名館 Ming Bistro：旗幟鮮名

難得約咗舊中學同學食晏，點都要搵間坐得舒服，食物有質素嘅，尤其是晌中環區，午市繁忙時段多人到爆。經食友推介，最後揀咗明苑集團旗下一家摩登分支「明館」。雖然，小弟晌中環返工，但公司有包伙食，平日真喺甚少出街食晏，對呢區嘅食晏情報好有限。

講明喺摩登，佢哋嘅裝修真喺幾型格，首先就喺裝修簡約，環境光猛整潔，雲石枱搭小手挨坐椅，難得開晌旺區而唔會拍到啲枱密質質。

此外，利用唔同顏色嘅小型蒸籠做出唔同效果，加強番佢哋賣摩登點心嘅形象。

除裝修加插啲特色之外，餐具都有啲賣點，好似避孕套嘅濕紙巾，每隻碗底都有句新詩，感覺幾得意。仲有，一般中菜館提供嘅茗茶大多數都喺普洱、烏龍、壽眉……等等，但呢度就喺降血脂、血糖嘅蕎麥茶，清香又健康，收番茗茶$15位。

午市嘅餐牌就即喺張落單紙，底面兩頁印齊晒所有菜式：涼菜、前菜、點心、沸騰（川菜）、菜蔬、海鮮、焗飯、粉麵飯、小菜、功夫燉湯及甜品，分晒類別，好多選擇。

老鼠愛大米 $48

萌爆嘅造型，絕對喺搶分位，睇外觀有點晶瑩，似喺糯米粉加西米做成，入口軟糯但較黏；饀心喺乜，如果一講喺鹹水角大家就會明白喺乜嚟，鹹鹹香香，可以講喺西米版鹹水角喎！

名館叉燒王 $88

食友話點都要試佢哋嘅叉燒王，好有水準，講到咁堅就點都要試吓嘅。啲叉燒肥瘦兼備，但肥嘅部份又唔會太肥，比例適中，入口極之鬆化而有肉汁，帶清甜蜜香，少少脆口嘅燶邊位，果然喺有水準。

欖角肉鬆蒸秋葵 $68

有啲人唔鍾意食菜就因為味道寡，其實，在乎咩整法，蒜蓉炒、乾煸都喺惹味嘅做法，呢道欖角肉鬆蒸，送飯一流。秋葵本身有益健康，配以欖角，香濃好食。

冶味抱子甘藍炒帶子 $128

點了一道小炒，「抱子甘藍」一個好雅儒嘅名稱，其實即喺椰菜仔，食落挺爽口喎；而帶子質感確然爽彈，醬汁又香濃冶味，夠鑊氣，單以碟炒帶子而言，呢度啲小炒又幾好喎。

私房金黃球泡飯 $88

怕舊同學唔夠飽，單尾點一道泡飯墊底，哈哈！叫得金黃球真喺做個「金球」俾你，渾圓金黃，泡飯湯喺魚湯，更以蠟燭熱住，唔怕凍咗會腥，夠細心。個心心水食法，就哋金球外層唔會拆得太散同浸晒落湯，咁就食到好似飯焦嘅脆邊，正；而飯心浸入湯中，吸收湯汁味道更鮮甜，而湯內混有蠶豆、粟米、冬菇、肉碎、蕃茄……等粒粒，豐富清新。

麻雀十三么（詐糊）$68

嚟之前都有留意過佢哋款招牌甜品「十三么」，難得可以叫「詐糊」（半份），心癢癢又想試吓。賣相又真喺幾抵死嘅，像真度十足，其實喺乜？擰轉背就知，就喺椰汁桂花糕，不過，口感都OK，但椰汁味未夠濃郁，而桂花糕因佔糕底少部份，所以，桂花哋亦唔算好出，個人俾分只會打個合格而已。

臨走時，見近住接待處旁嘅櫃枱，原來喺有蕎麥茶作零售，$120包，推廣做緊買5送1，對蕎麥茶有興趣嘅朋友就啱喇！

依家做食肆真喺要有啲殺手鐧賣點，「名館」晌呢方面表現得出，旗幟鮮明，服務亦好妥貼，例如上泡飯時多俾新餐碗我哋，上甜亦會提供新碟，適時斟茶，繁忙嘅午市時段甩漏唔多，故整餐飯都食得稱心，若非要開工，相信有排傾啦！

個人評分
味道：8/10
環境：8/10
服務：8/10
抵食：7/10
平均每人消費：HK$195

餐廳資料：
名館 Ming Bistro
中環擺花街1-7號1號廣場1樓
2180 0768