Couch CLUB：星Club滋味

自從「死佬飯局」解體之後，都只會間中約個別死佬出嚟聚一聚食番餐，今晚因為老婆同啲姊妹有飯局，得一支公，就捉咗其中一位死佬Dee哥出嚟聚一聚，講下近況吹下水。大家都喺九龍人，選址旺角就最方便大家，好似今晚約晌「Couch CLUB」就喺因為方便。

餐廳位於旺角T.O.P.商場，正正地鐵站上蓋，都唔使出地面就可以由地鐵站穿上去，極為便利，打風落雨都唔怕。環境走咖啡店路線，但又有少少懷舊風，如深色木系裝修，加上牆上嘅波燈，枱上嘅鮮花襯托，令整體感覺悠閒舒服。

先掃視一吓散點餐牌，選擇比預期多，以類別計，有小食、沙律、主菜、意大利粉、意大利飯、甜品，而飲品方面，有多種意式咖啡、特飲及茶飲。

不過，數到抵食嘅非二人套餐莫屬，包沙律或餐湯，小食（6選2）、飯或意粉（3選1）、主菜（3選1），定價$468，但要留意部分菜式需要額外加錢升級，而甜品亦要加錢加配，至於飲品方面就有減20蚊優惠。

田園沙律

以羽衣甘藍為沙律菜底，再加上藜麥、蕃茄、牛油果、黑白芝麻，淋上少少柚子醋，夠晒清新，又夠健康。

是日餐湯
初時睇樣真喺睇唔出咩湯，但入口就嗒到粟米嘅清甜味，再加咗啲煎香咗嘅煙肉，令味道更有層次，飲落確喺幾特別。

鮮香清新薄切油甘魚刺身

除了油甘魚，仲加咗啲三文魚籽及食用花做點綴，賣相好清新，而油甘魚睇落好油潤，入口鮮甜清爽，口感柔滑，作為前菜適合不過。

松葉蟹膏味噌甲羅燒配多士

向來都鍾意食蟹，但又唔想拆蟹咁麻煩，所以，見前菜有呢個選擇就一定揀佢啦。甲羅燒即喺將蟹肉、蟹膏撈埋一齊，多士烘得脆脆，塗滿蟹肉、蟹膏，食到一絲絲嘅蟹肉，而蟹膏濃郁鮮味，入口甘腴，一口咬落去真過癮。

紅酒燉牛面肉旋風蛋飯

本身好鍾意食紅酒炆牛尾呢道菜，所以，飯或意粉類中有呢款紅酒燉牛面肉就啱晒我喇，啲牛面肉裁得大大件，好有睇頭，而且，燉得既入味，又鬆化，咬落仲有份膠質感；至於啲旋風蛋飯跟蛋包飯有異曲同工之處，蛋皮同樣做得嫩滑，加上黏糯嘅珍珠米，同埋啲紅酒汁，一啖入口真好食！

慢煮芝心雞卷配香草蕃茄醬
主菜類就選上芝心雞卷，因為用上慢煮技巧，啲雞肉真喺嫩滑到不得了，裡面釀入火腿同芝士，喺老派西餐「哥頓豬」嘅雞肉健康版，食味更豐富，沾上香草蕃茄醬自不然就更好食；配菜有菜心苗、車厘茄同薯角，每樣都處理過，味道唔會好寡。

薄荷朱古力奶昔 +$38

雖然個二人餐唔包飲品，但有加配優惠。老友就試咗唔「健康」嘅薄荷朱古力奶昔，皆因面頭唧咗大量忌廉，亦因此攪勻之後，口感變得更滑流，此外，本身嘅朱古力味亦幾唔錯，滲出少少薄荷嘅清涼感，總之大熱天時飲就夠晒爽啦。

山政小山園靜岡焙茶拿鐵 ＋$25

平常嚟咖啡店都喺慣飲拿鐵，今回見佢哋有款焙茶拿鐵，亦好想一試。先喺賣相，拉出一個可愛嘅熊寶寶，已有個高印象分啦，而入口綿密柔滑，焙茶味香濃，帶少少甘味，的確唔錯。

環境舒服，招呼熨貼，加上食物做得有一手，是一餐很好嘅餐飲體驗。雖然，北上成風，但計埋時間成本，我呢啲九龍人都喺較喜歡圖個方便，反正，支持吓香港餐飲業嘛！

個人評分
味道：9/10
環境：8/10
服務：9/10
抵食：9/10
平均每人消費：HK$265

餐廳資料：
Couch CLUB
地址：旺角彌敦道700號 T.O.P This is Our Place地下G06&10號舖
電話：3956 8842