The Pudding Nouveau：蔥出大坑

一提起搵薑蔥做菜，如薑蔥炒蟹、薑蔥焗蠔……等等，都離唔開啲中式海鮮菜式，但講到西菜，算小弟見識少，印象中將兩者同時採用就好似無。最近，睇到啲食評，大讚一道「薑蔥龍蝦尾意大利麵」，出自大坑嘅「The Pudding Nouveau」，呢間法式小店我都好耐無嚟，所以，趁此順便約約老友聚舊。

今回事隔幾年重訪，覺得環境稍稍翻新過，但基本樣貌就無乜點變，一室黑與白，簡約嘅環境，清靜嘅氣氛，保持住法式小店嘅感覺。

經過多年經營，餐牌上嘅主打菜式亦越嚟越多，例如法式油封鴨脾、小龍蝦牛角酥、經典英式全日早餐……等等，都喺好嘢嚟。飲品方面，亦較多元化，特色咖啡及熱茶唔在講，仲有特飲、沙冰及奶昔。

此外，佢哋嘅甜品亦做得有一手，好似啲招牌嘅窩夫、各款梳乎厘、烏龍茶法式燉蛋，都喺小弟心水。睇睇餐牌你就知，佢哋供應嘅甜點確喺幾多選擇，所以，唔少人嚟主要喺食甜品，嘆咖啡。

Curry Crayfish Croque Monsieur $148

佢哋嘅小龍蝦牛角碟酥好得，所以，今次就試試道咖喱小龍蝦多士，咪以為得件多士，仲伴有脆薯條及沙律菜，而且，一如過往，薯條唔喺就咗配啲茄汁，而喺自家調製嘅黑松露沙律醬，食起嚟味道更細膩，再者，啲薯條又脆又唔油。

而講到件多士，非常足料，因為一拎起就好有墜手感，入口，小龍蝦肉頗為爽口，有鮮蝦味，陣陣咖喱，又夾雜芝士嘅香味，令味道變得更富層次，個配搭亦意外有啲驚喜。

Pudding Lobster Tail Angel Hair $198

呢一道「薑蔥」菜式原來喺限定出品，因為晌餐牌搞唔到，而喺晌印向牆上嘅海報。由於用天使麵效果無咁好，大廚話今晚改用咗意大利粉試試，其實，天使麵一向都好難處理得好。

上枱，嗰朕薑蔥味堅勁，香氣四溢，的確，非常香噴噴。而賣相都同樣誘人，大大件龍蝦放晌面。

先試幾炷意大利麵，煮得恰到好處，口感啱啱好，柔韌有致，而且，既有蝦鮮味，又有薑蔥嘅香味；龍蝦肉就簡單3個字：爽彈鮮，就歸納到佢嘅亮點，所以，整體道意大利麵真喺高水準，正所謂物有所值。

Cafe Latte $40

今次杯鮮奶咖啡真喺有別佢哋一貫嘅水準，無靚嘅拉花都喺其次，沖泡嘅手勢真喺差啲啲，入口濃縮咖啡跟奶泡撞得未咁均勻，還好嘅喺，始終用嘅豆都喺靚貨，所以，咖啡味醇香。

Cappuccino $40

老友就喜歡豐厚嘅奶泡，所以，就自然揀意式泡沫咖啡。反而呢杯就沖得幾好喎，老友話啲奶泡綿密又挺身，咖啡芳香醇和，熱度又剛好。

題外話，食飯賺里數都唔喺咩新奇事，而晌度食飯，可以用Apps「Mileslife」賺到里數，對於有儲開里數嘅朋友，就不妨留意吓。

The Pudding Nouveau晌大坑都紮根咗好多年，好多餐廳做到成熟，就會開分店，未知幾時會見到佢哋衝出大坑，晌九龍區開番間分店，咁就更加就我哋啲「九龍人」嘞！

個人評分
味道：8/10
環境：7/10
服務：8/10
抵食：7/10
平均每人消費：HK$235

餐廳資料：
The Pudding Nouveau
大坑京街17A地下
3585 7325