗嘅渣華道好易認出綠野仙踪，因為草綠色鋪面，加上射燈，非常鮮明。而內裡環境，亦以唔同層次嘅綠為色調，一邊仿磚牆仲畫有草草樹樹，有種童話原野嘅感覺，份外醒神；再者，樓底夠高，令空間感更強，暫且放低一切忙碌，好好享受吓台式休閒。
休閒還休閒，都要睇睇有咩好食，原來選擇甚多，由台風早餐、台式常餐、午市特價套餐、百搭下午茶、人氣茶餐、廚師推介、星級鐵板餐、2人或3人自選套餐……等等，真喺咩時間嚟食都得。但不期然，你就發現話就話主打台式，但又似乎包羅萬有。
台風早餐
台式常餐、午市特價套餐
百搭下午茶、人氣茶餐
廚師推介、星級鐵板餐
台式特選餐飲
其實計落，個2人自選套餐最抵食，$158包1款主菜（4揀1）、2款小食（12揀2）、2份香飯（4揀2）及、2杯特選台式餐飲。
此外，有一本印刷仲精美嘅主餐牌，內裡嘅款式精緻啲，提供風味小菜、地道小吃，有升級優惠加錢變套餐（+$25送前菜、香飯、及特選台式餐飲）；仲有一系列台式湯麵，同樣有得升級，喺+$5附送特選台式餐飲；而餐牌尾幾頁就喺一貫台式嘅雪糕、多士、甜品、飲品……等等。
風味小菜
地道小吃
台式湯麵
冰淇淋及吐司系列
甜湯系列
不過，老婆有啲嘢想試，但個2人自選套餐唔包，此外，又想食佢啲台式湯麵，結果，就晌個主餐牌度落手，再加錢轉為套餐，一樣有彈性，又選取心水菜式。
芥茉雲耳 $15老婆特鬼別鍾意食雲耳（黑木耳），話佢潤肺生津、降低血栓、對人體消化系統好喎。雲耳好爽口，因為佢本身較淡味，加咗芥末及芝麻，醒神為之一震，而芥茉味都幾強烈，但就只係得一「朕」，辣味唔會太持久，亦唔攻鼻。
七味魷魚球 $35
22款地道小吃中，再揀嚟另一款喺「七味魷魚球」，都幾大碟，有齊魷魚圈、魷魚鬚，睇個份量基本喺一隻鮮魷做。粉漿都幾薄，幾酥香彈牙，蘸些喼汁，提味去膩，食起嚟唔似雪藏貨，不過咁嘅價錢，應該唔會新鮮貨吧！
前菜（跟餐）
個魷魚球我哋加$25變餐，先嚟有個前菜「涼拌大豆芽」，芽菜爽口多汁，辣辣哋，幾醒胃。
貴妃炸醬飯（跟餐）
老婆一向注重健康，所以香飯原本揀紅米菜飯，可惜無晒，退而其二要咗貴妃炸醬飯。佢喺咩嚟？主餐牌面頁有一整版介紹，大家睇圖，小弟就唔多講，原來散叫要$20碗，不過，唔知同跟餐嘅比較喺咪同一份量。個貴妃炸醬飯果真香辣惹味，飯粒軟綿有飯香，可惜個炸醬唔多。
香蕉朱古力牛奶（跟餐再+$8）
升級轉餐包一杯指定台式特選餐飲（共8款），亦可另加$8改為大杯裝特飲，又或以半價改選主餐牌中其他飲品。去親台灣，都好鍾意飲佢哋啲生果奶，所以，唔介意再加$8轉飲香蕉朱古力牛奶，個牛奶真喺幾正，夠冰凍，濃郁香滑，香蕉味跟朱古力味都好平衡。
招牌三鹵擔仔麵 $48
老婆所揀嘅台式湯麵喺招牌三鹵，仲可以免費改為新竹米粉。米粉比起廣東麵鋪食嘅米粉幼滑啲，有韌勁啲，亦唔會好腍；而三鹵有鹵肉、鹵蛋、鹵大腸，以及肉燥，不過，話雖「招牌」，味道喺唔錯嘅，但感覺又唔算極之好特別。
麥芽豆漿（+$5）
啲台式湯麵本身唔包飲品，但可加$5揀選一杯指定台式特選餐飲，都話我老婆健康架啦，心裡一早已估佢要麥芽豆漿。佢話個豆漿嘅豆味不俗，又少甜，但我就覺得有少少淡口，依啲就喺食得清淡健康同濃膩不衡嘅分別嘞。
其實食到依刻都差不多，不過，被店員推介吓佢，又有少少心郁，因為啲豆腐花佢話喺自家撞，唔喺來貨，所以，就點咗一碗牛奶紅豆豆腐花俾老婆，小弟就要蜂蜜珍珠豆腐花。
牛奶紅豆豆腐花 $20
個豆腐花滑得嚟挺身，真喺幾得，加埋少少牛奶晌面，多咗奶香及增加埋滑溜感，紅豆又好綿，老婆都讚好，不過紅豆實在好少喇！
花彫薑茶小丸子 $30
喂喂喂，又話喺「蜂蜜珍珠豆腐花」，唓！落完單無耐，個店員走嚟話啱啱得番一碗豆腐花，所以牛奶紅豆豆腐花照有，我就只好轉揀花彫薑茶小丸子，因為加「花彫」真喺未試過。記得食大閘蟹時，通時飲一小杯花彫酒，餐後一碗薑茶湯丸，以作驅寒之用。講番個小丸子，個薑茶幾重薑味，入口頗辣，又滲出花彫酒香，而小丸子小巧煙糯，以為喺新鮮搓，因為都等咗成10分鐘先嚟，事後個疑似店長好老實話喺來貨，真喺估佢唔到。話到尾，依個糖水留待秋冬天食合宜啲！
真喺兩個豆腐花落咗單，先話得番一客！真可惜！
雖然台菜嘅旗幟唔算十分鮮明，但質素不賴。以休閒café形式運作，卻有店員招呼，又唔使自己捧餐，卻喺無收加一服務費，價錢都實惠OK，而且，勝在選擇多多，轉唔轉套餐都好自主。
個人評分
味道：8/10
環境：8/10
服務：7/10
抵食：8/10
平均每人消費：HK$93
味道：8/10
環境：8/10
服務：7/10
抵食：8/10
平均每人消費：HK$93
餐廳資料：
綠野仙踪 Greenland Corner
北角渣華道98 號地下2 號舖
31000076
北角渣華道98 號地下2 號舖
31000076
沒有留言:
發佈留言