完咗大澳行程出返東涌，難得入到嚟，咪晌東薈城打個轉囉，嘩，實在太多人，草草行完就算。臨尾上咗大食代望一望，老婆建議食碗糖水先走，所以，就晌Sweetscoop睇睇有無心水，見佢話全新推介個夏日特大刨冰，共有6款：芒果刨冰、蕃薯刨冰、奇異果刨冰、鮮果雙拼刨冰、紅豆刨冰同古早三色刨冰，即管叫一份試試。
刨冰晌台灣就周圍都喺，仲記得嗰時去台南玩，近住安平古堡食過一檔「體育公園杏仁豆腐冰」嘅杏仁紅豆牛奶冰，好鬼正，底層喺杏仁豆腐粒，再鋪一層刨冰，然後澆啲牛奶，最後加上紅豆，涼透心嘅消暑奇冰。今日晌度所試嘅古早三色刨冰，質素又如何呢？
刨冰類喺全新推介
古早三色刨冰 $30
刨冰大到成咗小雪山咁，兩三個人食都得。三色意指芋頭粒、紅豆、紅腰豆，見個妹妹仔將啲料喺咁壓晌啲刨冰面上，可能個刨冰實在太大，又高又斜，所以最後都跌番唔少落嚟，尤其芋頭粒，因為較大教重身，容易甩番出嚟，最後淋上蔗糖糖水同椰奶奉客。
整刨冰機
芋頭粒同紅腰豆相對較少份量，因為跌咗唔少，而芋頭未夠粉，咬落有啲實實嘅感覺；紅腰豆就無咩特別，最好喺啲紅豆，夠多，又腍，又清甜。刨冰本身無味大家都知，所以靠晒啲糖水同椰奶，蔗糖糖水頗甜下，椰奶溝咗落啲刨冰度椰子味唔會太突出。講真，個刨冰真喺好大份，加上大食代啲冷氣夠強勁，越食越「心寒」，刨冰都喺露天曬住少少太陽食先過癮抵死！
刨冰前後兩面，喺咪鋪有好多料呢！
個人評分
味道：5/10
環境：5/10
服務：5/10
抵食：6/10
平均每人消費：HK$15
餐廳資料：
Sweetscoop
東涌東薈城2樓美食廣場大食代內
2109 4618
沒有留言:
發佈留言