功夫點心 Kung Fu Dim Sum：月黑．風高

今年食過嘅月餅都唔算好古靈幣怪，都喺啲奶皇、白蓮蓉、伍仁之類，比較中式及傳統，如要算喺有少少特別，就喺朋友嘅謝禮，功夫點心嘅「蛋黃芝麻月餅」，加入黑芝麻作餡心，期待佢嘅芝麻香味會有幾濃。以深啡硬紙皮作包裝盒，簡單嘅標誌，如真功夫般表沉實，唔太造作。

芝麻月餅喺迷你裝份量，一盒有4小個，依家嘅月餅以獨立包裝喺必然嘅事，而每個月餅都印上「功夫」兩個字，清晰表達佢嘅出處。

睇外表，跟一般嘅蓮蓉月餅無咩分別，但一切開，正正式式嘅「黑心」月餅，餅皮搓得夠薄，內裡全部都喺芝麻蓮蓉餡，雖然加入咗蓮蓉，估計成份唔太多，所以，唔太甜之餘，芝麻味十分突出；每個月餅只有一隻鹹蛋黃，而且，唔喺好大個，所以，比起其他嘅又雙黃、又三黃，依款月餅相對健康少少，味道亦唔錯，芝麻蓮蓉餡好軟滑。唯一唔理想嘅地方，喺鹹蛋黃有啲乾，缺少一份油香感。

功夫點心都幫襯過，但只限飲茶食點心，佢嘅月餅都喺第一次食，整體感覺不俗！

個人評分
味道：8/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
功夫點心 Kung Fu Dim Sum
深水埗福榮街72號地下
2880 9906