REX Wine & Grill：

眾所周知，中環一到食晏時間就超多人，大家都喺講求快靚正，但今日好唔同，向來食高級菜嘅大哥請食晏，仲要食間頗為高級嘅法國牛扒餐廳「REX Wine & Grill」，當然，要慢慢嘆，細意享受啦。

餐廳設晌地庫，門面唔起眼，好易過門不入，沿樓梯走落去，有份尋幽探秘之感。一室高雅嘅裝修，甚有格調，又非常之有氣氛，跟外面喧鬧嘅情境有好大反差，晌度真有種脫離咗現實嘅舒適感。

午餐主打為二、三、四道菜套餐，定價如下：

2 Course：Main + Appetiser / Dessert $368
3 Course：Appetiser + Main + Dessert $428
4 Course Two Appetisers + Main + Dessert $498

酸種法包
我哋同樣揀咗3道菜午餐，因為可以試勻前菜、主菜、甜品，而下單後先送嚟一籃法包，外皮煙韌，包物軟熟，塗少少牛油都好好食。

French Onion Soup

法式洋蔥湯可以講喺法國菜嘅經典之一，做法夠傳統，湯頭好香濃，炒到焦糖化咗嘅洋蔥寧舍香甜，加埋嗦滿湯嘅烤麵包粒同溶化晒嘅康堤芝士，就更加好味，不愧為經典。

Burrata

呢個前菜名為「布拉塔水牛芝士」，有列明所用材料，除水牛芝士，仲有豌豆忌廉、火箭菜及24個月熟成嘅西班牙塞拉諾火腿，每款食材都好有個性，水牛芝士口感綿密柔軟，濃厚奶香，塞拉諾火腿則油潤富脂香，加上豌豆忌廉、火箭菜帶嚟嘅清新感，吃得出配搭好有心思。

Murray Cod
大哥向來喜歡魚，就揀呢款鳕魚，鳕魚上枱後，會再由侍應倒下由白酒同牛油煮成嘅汁，金黃好睇，而鳕魚入口嫩滑到不得了，又富魚鮮味，墊底嘅菠菜亦好好食；食完魚，再將煲仔飯拌勻加入汁醬中食，因為混入埋蔥花、瑤柱絲，飯粒又啱啱，真喺無得輸！

Steak Frites

小弟向來甚喜歡肉，所以，揀M3安格斯牛扒，賣相非常之亮麗，牛扒剛剛熟，無丁點血水滲出，食落軟腍，有肉味，又有炭火香，沾上少少濃郁嘅黑椒汁，味道有股昇華力；而伴碟嘅西蘭花苗好爽脆，薯條又炸得香脆不油膩。

Chocolate Burnt Cheesecake

法式甜點一向知名，又點可以錯過呢，先嚟一道又喺稱得上經典嘅心太軟，單喺賣相已經算喺件藝術品，精緻細膩。朱古力做出流心效果，朱古力味濃郁，伴以酸香嘅紅莓醬，正好相互揮映，味道平衡。

Paris-Brest Chou Puff
另一道法式泡芙賣相亦夠靚，立體而漂亮，唔好以為就咁泡芙唧啲忌廉，先講泡芙，外皮香脆，面頭嘅榛子忌廉香濃幼滑，甚具榛子香味，再加少少薄脆增加口感，點知裡面仲注滿更濃郁嘅榛子醬，並有少少榛子仁，真精彩。

雖然只喺3道菜嘅午餐，但都食咗成個幾鐘，法國菜就喺要慢慢享受，活在當下，偶爾慢活一下。

個人評分
味道：10/10
環境：9/10
服務：8/10
抵食：8/10
平均每人消費：HK$470

餐廳資料：
REX Wine & Grill
地址：中環德輔道中22號One Chinachem地庫
電話：2857 7157