母親節跟所有節日一樣，都喺各大商家搶灘之日。美心西餅依次嘅攻勢，都幾緊要，一口氣出咗7款蛋糕或甜點應戰，包括：甜入心（$588只限預定）、花鑽禮盒（$188）、Tiramisu花園（$188）、花之彩虹（$198）、向日葵芒果脆脆（$228）、心花綻放（$168）、玫瑰盛放（$128）。總之有大有細，又有唔同口味，梗搵到一款氹你媽咪歡喜。
此外，仲有5款無放晌主打廣告牌之內：幸福之家（$380）、太陽花黑森林（$198）、天使蛋糕．魔鬼蛋糕（$168附母親節裝飾插卡)、有花Cake（$118），都喺由之前出過嘅蛋糕演變出嚟，不得不佩服餅廚們心思。
今之獲贈喺賣相最有「貴氣」嘅花鑽禮盒（Diamond Box），其實，唔止蛋糕，就連個蛋糕盒亦充滿母親節氣息，粉紅色底，配以大小不同嘅紅玫瑰及黃玫瑰圖案，洋溢溫馨之感。仲有，細心留意到，美心依家啲餅盒較以往更硬淨咗，拎起嚟都安心啲。
花鑽禮盒個造型真喺合晒母親節用，潮流又興像真度高嘅立體蛋糕，一隻唔知幾多卡嘅鑽戒，加兩樖嬌艷小花，放晌粉紅色咕臣上，維妙維肖之外，更喺精緻華麗，媽媽收到，未食已掛滿笑容啦。
裝飾用嘅鑽戒及小花，都喺以白朱古力做成，雖然白朱古力一向非常甜膩，老實講，確喺有啲好睇唔好食，不過，如此有心思晌裝飾上，做得又咁巧妙，都值得多欣賞。
而下面嘅「咕臣」，喺以士多啤梨味白朱古力做嘅底殼，盛托住士多啤梨慕絲蛋糕，由下而上，有新鮮士多啤梨薄片、鮮忌廉、海綿蛋糕、士多啤梨果肉及士多啤梨慕絲，一層疊一層，亦見花唔少功夫。食味方面，雖則無咩驚喜，但仍保持番美心嘅一貫蛋糕水準，忌廉滑溜、海綿蛋糕鬆軟、慕絲綿柔，每個細節都恰如其份。不過，仍有唔少要挑剔嘅地方，其一，實在太多白朱古力嘅部份，小弟都自問算嗜甜，食咗半個心形手飾盒，都有少少頂唔順嘅感覺；其二，蛋糕底殼以白朱古力做，好硬好實淨，切起嚟一啲都唔容易，可能基於定形嘅問題，需要如此「下策」，若換轉撻皮又唔知得唔得呢？效果又會唔會好啲呢？
唔夠一個星期就喺母親節，你仲未諗到點慶祝？至少都買個蛋糕氹佢開心，傷腦筋都只喺諗揀邊一款啫。仲有，美心依次嘅母親節蛋糕系列，另有一套心意卡，除印有唔同款式嘅蛋糕，最特別喺部份心意卡做成名信片咁，大可送上蛋糕之時，附上一張親手寫下祝福語或心底話嘅心意卡，相信更窩心，更甜蜜。
決定都照出依篇食評，就喺希望睇到嘅朋友，無論買唔買個蛋糕，都可以向你嘅媽媽表達一下愛意或關懷，免得將來有絲絲遺憾！
個人評分
味道：6/10
環境：7/10
服務：7/10
抵食：7/10
平均每人消費：HK$47（參考值，以4個人分享一個蛋糕計）
味道：6/10
環境：7/10
服務：7/10
抵食：7/10
平均每人消費：HK$47（參考值，以4個人分享一個蛋糕計）
餐廳資料：
美心西餅 Maxim's Cake Shop
尖沙咀西鐵線港鐵尖東站31號舖
2367 3396
美心西餅 Maxim's Cake Shop
尖沙咀西鐵線港鐵尖東站31號舖
2367 3396
沒有留言:
發佈留言