富士山 55 Fujiyama 55：沾沾自喜

小弟對日本嘅沾麵認識唔深，都只不過兩年前晌「麵屋武藏」初次接觸沾麵，以黑蒜油為主嘅「汁底」，將麵條沾過後放入口，嗰種濃香得化不開嘅味道真喺印象頗深，不過之後亦無特意追捧。近嚟見「富士山55」爆咗上嚟，引發再試沾麵嘅意欲，既然好友搵到，就更加順水推舟前往一試。

我哋嚟得早，客人唔多，但食到8:00pm離開時，有八乘幾滿。整間鋪唔大，呈長形，一眼睇晒，有多張4人枱，部份喺面壁嘅吧位，而半開放式廚房可以讓客人睇到師傅做麵。

水泥牆身帶點粗獷，木枱木櫈木地板，加和風燈籠高高掛，平實中滲出親和感。但最引人注目，或許喺牆上介紹拉麵嘅手繪插畫，非常得意。

一如好多細嘅日式麵店，所賣嘅款式唔會太多，店家主打嘅沾麵就只有恆常嘅4款（特濃豚骨沾麵、豚骨沾麵、濃香櫻蝦沾麵、辛辣沾麵）及1款季節限定（牛介沾麵），定價$78-$88。此外，為照顧唔同人嘅需要，亦提供4款拉麵選擇（白湯豚骨拉麵、濃香櫻花蝦拉麵、二朗系拉麵、辛辣拉麵），同樣定價都喺$78-$88嘅範圍。無論食沾麵定拉麵，客人都可按喜好揀麵條硬度，以及要求走蒽、走筍，更可以額外俾錢再加多啲配菜，如叉燒、半熟蛋……等等，亦另備有煎餃子及雞軟骨棒兩款小食。

未食過沾麵嘅朋友唔使擔心，牆上貼有「溫馨提示」教你點樣品嚐正宗日本沾麵，晌度就唔多抄一次嘞，自行按圖索驥，一睇就明！

除咗俾錢加配菜外，枱上有即磨黑胡椒、昆布醋、七味粉同辛辣嘅漬醃高菜。

濃香櫻蝦沾麵 $88

友人所點嘅櫻蝦沾麵，基本一大碗麵條都包括叉燒及溏心蛋（半熟玉子），另加紫菜（+$10），此外，亮點就落晌兜櫻花蝦豬骨湯身上。

滔少少一試，櫻花蝦豬骨湯質感帶黏，因湯中加入大量櫻花蝦乾，所以，每炷麵條都沾滿蝦乾。而湯汁味道本身頗濃香，食完叫店員加番啲鰹魚清湯平衡返個鹹度，咁就夠圓滿嘞。

順帶講埋啲叉燒及溏心蛋，薄切嘅叉燒肉質鬆化，帶點脂香，屬偏瘦類型；而溏心蛋嘅蛋黃色澤閃亮，流心盪漾，格外誘人，味濃柔滑，怪唔之得見隔離枱位哥仔仲要額外加兩份半熟玉子啦！

特濃豚骨沾麵 $78

雖然有個季節限定嘅牛介沾麵，但經店員介紹後，都喺想食番個特濃豚骨沾麵。小弟愛食竹筍 （+$10） ，而黑木耳 （+$10） 又有益，所以加錢添依兩款配菜。配菜跟麵條，堆起一大碗，份量真喺唔講得少。

個特濃豚骨湯果然夠濃香，尤其湯面再加一小撮魚介粉，誇張少少講，有畫龍點睛之效，口感又唔會太漿口。小弟選「固麵」，即喺粗啲較硬身，表面面積大咗自不然沾汁都沾多咗，味道亦濃啲，不過，個硬度就未必個個人都可以接受到。又順口講講，湯汁初上枱時唔喺滾熱辣，如果食食吓覺得啲湯汁攤涼咗，每張枱上有電磁爐供翻熱，讓客人食得更滋味。

如果咁都唔夠飽，可以剩餘嘅湯汁追加一客日式芝士雜坎(（+$20），即喺加入一碗白飯同芝士碎連湯汁同煮而成嘅「意大利飯」。因為有啲吧位，就算獨自一個人嚟，同樣可以食得沾沾「自」喜。

個人評分
味道：7/10
環境：7/10
服務：8/10
抵食：7/10
平均每人消費：HK$98

餐廳資料：

富士山55 Fujiyama 55
銅鑼灣伊榮街9號欣榮商業大廈地下1號舖
2363 3334