Classified：Jam心賀禮

食果醬其實真喺無咩心得，細個時最鍾意喺用羅拔臣黃梅占做油占多，另外羅拔臣仲有隻檸檬占，搽梳打餅清香好食，早年都仲有機會晌華潤見到，依家好似消聲匿跡。不過，近年老婆就較喜歡法國嘅聖桃園（St. Dalfour）果醬，尤其藍莓味，一來晌超市就買得到，二來貪佢講明成分天然，又無添加，更含一半成份果肉，都只喺三十零蚊一樽（284g-300g），抵食喎。年初，收到食友一份生日賀禮，喺嚟自Classified，屬英國產品嘅Strawberry and Champagne Preserve Extra Jam。

本來都無打算寫食評，因為都唔知點寫好，不過，最近意外獲贈大師級所做嘅黑松露鴨肝醬，齋配梳打餅已食得到鴨肝醬嘅綿滑，其獨有嘅酥香。不過，眾所周知，鵝肝醬、鴨肝醬都喺比較濃味，肥膩感偏重嘅食材，心想：搭果占做多士又點呢？士多啤梨香檳果醬拼鴨肝醬多士，原來OK喎，味道都唔會太古怪，甜甜酸酸嘅士多啤梨香檳果醬，跟濃味嘅鴨肝醬，有種相互中和、平衡嘅作用，入口會清新少少。

不過，款果醬個味道本身唔好太期待有咩香檳味，因為睇番背後招紙嘅成份，香檳只有3%已而。而且，亦有加入一啲化學成份，算不上好天然。一樽果醬有成454g，啱啱好一磅重，都幾「襟」食！

好奇究竟要幾錢樽，就晌公司附近嘅Classified望望，原來都要成$70一樽，真喺大手筆，藉此再次多謝食友嘅精心賀禮！

其實朋友間送咩都好開心，就算喺樽羅拔臣都一樣咁歡喜，不過，就千祈唔好喺惠康嘅特惠牌，超平，但真喺唔得囉！

個人評分
味道：6/10
環境：- /10
服務：- /10
抵食：- /10
平均每人消費：HK$70

餐廳資料：
Classified
中環皇后大道中18號新世界大廈1樓1號舖
2567 3454