關西一 Kansai One：「壽」寵若驚

作為中環打工族，向來食晏都簡簡單單，不過，今日同老朋友嚟到近「大館」旁主打壽喜燒嘅「關西一」食晏，就有啲受寵若驚嘅感覺，因為店家嘅壽喜燒所賣嘅喺高質素嘅A5和牛，並非賣一般嘅日式涮涮鍋，自然有期待啲。

雖然喺食日式嘢，但裝修就比較摩登啲，餐廳呈長形，入面好深。近門有幾個窗口位，對住街景，而左邊又有一系L形吧枱位，細心一望，加上上面嘅「橙燈籠」，幾有種日式屋台嘅感覺。

初初客人唔多，但已經見到師傅密密手做好準備，中環一到午市尖峰時間真喺好多餐廳都坐滿人，唔喺講笑。

日式餐廳賣嘅產品向來都比較專，「關西一」都喺，主打就喺3款唔同部份嘅套餐：A5赤身、A5牛小排、A5肉眼，分正常及大盛份量，定價$228 - $348；此外，仲推出咗一款期間限定嘅黑毛和牛牛板腱，仲要每日限賣18份，真緊要。而所有部位已列明油花及肉味濃度俾客人參考，按個人喜好嚟選合適部位，仲有就喺每個套餐已包前菜、野菜盛合、日本夢王蛋、日本米飯或讚岐烏冬、甜品，而上述各項食品亦可以追加，最正喺全日無加一。

餐牌另一面就喺飲品，無酒精飲品有咖啡、汽水及特飲，而酒精飲品有啤酒、清酒、梅酒、威士忌及一啲高球特飲，選擇都有唔少。

店家賣嘅喺鹿兒島產嘅薩摩牛，小弟對和牛就唔太熟悉，有興趣就自行上網科普，但大大個薩摩牛木牌放出嚟，喺一份證明。

餐廳採用一人一鍋，但唔覺枱面有爐頭，因為而家好多都用上隱藏式電磁爐，而控制板就設晌枱面，操控簡易。

此外，店家亦好貼心做咗張圖卡，教大家點樣享用壽喜燒食法。唔識，又或唔太明都唔緊要，因為侍應送上套餐時，都會順手幫你開爐，並且簡單講解一下，甚至落手落腳幫你完成頭幾個步驟。而枱上，就備有自家製壽喜燒汁同昆布湯，都可再按個人喜好作調整！

特選A5牛小排壽喜燒套餐 $258
小弟就揀咗油花同肉味濃度都比較平均啲嘅牛小排，睇見啲雪花紋真喺心動，再加埋前菜、野菜盛合、夢王蛋、讚岐烏冬放埋一齊，真喺好有睇頭，好吸晴。

精緻嘅前菜有三文魚籽玉子燒、蘿蔔牛腩漬，前者玉子燒好軟滑，有濃郁蛋味，又有三文魚籽嘅鹹鮮；後者口感鬆化，蘿蔔清甜無渣。

跟住以牛脂膏起起鑊，可以先以煎嘅方式試一片牛小排，油香滿溢；再倒壽喜燒汁，以灼嘅方式試另一片，嫩滑富肉香，沾得滿滿蛋漿，入口絲滑，正呀！

野菜盛合多元化，有油揚豆腐、豆腐、芋絲、香菇、秀珍菇、黃牙白、皇帝菜、大蔥……等等，以壽喜燒汁加昆布湯煮熟，再加入讚岐烏冬煮一煮，即成野菜湯烏冬，野菜夠鮮甜，烏冬夠煙韌，好食。

日本黑毛和牛牛板腱壽喜燒套餐 $278
老朋友就想試試限定嘅牛板腱，同樣都喺油花跟肉味濃度都比較平均嘅部位，雪花紱同樣很吸引，而且，比牛小排切得較大片，晌壽喜燒汁下灼7、8秒即可，入口真有種即化嘅感覺，而且，油香、肉香平衡。而佢就喜歡配日本米飯，飯粒黏糯有飯味，滲入少少油脂就更正。

巨峰提子乳酸梳打、白桃乳酸梳打 @$28
食壽喜燒，配番杯冰涼嘅乳酸梳打就最好不過，皆因壽喜燒汁帶點甜味，而A5和牛油脂有番咁上下，乳酸梳打嘅酸酸爽爽正好來個平衡，又有種解膩之效，總之飲落就喺爽。

蕨餅
用餐完畢，侍應會好醒目幫你收拾好枱面，再奉上小甜點：抹茶口味及黃豆粉口味嘅蕨餅，蕨餅口感煙煙靭靭，少甜，為今餐有個完整嘅完結。

今餐食材嘅高質素故然喺亮點，但招呼亦好稱心，卻唔收加一，亦喺抵讚位！

個人評分
味道：9/10
環境：8/10
服務：9/10
抵食：8/10
平均每人消費：HK$296

餐廳資料：
關西一 Kansai One
地址：中環荷李活道26號地舖
電話：9275 7870