漢城美食 Han Sung Korean Cuisine：刮目相「漢」

雖然不時都有追吓韓劇，但就未必成日食韓國菜，久唔久見到啲性價比高嘅都會搵朋友一齊去試吓。最近，就同朋友去咗位處「韓國街」嘅「漢城美食」試試，貪其價錢親民，口味夠地道。

因為餐廳位於街角，一大片外牆有一大幅壁畫，甚具打卡度，以為好潮，但估唔到入到去有另一番風情，尤其門口嘅舊招牌，極具「古早」味，加上仲用「漢城」一詞就知幾有歷史感，原來，餐廳已屹立咗1/4世紀。

整體嚟講，裝修簡潔，深沉色嘅木枱木櫈，又有種韓式老風味，尤其天花嘅波燈，感覺輕鬆！

去親韓國餐廳，都一定備有一壺凍水，呢個喺韓國餐廳嘅特色，此外，所有餐具都放晌膠盒內，予人感覺衛生啲。

翻一翻餐牌，菜式種類非常之多，可以講應有盡有，全部列晒號碼，足有過百款食物。此外，每日都會有啲菜式會以優惠價供應，啱食嘅不妨晌度下手，可以慳番好多。

而餐廳落單都幾得意，將菜式號碼寫落紙仔度，好有份老派懷舊味，晌依家「掃碼」落單年代，呢種反潮流嘢就變成另一份獨特性。仲有，侍應會即時印張單出嚟俾你核對一下。

韓式前菜

食韓國菜一大特色就喺會提供好多極具韓式嘅前菜，今次所見就有3款：韓式泡菜、大豆芽及韓式煎餅，泡菜酸辣爽脆，大豆芽油香爽口，煎餅軟腍有蔥香，唔單止過過口癮，更加喺令人食落開胃咗。

牛肉紫菜飯卷 $76
韓國嘅紫菜飯卷跟日式嘅壽司卷好唔同，雖然外觀類似，但唔會好似日式咁搞咁多花款，好似呢款咁傳統，就捲住甘筍、菠菜、醃蘿蔔、煎蛋同牛肉，灑上芝麻，捲得紮實，口感柔韌而清爽，味道清新帶少少麻油香，而且，感覺好健康。

海鮮煎餅 $119

韓國煎餅亦喺小弟常嗌嘅菜式，師傅做得手勢好，因為唔單止煎餅底面都好焦香脆口，裡面仲有好多海鮮餡料，好足料，咬落餅身軟糯，口感豐富，又帶少少蔥香，確喺做得有水準。再沾上特製醬汁，多添一份鮮味，好食。

雞肉韓式石頭飯 $107

韓式石頭飯又喺韓國菜嘅標誌性菜式，況且，我都幾鍾意食，尤其啲飯焦底。大大份石頭飯，滾熱焫，除雞肉，面頭鋪滿其他食材，包括蘿蔔絲、翠玉瓜絲、甘旬絲、菠菜、大豆芽，將韓式甜辣醬、蛋黃同所有配料撈勻一齊食，味道豐富又帶少少辣勁，食到尾都仲喺暖笠笠。此外，石頭飯仲奉送海帶湯，清爽解辣，真好。

Apple Soda, Mango Juice @$15

我哋仲叫咗兩罐嘢飲，平時食放題都會見呢兩款韓國罐裝飲品，志在過過口癮，尤其是食韓式石頭飯，好搭配。

整體嚟講，食物做得真喺不錯，招呼亦好，侍應很快手幫手收拾枱面，但又不會催你走，定價亦相宜，可以講喺最抵食嘅韓國餐廳之一，怪不得目測咁多年輕人嚟幫襯，我隔離枱聽落就似成枱都喺理大學生喇！

個人評分
味道：9/10
環境：8/10
服務：8/10
抵食：9/10
平均每人消費：HK$180

餐廳資料：
漢城美食 Han Sung Korean Cuisine
地址：尖沙咀金巴利道74-76號地舖
電話：2375 5055